Azərbaycan Respublikasının müstəqilliyi uğrunda canını fəda etmiş şəhidlərimizin ailələrinə dövlət başçısı İlham Əliyev tərəfindən hər zaman xüsusi diqqət və qayğı göstərilir, onların mövcud problemlərinin aradan qaldırılması üçün mütəmadi olaraq tədbirlər həyata keçirilir.
Bəllidir ki, şəhid ailələrinə diqqət və qayğı Prezident İlham Əliyevin həyata keçirdiyi siyasi kursun mühüm istiqamətlərindən biridir. Prezident İlham Əliyev şəhid ailələrinin sosial problemləri ilə şəxsən maraqlanır. Bəllidir ki, bu günə qədər Vətən uğrunda şəhid olmuş şəxslərinə ailələrinə mənzil, avtomobil və maddi yardım kimi pul verilib. Məlumat üçün qeyd edək ki, bu günə qədər şəhid ailələri üçün 6654 mənzil, 6144 avtomobil, ötən il isə 626 mənzil verilib. Bu il həmin vətəndaşlara azı 800 mənzilin təqdim olunması nəzərdə tutulur. Şəhid ailələrinə və müharibə əlillərinə, Milli Qəhrəmanlara verilən Prezident təqaüdünün də məbləği ötən dövrdə mütəmadi artırılıb, bu qəbildən olan insanların uşaqlarına aylıq sosial müavinətin verilməsi təmin olunub.
Bununla yanaşı, Prezident İlham Əliyev şəxsən şəhid ailələri ilə görüşür, onlara daim dəstək olacağını bildirir. Şəhid ailələri də Prezidentin onlara göstərdiyi diqqəti qiymətləndirir.
Şəhid hərbi qulluqçuların yaxınları dövlətin və dövlət başçısının onlara göstərdiyi qayğı ilə bağlı fikirlərini “Bakı-Xəbər”ə bölüşdülər.
Qarabağ müharibəsində qardaşı Vilayət Kazımovu itirən Xalidə xanım bizimlə söhbətində qeyd etdi ki, Prezidentin şəhid ailələrinə göstərdiyi diqqət və qayğı sözlə ifadə olunası deyil: “Birdəfəlik yardımı almışıq. Düzdür, o pul mənim qardaşımı geri qaytarmayacaq. Ancaq qardaşımın ailəsinə dövlət tərəfindən qiymət verilməsi bir bacı olaraq məni qürurlandırır. Azərbaycan şəhidi unudulmur və onlar hər zaman xatırlanır”.
Quba rayonundan olan Xəzər İsgəndərov Füzulidə gedən döyüşlər zamanı qəhrəmanlıqla şəhid olub. X.İsgəndərovun ailə üzvü Xəyalə xanım bizimlə söhbətində qeyd etdi ki, ailə şəhid ailələrinə verilən birdəfəlik müavinəti alıb: "Həmin prosesdə də heç bir problemlə qarşılaşmamışam. İnanıram ki, dövlətimiz və Prezidentimiz bu günə kimi necə diqqətdə saxlayıbsa, bu münasibət eyni qaydada qalacaq”.
Xəyalə xanım onu da vurğuladı ki, Quba rayonundan olan bir qrup şəhid ailəsi Prezident İlham Əliyevə məktub ünvanlayıb. Məktub hərbi qulluqçuların vərəsələrinin 11 min manat məbləğində birdəfəlik ödəmə ilə təmin olunması ilə bağlı idi: “Vətənimizin ərazi bütövlüyü, dövlətimizin, müstəqilliyimizin qorunması uğrunda şəhid olmuş igid Azərbaycan övladlarının xatirəsinin əbədiləşdirilməsi ilə bərabər, onların ailələrinin sosial müdafiəsinin gücləndirilməsi üçün aparılan ardıcıl işlər Prezidentin şəhid ailələrinə böyük qayğısından irəli gəlir”.
Şəhid Azər Zeynalovun atası Ələddin Zeynalov bizimlə söhbətində qeyd etdi ki, Prezident şəhid ailələrinə daim diqqət və qayğı göstərir və şəhid ailəsi olaraq bu diqqət və qayğını hər zaman hiss edirlər: “Şəhid ailəsi olaraq bizə istənilən yerdə hörmət qoyulur. Bu o deməkdir ki, ölkəmizdə şəhidə hörmət qoyulur, onun ailə üzvləri dövlətin qayğısını hər sahədə hiss edirlər. Məlumdur ki, şəhid varislərinə birdəfəlik ödəmə verilir. 11 min manat birdəfəlik ödəmə sosial sıxıntılarımızın aradan qalxmasına gətirib çıxaracaq. Bu məbləğ maddi şəraitimizin yaxşılaşmasına az da olsa səbəb olacaq. Bununla yanaşı, hərbi qulluqçuların varislərinə mənzil verilir. Dövlətin qayğısını tək maddi yardımla deyil, eyni zamanda mənəvi də hiss edirik”.
