Sevan gölü Cənubi Qafqazın ən böyük gölüdür. Adıçəkilən göl dəniz səviyyəsindən 1900 metr yüksəklikdə yerləşir. Sahəsi 1200 kv.km. olan gölün ən dərin yeri 79,7 metrdir.
Son vaxtlar gölün səthində yosunların sayı sürətlə artır. Ermənilər iddia edirlər ki, yaşıl və göy rəngli yosunlar xüsusi toksik maddə buraxaraq, suyun tərkibini və keyfiyyətini dəyişir. Gölün bu gedişlə bataqlığa çevriləcəyini deyirlər. O da məlumdur ki, Ermənistan tərəfi gölün ekoloji vəziyyətinin pisləşməsi ilə bağlı hay-küy salaraq Qərbdən pul qoparmağa çalışır.
Bu günlərdə Sevan gölünün UNESCO-nun mədəni irs siyashısına daxil edilməsi ilə bağlı erməni tərəfi müraciət edib.
Ermənistan Zoologiya və Hidroekologiya İnstitutunun direktoru Boris Qabrielyan gölün ətrafında istirahət məkanlarının, restoranların və yaşayış məntəqələrinin mərkəzləşdirilmiş kanalizasiya sisteminin olmamasını, çirkab sularının gölə axıdılmasını, həmçinin, gölün suyundan xüsusən yayda suvarma, təsərrüfat işlərində qeyri-rasional istifadə edilməsini əsas təhlükələr siyahısına daxil edib.
Bu arada məlum olub ki, erməni tərəfinin apardığı kampaniya onların ziyanına işləyib. Belə ki, Sevana son günlər istirahət etməyə gələn turistlərin sayı kəskin azalıb. Bu səbəbdən iyulun 15-də sahibkarlar etiraz aksiyası keçiriblər. Sevanda istirahət mərkəzlərindən birinə rəhbərlik edən Şagen Asatryanın sözlərinə görə, gölün çirklənməsi ilə bağlı deyilənlər şişirdilmiş məlumatlardır. Onun fikrincə, məlum kampaniyadan sonra istirahətə gələnlərin sayı kəskin azalıb: “Bu il keçən il istirahət edənlərin yalnız 2 faizi Sevana gəlib. 2018-ci ildə boş yerlərimiz yox idi. İndi isə heç kim gəlmir. Deyirlər ki, Sevanda toksik maddə var. Elədirsə, o zaman göldə üzən uşaqlar niyə buna yoluxmurlar? Sevanın suları zəhərlənibsə, onda niyə Ararat vadisinə tökülür?”.
Göründüyü kimi, ermənilərin Sevan gölü ətrafında qurduqları kampaniya onların əleyhinə işləyir.
Əli Orucov: “Nəticəsi isə əksinə olub və turistlərin gəlişinə ciddi mənfi təsir göstərib”
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun sözlərinə görə, belə vəziyyətin yaranması hardasa gözlənilən idi: “Çünki ermənilər əksər hallarda öz qazdıqları quyuya özləri düşürlər. Onların toruna düşənlərin də sayı getdikcə azalmaqdadır. Ermənilərin Sevan adlandırdıqları Göyçə gölü Cənubi Qafqazın ən böyük göllərindən sayılır. Bu göl çox mənzərəlidir və suyu çirklənməyə məruz qalmayıb. Hələ Sovetlər dönəmində turistlər üçün cəlbedici məkan idi. Lakin ermənilərin hərisliyi ucbatından bu gölün resursları amansızcasına istismar edilsə də, çirkləndirilməsi o qədər də inandırıcı deyil. Çünki gölə hansısa güclü çirkab suları axıdılmır. Oranı çirkəndirəcək mədən işləri də yoxdur. Görünür, ermənilər beynəlxalq donor təşkilatlarından vəsait qoparmaq üçün belə bir yalan uydurublar. Nəticəsi də, göründüyü kimi, əksinə olub və turistlərin gəlişinə ciddi mənfi təsir göstərib. Bu isə xeyli pul itkisi deməkdir. Ermənistanın indiki çətin iqtisadi durumunda isə bu, heç də az itki deyil. Mənə elə gəlir ki, Sevan gölü ətrafında aparılan saxta kampaniya erməniləri beynəlxalq müstəvidə biabır edəcək”.
Vidadi ORDAHALLI
