Prezident İlham Əliyev Soçidə “Valday” klubunun toplantısında Dağlıq Qarabağ münaqişəsi ilə bağlı ermənilər və dünyaya ciddi mesajlar vermiş oldu. Ermənistan-Azərbaycan Dağlıq Qarabağ münaqişəsindən danışan dövlət başçısı Ermənistanın təcavüzkar siyasətinin nəticələrini, BMT Təhlükəsizlik Şurasının münaqişənin nizamlanmasına dair qəbul etdiyi 4 qətnamənin 25 ildən çoxdur yerinə yetirilməməsi və digər mühüm məqamları diqqətə çatdırıb.
Dövlət başçısı Ermənistan Baş nazirinin “Qarabağ Ermənistandır və nöqtə” bəyanatının yalan olduğunu vurğulayaraq deyib: “Qarabağ tarixi Azərbaycan torpağıdır. Beləliklə, Qarabağ Azərbaycandır və nida işarəsi”.
4 aylıq fasilədən sonra Azərbaycan Prezidenti İlham Əliyevlə Rusiya Prezidenti Vladimir Putin arasında keçirilən görüş və bu görüş ərəfəsində verilən mesajlar, həmin gün baş verən hadisələr artıq təhlil üçün ilkin nəticələri ortaya qoyub. Birincisi, Əliyev “Qarabağ Azərbaycandır və nida işarəsi!” bəyanatıyla göstərdi ki, o, vədinə sadiqdir, Qarabağ məsələsində tutduğu mövqedən geri çəkilməyib və Azərbaycanın ərazi bütövlüyünü şübhə altına alacaq istənilən həll modelini qəbul etməyəcək. Bu görüş öncəsi Sergey Lavrovun “Dağlıq Qarabağın Ermənistanın olması bəyanatı münaqişənin həllinə kömək etmir” fikri də təsdiqləyir ki, son bir neçə aydakı təxribatçı açıqlama və hərəkətlərilə münaqişə zonasında məqsədli gərginlik yaratmaq və sülh danışıqlarını pozmaq mövqeyindən yalnız Paşinyan hökuməti çıxış edir. İlham Əliyevin “Valday”dakı çıxışndan daha hansı böyük nəticələri çıxara bilərik?
Qeyd edək ki, “Valday” Beynəlxalq Diskussiya Klubu 2004-cü ildə yaradılıb. Klubun ilk konfransı Rusiyanın Velikiy Novqorod şəhərində, Valday gölünün sahilində keçirilib. Elə klub adını da buradan götürüb. Ötən illər ərzində dünyanın aparıcı ekspertlərinin görüş yerinə çevrilmiş klub öz tədqiqatlarında qlobal siyasət və iqtisadi proseslərin araşdırılmasına xüsusi yer verir. İndiyədək klubun işinə 74 ölkədən dünya elmi birliyini təmsil edən 1000-dən çox nümayəndə, o cümlədən, Harvard, Kolumbiya, Corctaun, Stenford, Karlton, Sarbonna, London, Qahirə, Tehran, Tokio, Təl-Əviv və digər universitetlərin tanınmış professorları qatılıblar. Finlandiya, Çexiya, Avstriya, Fransa, İtaliya, İran, CAR və digər ölkələrin prezidentləri və baş nazirləri “Valday” klubunun qonağı olublar.
Rusiya Prezidenti Vladimir Putin klub yarandığı vaxtdan hər il diskussiyaların iştirakçıları ilə görüşür və ətraflı fikir mübadiləsi aparır. Onu da bildirək ki, digər ölkələrin rəhbərləri bu tədbirlərə məhdud sayda dəvət olunurlar. Hazırda keçirilən tədbirə də bir neçə ölkənin rəhbəri qatılıb.
Başlıca məqsədlərindən biri dünya sisteminin böhrandan çıxarılmasına dair qərarlar qəbul etmək üçün intellektual elitanın bir araya gətirilməsi olan klub beynəlxalq münasibətlər, qlobal siyasət, iqtisadiyyat, təhlükəsizlik, energetika, sosiologiya və digər sahələrdə aparıcı ekspertlərlə əməkdaşlıq edir. Klub Asiya, Yaxın Şərq, Avroatlantika dialoqları kimi regional konfranslar da təşkil edir.
“Valday” klubu 2018-ci ildə bütün dünyanın diqqət mərkəzində olan Rusiya-Çin konfransının və Rusiya-İran dialoqunun təşkilatçısı olub. Ötən ilin iyun ayında klubun diskussiya meydanında məhz bu məqsədlə Rusiyaya səfər edən BMT-nin Baş katibi Antonio Quterreşlə görüş keçirilib. Bu baxımdan da İlham Əliyevin tədbirə dəvət edilməsi və həmin tribunadan vacib mesajlar verməsinin əhəmiyyəti böyükdür. Bütün dünya birliyi bir daha əmin oldu ki, Azərbaycan prinsipial mövqeyində qalır və münaqişənin həllində ərazi bütövlüyü ilə bağlı zərrə qədər də güzəştə gedən deyil. Ölkə başçısı, eyni zamanda, dünyanın diqqətinə çatdırdı ki, belə vəziyyət uzun zaman davam edə bilməz. Birgə səylərlə problemin həllinə töhfə verilməlidir. Əks halda, biz öz gücümüzə torpaqlarımızı azad etməyə qadirik.
Məhəmmədəli QƏRİBLİ
