Sosial şəbəkə hesabından Bakı Şəhər Baş Polis İdarəsinin Mətbuat xidmətinin rəhbəri, polis mayoru Elşad Hacıyevi ölümlə təhdid edən, onu qətlə yetirənə 10 000 manat verəcəyini vəd edən “Evez Vahidovic” adlı şəbəkə istifadəçisinin digər bütün paylaşımları də marağa səbəb olub. E.Hacıyevi ölümlə təhdid edən şəxs Rusiyanın Nijni Novqorod şəhərində yaşadığını qeyd edib.
Profil fotosu əvəzinə 99 EB 660 dövlət nömrə nişanlı BMV markalı avtomobilin fotosunu qoyan istifadəçi avtomobilin ona aid olduğunu qeyd edib. Hətta paylaşımlarının birində 99 EB 660 nömrəli “BMV” ilə yanaşı, 90 DA 924 nömrəli “Nissan” avtomobilinin fotolarını paylaşaraq, avtomobillərini, cərimə edilməsinə baxmayaraq, hələ də rahatlıqla idarə etdiyini bildirib. Əlavə edib ki, qayda pozsa da, avtomobili cərimə meydançasına aparılmır.
Ola bilər ki, həmin şəxs tərəfindən profilində yerləşdirilən informasiyalar həqiqəti əks etdirməsin və məqsədli şəkildə hansısa yanlış məlumatlar qeyd edilsin. Ancaq ortada olan fakt budur ki, son aylar ərzində polisə qarşı müxtəlif səpkili qaralama kampaniyasının aparıldığının şahidi oluruq. Görünür, həmin kampaniyalar effekt vermədiyindən, indi də müəyyən dairələr fəallıq göstərən polisləri fərdi qaydada hədəfə alıb, onların ətrafında xof yaratmağa çalışırlar. Artıq baş verən virtual təhdidlə bağlı cinayət işi başlayıb. Daxili İşlər Nazirliyi və Baş Prokurorluq Bakı Şəhər Baş Polis İdarəsinin Mətbuat xidmətinin rəisi, polis mayoru Elşad Hacıyevin “Facebook” sosial şəbəkəsində “Evez Vahidoviç” adlı sosial şəbəkə istifadəçisi tərəfindən ölümlə təhdid olunması ilə bağlı yayılan məlumatlara münasibət bildirib.
Məlumatda qeyd olunur ki, “Evez Vahidoviç” adlı sosial şəbəkə istifadəçisi “Facebook” sosial şəbəkəsində özünə məxsus səhifə vasitəsilə qeyd olunan polis əməkdaşının öldürülməsinə görə 10 min manat məbləğində pul mükafatı verəcəyini vəd edib: “Qeyd olunan hərəkətlərdə öldürməklə hədələmə əməlinin tərkib əlamətləri olduğundan, fakta görə Cinayət Məcəlləsinin 134-cü (öldürməklə hədələmə) maddəsi ilə cinayət işi başlanıb.
Cinayətin xarakterinə görə dövlət və cəmiyyətin mənafeyinə qəsd etməsi, işin xüsusiyyətləri, ibtidai araşdırmanın maraqları nəzərə alınmaqla cinayət təqibinin səmərəliliyini, eləcə də iş üzrə ibtidai istintaqın tam, hərtərəfli və obyektiv həyata keçirilməsini təmin etmək məqsədilə istintaqın aparılması Bakı Şəhər Prokurorluğunun İstintaq İdarəsinə tapşırılıb.
Hazırda iş üzrə zəruri və təxirəsalınmaz istintaq-əməliyyat tədbirləri davam etdirilir”.
Baş verən bu hadisə ilə bağlı müstəqil ekspertlər nə düşünürlər?
Şəmsəddin Əliyev: “Onların başlıca hədəfi budur ki, polisi cəmiyyətin, ictimaiyyətin dəstəyindən məhrum etsinlər”
“Polisə Dəstək” İctimai Birliyinin sədri Şəmsəddin Əliyev “Bakı-Xəbər”ə açıqlamasında bildirdi ki, burada müxtəlif maraqlar güdülə bilər: “İlkin olaraq polisin işinə psixoloji təsirin olması təəssüratı yaranır. Son zamanlar polisin sabitliyin qorunması və vətəndaşların təhlükəsizliyinin təmin edilməsi istiqamətində atdığı addımlar, nümayiş etdirdiyi prinsipiallıq çoxlarını qane etmir. Görünən budur ki, polis içdiyi sədaqət andına tam şəkildə əməl edir. Bu şərəfli xidmət kimə sərf etmirsə, onlar polisə qarşı aqressiv olurlar. Təbii ki, bu cür hallar polisi öz mövqeyindən çəkindirə bilməz. Polis müxtəlif kateqoriyalı şəxslər və qurumlarla mübarizə aparır. Söhbət qanunvericiliyi pozan elementlərdən gedir. Onların hər biri bu təhdidi edə bilər. Biz hələ ki, dəqiq fakta malik olmadan nəsə deyə bilmərik. Mən daha çox kriminal dairələrin əməlindən şübhələnirəm. Çünki onlara Azərbaycan polisinin ayıq-sayıqlığı sərf etmir. Həmin dairələrin, xüsusilə də “qanuni oğru”ların həyatının sosial media və bəzi elektron KİV-də təbliğatı bu fəsadları yarada bilər. Bir çox gənc həmin təbliğatın təsiri altına tez düşür. Bu səbəbdən də biz təbliğat resurslarında bu profilə xüsusi diqqət etməliyik. Onların başlıca hədəfi budur ki, polisi cəmiyyətin, ictimaiyyətin dəstəyindən məhrum etsinlər. Belə olan halda, polis cinayətkarlıqla mübarizədə onlarla üz-üzə qala bilər ki, bu da ictimaiyyət üçün arzuolunmayan bir haldır. Bu baxımdan da, KİV nümayəndələri cinayətkar aləmin təbliğinə həsr edilən materialları yazmaqdan imtina etməlidirlər”.
Məhəmmədəli QƏRİBLİ
