Son zamanlar “Keşikçidağ” məbədi və yaxud da “David Qareci” məbəd kompleksi ilə bağlı olaylar xüsusi diqqət mərkəzində yer almağa başlayıb. Azərbaycan bu məsələni sakit və danışıqlar yolu ilə həll etməyə çalışsa da, gürcü tərəfində proseslərlə bağlı birmənalı mövqe müşahidə olunmur.
Məsələ burasındadır ki, bir hissəsi Azərbaycanın Ağstafa rayonu, digər hissəsi isə Gürcüstanın Saqareco rayonu ərazisində yerləşən “Keşikçidağ” məbədi barədə qonşu ölkədə bir-birinə zidd olan müxtəlif fikirlər yayılır. Burada bəzi siyasətçilər məbəd kompleksinin məhz Gürcüstana məxsus olması barədə fikirlər səsləndirir, əhalini də buna inandırmağa çalışırlar. Lakin sağlam düşüncəli siyasətçilər bunun əksini sübut etməklə yanaşı, əhalini sabitliyə və Azərbaycan-Gürcüstan dostluq münasibətlərinə zərər vurmamağa dəvət edirlər. Ancaq hiss edilir ki, proseslərin qızışmasında maraqlı olan üçüncü qüvvə də var. Hər iki ölkə rəsmilərinin verdiyi açıqlamalardan görünür ki, rəsmi dairələr münasibətlərin gərginləşməsində maraqlı deyillər. Bəllidir ki, yaranmış vəziyyət daha çox ermənilərin xeyrinə işləyir. Onlar maksimum dərəcədə iki ölkə arasındakı münasibətlərin öz məcrasından çıxmasına can atırlar. Ermənilərin Gürcüstan daxilində separatçı meylləri açıq büruzə verməsi, hətta həmin ölkənin təhlükəsizliyi üçün vurduğu ziyanlar göz qabağındadır. Təsadüfi deyil ki, bu yaxınlarda Tidflisdə baş qaldıran sərt anti-Rusiya aksiyalarının təşkilində erməni millətindən olan şəxslərin adı keçirdi. Bunu Gürcüstanın rəsmi dairələri də etiraf etdi. Bu baxımdan, “Keşikçidağ” məbədi ətrafında baş verən hadisələrdə erməni barmağının olmasını nə dərəcədə mümkün saymaq olar?
Arzu Nağıyev: “Ermənilər bundan bir vasitə kimi istifadə edərək iki xalq arasında nifaq salmağa çalışırlar”
Təhlükəsizlik məsələləri üzrə ekspert Arzu Nağıyev “Bakı-Xəbər”ə açıqlamasında bildirdi ki, iki ölkə arasında sərhədlərin delimitasiya və demarkasiyası prosesi tam bitənə qədər belə təxribatlar törənəcək: “Sərhədin böyük bir hissəsində bu proses başa çatıb. Hələlik həllini tapmayan hissələrdən biri məhz “Keşikçidağ” ərazisidir. Bu istiqamətdə ortaq komissiya işləyir, yaxın vaxtlarda məsələ öz həllini tapacaq. Bəli, razıyam ki, bu vəziyyətdən istifadə edən bir çox qüvvə var. Hətta Gürcüstanın özündəki siyasilər belə qəbul edirlər ki, bu təxribatların arxasında bir sıra xarici xüsusi xidmət orqanları və Ermənistanın fəaliyyəti dayanır. Bu məsələdə qızışdırıcı mövqe tutan qüvvə əsasən Leyboristlər Partiyasıdır. Həmin partiyanın liderini gürcülərin özləri belə təxribatçı adlandırırlar. Gürcüstanın daxili rəyində həmin partiyanı Rusiya və Ermənistanın təsiri altında olduğu bildirilir. Bizim dövlət qurumları səviyyəsində proseslərə lazımi müdaxilə olundu. Əsas məqsəd odur ki, ermənilər bundan bir vasitə kimi istifadə edərək iki xalq arasında nifaq salmağa çalışırlar. Eyni zamanda, çalışılır ki, Cənubi Qafqazda başqa bir müharibə ocağı yaradılsın. Ancaq Gürcüstan rəsmiləri də nəzərə almalıdırlar ki, həmin ərazilərdə etnik azərbaycanlılar yaşayırlar. Onlar təxribata çəkilsə, bu, Gürcüstanın daxili təhlükəsizliyi üçün yaxşı nəsə vəd etməyəcək. Vəziyyətlə bağlı bizim sərhədçilərimiz çox doğru mövqe tutdular, təxribata getmədilər. Orada bir atəş açılsaydı, bu, bütün dünyaya yayılacaqdı ki, sərhəddə atışma var. Bunu da əlində bayraq edən bəzi qüvvələr başqa provokasiyalara əl atacaqdılar. Hesab edirəm ki, ermənilər və başqa məkrli qüvvələr bu istəklərinə nail ola bilməyəcəklər. Çünki ölkələrimiz arasında strateji partnyorluq əlaqələri var və inkişaf edir. Gürcüstanın rəsmi qurumları belə, Azərbaycanın təmkinli davranışını alqışlayırlar. Sizi əmin edirəm ki, yaxın zamanlarda narazılıq tam aradan qaldırılacaq”.
Məhəmmədəli QƏRİBLİ
