Məlum olduğu kimi, iki gün əvvəl Dövlət Sərhəd Xidmətinin (DSX) Sərhəd Qoşunlarının “Şəmkir” sərhəd dəstəsinin “Keşikçi qala” sərhəd zastavasının xidməti ərazisində Gürcüstan vətəndaşları tərəfindən Azərbaycan sərhəd naryadına qarşı insident törədilib.
Gürcüstandan olan bir qrup şəxsin Azərbaycan Respublikası istiqamətində dövlət sərhədini pozaraq Azərbaycan ərazisində yerləşən Keşikçidağ mağaralar kompleksi yaxınlığında xidmət aparan sərhəd naryadına hücum etməsi və onları nalayiq ifadələrlə təhqir etməsi ilə bağlı Gürcüstanın ölkəmizdəki səfiri Xarici İşlər Nazirliyinə çağırılıb və ondan məsələ ilə bağlı müvafiq izahat istənib.
Gürcüstan-Azərbaycan sərhədində baş verən xoşagəlməz halla bağlı sosial şəbəkələrdə müxtəlif xarakterli fikirlər yer alıb. Bir sıra sosial şəbəkə istiafdəçiləri baş verən insidenti şişirdərək Azərbaycan sərhədçilərini qaralamaq yolu tutublar. Onlar sərhədçilərlə bağlı həqiqətə uyğun olmayan ifadələr işlədir, onlara qarşı ittihamlar irəli sürürlər. Sərhəddə Gürcüstan vətəndaşlarının törətdiyi insidentdən sui-istifadə edərək sərhədçilərimizə qarşı qara piar kampaniyası aparanların məqsədi aydındır. Belələri Azərbaycan sərhədçilərini gözdən salmağa xidmət edirlər. Halbuki, Azərbaycanın ərazi bütövlüyünün qorunmasında sərhədçilərin əməyi danılmazdır.
- Elçin Mirzəbəyli: “Baş verən insidentdən sui-istifadə edərək Azərbaycanın ayrı-ayrı dövlət qurumlarına, o cümlədən də Sərhəd Qoşunlarına qarşı qarayaxma kampaniyası aparanlar da çoxdur”
“Xalq cəbhəsi” qəzetinin baş redaktoru, politoloq Elçin Mirzəbəyli “Bakı-Xəbər”ə bildirdi ki, sosial şəbəkə qəhrəmanlarının əsas məqsədi sərhədçilərin əməyinə kölgə salmaqdır. “Sosial şəbəkələrdə “qəhrəmanlıq” etmək çox asandır. Burada bəzi adamlar məsələnin mahiyyətinə varmadan və heç bir arqumentə söykənmədən fikir bildirirlər. Belələri sosial şəbəkələrdə “qəhrəmanlıq” etməklə məşğuldurlar. Onlar məsələnin mahiyyətini dərk etmədən, sərhəddə baş verən insident zamanı Azərbaycan sərhədçilərinin bütöv bir təxribatın qarşısını aldığının fərqinə varmadan ucuz şoularla, qara piarla məşğul olurlar. Sözün doğrusu, bu məsələyə sosial şəbəkələrdə bir neçə tərəfdən yanaşmalar var. Burada baş verən insidentdən sui-istifadə edərək Azərbaycanın ayrı-ayrı dövlət qurumlarına, o cümlədən də Sərhəd Qoşunlarına qarşı qarayaxma kampaniyası aparanlar da çoxdur. Başqa bir qrup isə məsələyə emosional şəkildə yanaşır. Əlbəttə, hər iki qrupun münasibəti yolverilməzdir. Bir qisim insan isə hadisənin mahiyyətinə varan və onu qiymətləndirəndir. Təbii ki, sərhəddə gürcülər tərəfindən bizə qarşı arzuolunmaz bir insident baş verib. Bilirsiniz ki, Gürcüstan tərəfdə xaricdən idarə olunan müxtəlif qüvvələr var və onlar Azərbaycan-Gürcüstan münasibətlərinə xələl gətirməyə çalışırlar, bunun üçün də provokasiya üsullarına əl atırlar. İnsidenti törədən insanların xüsusilə öyrədilməsi qətiyyən şübhə doğurmur. Belə şəxslərə qarşı Gürcüstan tərəfin adekvat tədbir görməməsi də narahatlıq yaradan amildir. Düşünürəm ki, bu məsələlərdə tarixən dost, qardaş olan gürcü və Azərbaycan xalqları qara qüvvələrin onların arasına nifaq saldığını yaxşı başa düşürlər” - deyə E.Mirzəbəyli qeyd etdi.
E.Mirzəbəylinin sözlərinə görə, sosial şəbəkə “qəhrəmanları” unudurlar ki, Azərbaycan sərhədçiləri torpaqlarımızın ərazi bütövlüyü uğrunda canlarından belə keçiblər. Sərhəd pozucuları ilə mübarizədə sərhədçilərimizin göstərdiyi şücaətləri bəzi sosial şəbəkə istifadəçilərinin unutmasından təəssüfləndiyini deyən müsahibimiz bildirdi ki, neçə-neçə sərhədçimiz bu yolda şəhid olub.
- Giya Paçxataşvili: “Sosial şəbəkələrdə Azərbaycan sərhədçilərinin fəaliyyətinin qaralanmasına rəvac verən fikirlər yolverilməzdir”
Gürcü əsilli tanınmış şair-tərcüməçi Giya Paçxataşvili də Gürcüstan-Azərbaycan sərhədində baş verən insidentdən öz məqsədləri üçün istifadə edən şəxslərin olduğunu bildirdi. G.Paçxataşvili hesab edir ki, baş verən olayın sosial şəbəkələrdə bu şəkildə müzakirə edilməsi, ona müxtəlif biçim verilməsi düzgün deyil. “Baş verən hadisə təəssüf doğurur. Gürcü və Azərbaycan xalqları tarixən qardaş, dost olublar, bir-birinə xəyanət etməyiblər. Bu gün sosial şəbəkələrdə baş verən hadisədən sui-istifadə edən qüvvələr geniş fəaliyyətə keçiblər. Bu insident iki dövlət tərəfindən müzakirə ediləcək və günahkar cəzalandırılacaq. Sosial şəbəkələrdə Azərbaycan sərhədçilərinin fəaliyyətinin qaralanmasına rəvac verən fikirlər yolverilməzdir” - deyə G.Paçxataşvili qeyd etdi.
İradə SARIYEVA
