Ermənistanın yeni Antikorrupsiya Strategiyası çərçivəsində Korrupsiyaya Qarşı Mübarizə Komitəsinin yaradılması planlaşdırılır. Bunu ədliyyə naziri Rüstəm Badasyan hökumətin keçirdiyi iclasda bəyan edib.
Badasyan qeyd edib ki, strategiyanın qəbul edilməsi strateji yanaşma nəticəsində korrupsiyanın mümkün qədər azaldılmasını, antikorrupsiya institusional sisteminin inkişaf etdirilməsini, korrupsiyaya qarşı effektiv mexanizmlərin yaradılmasını özündə ehtiva edir: “Gələcəkdə bunun daha ixtisaslaşmış və effektiv olması üçün hüquq-mühafizə sistemi tamamilə yenidən nəzərdən keçirilir”.
Badasyanın sözlərinə görə, üçillik keçid dövrü ərzində Milli Təhlükəsizlik Xidmətinin əməliyyat hissəsi korrupsiya cinayətləri ilə məşğul olmağa davam edəcək. Xüsusi İstintaq Xidməti və ya İstintaq Komitəsi Korrupsiyaya Qarşı Mübarizə Komitəsi yaranana qədər bəzi hallarda korrupsiya cinayətlərini araşdıra bilər. Bununla belə, Baş Prokurorluqda antikorrupsiya istintaq idarəsinin yaradılması da planlaşdırılır.
Nazir onu da iclasda əlavə edib ki, ixtisaslaşdırılmış antikorrupsiya məhkəməsinin yaradılması da vacibdir.
Ermənistanda korrupsiya ilə bağlı yeni qurumun yaradılması bu sahədə ciddi problemlərin olmasının rəsmən etiraf olunması anlamına gəlir. Düzdür, Paşinyan hər vasitə ilə sözügedən problemin ölkədə geniş yayıldığını pərdələməyə çalışır. Çünki bu onun ziyanına işləyəcək. Ona görə ki, hakimiyyətə gəldiyi ilk vaxtlarda islahatların bu problemi həll edəcəyini deyirdi. Daha sonra bəyan etdi ki, hakimiyyət dəyişikliyindən sonra ölkədə korrupsiya halları azalıb. Bu sahədə baş verən neqativ halları əvvəlki hakimiyyətin üstünə atırdı. Ancaq görünən odur ki, vəziyyət heç də Paşinyanın dediyi kimi deyil. Yəni bu sahədə vəziyyət çox mürəkkəbdir.
“...Paşinyan hakimiyyətinin bu sahədə uğur əldə etməsi mümkünsüz görünür”
Sözügdən məsələ ilə bağlı fikirlərini “Bakı-Xəbər”lə bölüşən AMİP-in baş katibi Arzuxan Əlizadənin sözlərinə görə, Ermənistanda korrupsiya ilə bağlı ciddi problemlər var: “İstər əvvəlki hakimiyyətin dövründə, istərsə də hazırda ölkədə korrupsiya ciddi problem olaraq qalır. Yeni qurumun yaradılması da bu sahədə mövcud olan problemlərlə bağlıdır. Paşinyanın islahat imitasiyası bu sahədə dönüş yarada bilməyib. Bu günlərdə Ermənistanda bir sıra korrupsiya hallarının üstünün açılması bunu bir daha təsdiq etdi. Belə ki, Ermənistan Milli Təhlükəsizlik Xidməti tərəfindən aparılan əməliyyat-axtarış tədbirləri nəticəsində bu ölkənin Əmək və Sosial İşlər Nazirliyinin xidməti sahəsində çoxsaylı korrupsiya cinayəti aşkar edilib. Əlillik müddətinin uzadılması üçün müraciət edən Ermənistan vətəndaşından müvafiq vəzifəli şəxslərin rüşvət aldığı müəyyən edilib. Ermənistanda ən çox korrupsiyalaşmış sahələrdən biri ordudur. Bu sahədə çox ciddi neqativ halların olması bir sıra yerli ekspertlər tərəfindən qeyd edilir. Baxmayaraq ki, buna görə bir neçə yüksək rütbəli hərbçi işdən uzaqlaşdırılıb, amma vəziyyət dəyişməyib. Bütövlükdə, Ermənistanda hakimiyyətin bir sıra sahələri korrupsiyalaşıb. Düşünmürəm ki, korrupsiyaya qarşə mübarizə ilə bağlı yaradılan yeni qurum mövcud problemləri həll edə bilsin. Nəzərə almaq lazımdır ki, ölkədə islahatlar aparmaq üçün vəsait olmalıdır. Bu vəsait olmadığına görə Paşinyan hakimiyyətinin bu sahədə uğur əldə etməsi mümkünsüz görünür”.
Vidadi ORDAHALLI
