“Keşikçi qala” sərhəd məntəqəsində baş vermiş məlum hadisə ilə bağlı Azərbaycan Prezidentinin ictimai-siyasi məsələlər üzrə köməkçisi Əli Həsənov açıqlama verib.
Ə.Həsənov qeyd edib ki, son aylar ərzində Azərbaycan və Gürcüstan arasında strateji münasibətlərin ruhuna tamamilə zidd olan bu tipli təxribatların artan xətt üzrə inkişafı müəyyən suallar doğurmaya bilməz: “Artıq hər iki tərəfin ekspertləri səviyyəsində müzakirələrdə belə fikirlər səslənir ki, görünür, iki qonşu dövlət arasında formalaşmış dostluq, strateji tərəfdaşlıq münasibətləri kimlərisə ciddi narahat edir və bu ölkələri, onların xalqlarını qarşı-qarşıya qoymağa çalışan qüvvələr var. Müzakirələrdə bu qüvvələrin kimliyi barədə də müəyyən fikirlər səsləndirilir”.
Prezidentin köməkçisi bildirib ki, baş verən hadisələrdə böyük güclərin geosiyasi maraqları və onların daxili siyasi qüvvələrlə manipulyasiya cəhdləri özünü aydın büruzə verir: “Həmçinin, istər Gürcüstanda, istərsə də Azərbaycanda əsasən xarici təsir altında olan bəzi maraqlı siyasi qruplar baş vermiş insidentdən yararlanmağa və hakimiyyət uğrunda mübarizədə belə həssas məqamlardan istifadə etməyə çalışırlar. Görünən odur ki, bəhs olunan qruplar mövcud vəziyyətdən bəhrələnmək istəyən üçüncü tərəflərin tarixi-dini stereotiplərlə manipulyasiyası üçün açıqdırlar və bəzən də bilərəkdən xarici təsir üçün könüllü alət rolunu oynayırlar. Biz əvvəllər də ölkəmizin strateji maraqlarına qarşı “beşinci kolon”un imkanlarından istifadə cəhdlərini ifşa etmişik və buna yol verməmək zərurəti haqqında danışanda məhz belə halları nəzərdə tuturuq”.
Göründyü kimi, dövlət rəsmisi yaranmış vəziyyətdə təxribat izlərinin olduğunu açıq mətnlə qeyd edir. Hesab olunur ki, bu cür təxribatların arxasında xarici güc mərkəzləri və onların təsiri altında olan, hər iki ölkədə hakimiyyətə gəlmək istəyən daxili qüvvələr dayanır. Əli Həsənov bu fikirləri ilə konkret hansı qüvvələri nəzərdə tutur?
Qabil Hüseynli: “Burada həm Azərbaycana qarşı olan qüvvələr, həm də Gürcüstanda hakimiyyəti ələ keçirmək istəyənlərin maraqları üst-üstə düşür”
Politoloq Qabil Hüseynli “Bakı-Xəbər”ə açıqlamasında bildirdi ki, Əli Həsənov hadisələrə çox doğru qiymət verib: “Bu gün Gürcüstanın özünü də təxribata çəkməkdə maraqlı olan qüvvələr var. Bilirsiniz ki, Rusiya ilə Gürcüstanın münasibətləri çox gərgindir. Bu proseslərdə Rusiyanın da barmağının olduğunu istisna etmirəm. Təbii ki, ermənilərin rolunu da danmaq olmaz. Ermənilər burada iki məqsəd güdürlər. Birincisi, Rusiyanın xoşuna gəlmək üçün Moskvanın planına uyğun şəkildə davranmaq. İkincisi, məqsəd Azərbaycana zərbə vurmaqdır. Belə qənaətdəyəm ki, bu məsələdə Ermənistandakı dairələr Rusiyanın təlimatına uyğun şəkildə hərəkət edirlər. Gürcüstanın daxilində olan ermənilər isə guya xristian təəssübünü çəkərək, bu məsələyə aktiv müdaxilə edirlər. Gürcüstanın daxilində də Rusiyaya meylli partiyalar var. Məsələn, Nino Burcanadzenin partiyası bu məsələdə aktiv rol oynayır. Bəzi dini qurumlar və din üzərində qurulan partiyaları da göstərmək olar. Buradan görünür ki, Qafqazda daha bir münaqişə ocağının yaranmasında maraqlı qüvvələr var. Həmin dini zəmində olan qurumların üzvləri və rəhbərliyində ermənilər az deyil. Burada həm Azərbaycana qarşı olan qüvvələr, həm də Gürcüstanda hakimiyyəti ələ keçirmək istəyənlərin maraqları üst-üstə düşür. Mən inanmıram ki, Saakaşvilinin partiyası bu məsələdə aktivlik etsin. Çünki onlar bizimlə əlaqələrin inkişafında maraqlıdırlar. Proseslərin gedişindən hiss edirik ki, yaranmış vəziyyətdən Azərbaycanın daxilində olan bəzi radikal dairələr də istifadə etməyə çalışırlar. Məsələn, Azərbaycan hakimiyyətini qətiyyətli olmamaqda günahlandırırlar. Sanki yanan odun üstünə benzin tökürlər. Məqsəd də bəllidir, ölkədə stabillik pozulsun, bunlar hakimiyyətə gələ bilsinlər. Mən hər iki ölkə rəhbərliyinin tutduğu təmkinli mövqeni alqışlayıram. Hakimiyyətlərin analoji davranışı bizim ölkələrimiz arasında olan səmimi dostluğa tam uyğundur. Belə olacağı təqdirdə, kənar qüvvələrin heç bir məkrli niyyəti baş tutmayacaq”.
Məhəmmədəli QƏRİBLİ
