Rusiya xarici işlər naziri Sergey Lavrov Ermənistanın həbsdə saxladığı azərbaycanlı girovlar Dilqəm Əsgərov və Şahbaz Quliyevin taleyi ilə bağlı açıqlama verib. “Valday” klubunun XVI sammitində çıxış edən Lavrov yaxın zamanlarda əsir və girovların dəyişdiriləcəyini deyib.
Bundan bir neçə gün öncə isə Avropa Şurası Parlament Assambleyasının (AŞPA) iclasında Azərbaycan nümayəndə heyəti azərbaycanlı girovların məsələsini qaldırıb.
Avropa Şurasının Baş katibi Mariya Pesçinoviç Buriç isə Dilqəm Əsgərov və Şahbaz Quliyev probleminin Baş Katibliyin gündəliyində olduğunu bildirib. Məlum olduğu kimi, Lavrov bundan əvvəl də girovların dəyişməsi ilə bağlı fikirlər səsləndirmişdi. Ancaq budəfəki kimi konkret fikrini ifadə etməmişdi. Lavrovun girovların dəyişdiriləcəyi ilə bağlı əminliyindən hansı nəticəni çıxara bilərik?
“Yaxın zamanda Dilqəm və Şahbaz öz vətənlərinə təhvil veriləcək”
Azərbaycanlı Əsir və Girovlarla bağlı Məlumat Mərkəzinin koordinatoru, hüquq müdafiəçisi Əhməd Şahidov “Bakı-Xəbər”ə bildirdi ki, hazırda Böyük Britaniyanın paytaxtı London şəhərində keçirilən beynəlxalq insan haqları konfransında iştirak edir: “Birləşmiş Millətlər Təşkilatının İnsan Haqları üzrə Ali Komissarlığının dəstəyilə baş tutan "Hərbi münaqişələr, sülh və insan haqları" adlı beynəlxalq konfransda dünyadakı münaqişə ocaqları, müharibə zonaları, mülki şəxslərin hüquqları və sülh təşəbbüsləri barədə məruzələr dinlənib.
"Münaqişələrin humanitar fəsadları" adlı paneldə çıxışım zamanı azərbaycanlı mülki girovlar Dilqəm Əsgərov və Şahbaz Quliyev haqqında danışdım. Bildirdim ki, son 6 ildə Ermənistan heç bir beynəlxalq çağırışa məhəl qoymur və mülki şəxsləri girov saxlamaqda davam edir. Rəsmi Bakı humanist bir təkliflə çıxış etməkdədir və əsir və girovların "hamının-hamıya" prinsipi ilə dəyişdirilməsini təklif edir. Ancaq Ermənistan bundan yayınır. Buna baxmayaraq, edilən təzyiqlər nəticəsini verməkdədir. Hətta deyərdim ki, proses yekunlaşmaq üzrədir. Lavrovun çıxışı zamanı girovlarla bağlı qəti şəkildə fikir səsləndirməsi artıq prosesin razılaşdırıldığını bildirir. Çünki bu məsələdə Rusiyanın Ermənistana təsiri var. Bu humanitar prosesdə Rusiya hər zaman fəal olub. Hətta ilk dəyişdirilmə də oldu. Mülki əsirimiz Elvin İbrahimov erməni diversant Karen Karapetyanla dəyişdirildi. Bundan sonra Azərbaycan prosesin tam yekunlaşması üçün bütün istiqamətlərdə fəaliyyəti gücləndirdi. Biz də vətəndaş cəmiyyətinin üzvləri olaraq beynəlxalq müstəvidə məsələni daim gündəmə gətirdik. Polşanın paytaxtı Varşavada keçirilən toplantıda bu məsələni bir daha 57 ölkənin səfirləri, diplomatlarının nəzərinə çatdırdıq. AŞPA-nın sessiyası zamanı da kompleks işlər apardıq. 30-a yaxın şəxslə görüşümüz oldu. Artıq görünür ki, səylərimiz öz bəhrəsini verib. Çünki Lavrov sıradan adam deyil, onun əminliklə girovların dəyişdirilməsi prosesinin baş tutacağını söyləməsi bizə inanmaqdan başqa şans tanımır. Əminəm ki, yaxın zamanda Dilqəm və Şahbaz öz vətənlərinə təhvil veriləcək”.
Məhəmmədəli QƏRİBLİ
