Məlum olduğu kimi, oktyabrın 3-də Azərbaycan Respublikasının Prezidenti İlham Əliyev Soçi şəhərinə səfəri zamanı “Valday” Beynəlxalq Diskussiya Klubunun iclasında iştirak edib. Prezident İlham Əliyev iclas ərəfəsində Rusya mediasına da geniş müsahiblər verib, bu müsahibələrdə Rusiya-Azərbaycan münasibətlərinə toxunub.
Prezident İlham Əliyev qeyd edib ki, Azərbaycan-Rusiya münasibətləri zamanın sınaqlarından keçib: “...Bizim Rusiya ilə münasibətlərimiz hər hansı xarici siyasi gündəlikdən azaddır. Bu münasibətlər zamanın sınağından çıxıb. Hər iki tərəf bu münasibətləri strateji tərəfdaşlıq münasibətləri adlandırır. Bu, həqiqətən də belədir. Çünki biz həm qonşuyuq, həm də mehriban dostlarıq. Son vaxtlar bizim münasibətlərimiz xeyli səmərəli və keyfiyyətli olub. Biz həm beynəlxalq meydanlarda əməkdaşlıq edir, həm də bir-birimizi dəstəkləyirik” - deyə Prezident İlham Əliyev bildirib.
Azərbaycan-Rusiya münasibətləri hansı sınaqlardan keçib?
“Azərbaycan və Rusiyanın ortaq maraqları var”
“Xalq cəbhəsi” qəzetinin baş redaktoru, tanınmış politoloq Elçin Mirzəbəyli “Bakı-Xəbər”ə mövzunu şərh edərkən qeyd etdi ki, iki ölkə arasındakı münasibətlərin dərin kökləri var və bu münasibətlər də zamanın sınağına tab gətirərək indiyə qədər özünü qoruya bilib. “Azərbaycan-Rusiya əlaqələri yalnız Sovet dövründə mövcud olan münasibətlərə söykənmir. Sovetlər dövründən əvvəllər də hər iki ölkə arasında müxtəlif sahələrdə sıx əlaqələr, münasibətlər mövcud olub. Bilirsiniz ki, Azərbaycan uzun müddət çar imperiyasının tərkibində olub. Bu dövrdən başlayaraq əlaqələr indiyədək davam edib. Doğrudur, bu sırada tarixin qara səhifələri də var, onun üzərindən keçmək olmaz. Bütün bunlara baxmayaraq, həmin dövrdən Azərbaycan və Rusiya arasında qarşılıqlı əlaqələr formalaşıb, münasibətlər qurulub. Azərbaycan ziyalıları Rusiyada təhsil alıblar, ölkəmizdə təhsil sisteminin qurulmasında, formalaşmasında Rusiya ziyalıları aktiv şəkildə iştirak ediblər. Bu baxımdan, təbii, Azərbaycan-Rusiya əlaqələrinin tarixi uzaq dövrlərə gedib çıxır.
Azərbaycan Xalq Cümhuriyyətinin süqutundan sonra ağır durumda yaşadıq. Sonra isə SSRİ tərkibində birgə yaşadıq. SSRİ tərkibində yaşayan digər xalqlarla yanaşı, Azərbaycan xalqı da o dövrün siyasi repressiyalarına məruz qaldı. Azərbaycan Sovet İttifaqının tərkibində olarkən ümumi mənafelərə xidmət üçün müxtəlif addımlar atıb. İkinci Dünya Müharibəsində Azərbaycan xalqı da, Azərbaycan nefti də müharibədə qələbə əldə edilməsində müstəsna rol oynayıb.
Qeyd edim ki, dövlət müstəqilliyimizin ilk illərində Azərbaycan və Rusiya arasında soyuq münasibətlər yaranmışdı, amma bu uzun sürmədi. Ümummilli lider Heydər Əliyev hakimiyyətə gəldikdən sonra Azərbaycan-Rusiya münasibətlərində yenidən yaxınlaşmalar baş verdi və bu münasibətlərin hazırkı vəziyyətə gəlib çıxmasının əsası qoyuldu. Şübhəsiz ki, bu münasibətlərin indiki mərhələyə qədəm qoymasında Azərbaycan Prezidenti cənab İlham Əliyevin və Rusiya Prezidenti Vladimir Putinin müstəsna xidmətləri var. Hər iki ölkənin başçısı Rusiya mediasına xüsusi olaraq bildiriblər ki, Azərbaycan və Rusiya strateji əlaqələrə malikdirlər, dünyada və regionda baş verən prosesləri ortaq mövqedən, ortaq maraqlardan qiymətləndirirlər. Azərbaycan və Rusiyanın ortaq maraqları var. Bu aspektdən də şübhəsiz ki, cənab Prezident uzun bir tarixi müddət ərzində Azərbaycan-Rusiya münasibətlərinin qarşılaşdığı ixtilafları nəzərdə tutub və bu ağır sınaqlardan hər iki dövlətin, xalqın üzüağ, alnıaçıq çıxdığını xüsusi olaraq vurğulayıb” - deyə E.Mirzəbəyli qeyd etdi.
İradə SARIYEVA