Prezidentlə görüşdə iştirak edən şəhid ailələri
Yanvarın 28-də şəhid ailələrinin dövlət başçısı ilə görüşündə iştirak edən Xumar Nəbiyeva Qarabağ döyüşləri zamanı həyat yoldaşı Adil Nəbiyevi itirib. X.Nəbiyeva bizimlə söhbətində qeyd etdi ki, onun həyat yoldaşı Murovdağ əməliyyatı zamanı şəhid olub.
Onun sözlərinə görə, dövlət başçısı ilə görüşdə iştirak edib: “Prezident şəhid ailələrinin problemi ilə yaxından maraqlanıb. Cənab Prezident birdəfəlik ödəniş kartını şəxsən mənə də təqdim edib. Şəhid yaxını kimi dövlətin diqqətində olmağımız bizi qürurlandırır. Bu diqqət gənclərin vətənpərvərlik ruhunda böyüməsinə müsbət təsir edir. Azərbaycan dövləti Vətən yolunda şəhid olmuş şəxslərin ailələrinə yüksək dəyər verir”.
Dövlət başçısı ilə görüşdə iştirak edən Mərziyə Əliyeva bizimlə söhbətində bildirdi ki, həyat yoldaşı Əbülfət Əliyev Xocalı hadisələri zamanı qəhrəmanlıqla həlak olub: “Həyat yoldaşımın ölümündən sonra mərhum Prezident Heydər Əliyev onu “İgidliyə görə” medalı ilə təltif edib. Yoldaşımı itirdikdən sonra hər bir çətinliyimdə dövlətim daim yanımda olub. Dövlətin qayğısını hər zaman hiss etmişəm. Bu qayğını Prezidentlə görüşən zaman bir daha hiss etdim”.
“Qardaşımın nəşini almaqda Heydər Əliyevin xüsusi rolu olub”
Sədərək uğrunda gedən döyüşlərdə qəhrəmanlıqla şəhid olan Malik Əliyevin bacısı Kamilə xanım qəzetimizə açıqlamasında qeyd etdi ki, qardaşı şəhid olan gündən etibarən dövlətin qayğısını hiss edirlər: “Qardaşım Sədərək döyüşlərində iştirak edib. Malik 1992-ci ildə 18 yaşında olarkən döyüşmək üçün Sədərəyə gedib. May ayında isə Sədərək uğrunda gedən döyüşlərdə qəhrəmanlıqla şəhid olub. Onun nəşini 10 gün götürə bilmədik. Qardaşımın nəşini ermənilərdən almaqda bizə rəhmətlik Heydər Əliyevlə bərabər Türkiyənin sabiq prezidenti Süleyman Dəmirəl də kömək edib. Onların birgə səyi nəticəsində qardaşımın nəşini düşməndən ala bildik. O gündən bəri şəhid ailəsi olaraq dövlətin qayğısını hiss edirik. Səmimi münasibətə görə Prezidentə təşəkkür edirik. Hər kəs bilir ki, ölkə başçısı Vətən yolunda şəhid olmuş şəxslərə, eyni zamanda, onların varislərinə yüksək qiymət verir. Dövlətin şəhid ailələrinə hörmətlə yanaşması bizi sevindirir”.
Bərdə rayonunda yaşayan şəhid bacısı Naibə Behbudova bizimlə söhbətində qeyd etdi ki, qardaşı Səfiyar Qarabağ uğrunda gedən döyüşdə qəhrəmanlıqla şəhid olub. N.Behbudovanın sözlərinə görə, dövlət tərəfindən müharibə əlilləri ilə yanaşı, şəhid ailələrinə xüsusi münasibət bəslənir: “Şəhid varisləri, həmçinin, müharibə zamanı əlil olmuş şəxslərə mənzil, avtomobil verilir. Şəhid ailələri Prezidentin aylıq təqaüdü və müavinətlərlə təmin edilir. Sosial ödənişlərin həcmi mütəmadi artırılır. Bütün bunlar şəhid ailələrinin üzvləri üçün nəzərdə tutulan üstünlüklər, ali təhsil və ya orta ixtisas təhsili müəssisələrində ödənişli təhsil alan şəhid övladlarının təhsil haqqının dövlət hesabına ödənilməsi və digər təminatlar bir daha göstərir ki, ölkədə aparılan sosial siyasətdə şəhid ailələrinin rifah halının yaxşılaşdırılması başlıca hədəflərdən biridir”.
“Vətən yolunda şəhid olmuş balalarımızın xatirəsi yüksək ehtiramla anılır”
Hərbi qulluqçu Qamət Abbasovun vərəsəsi olan anası Yavər Abbasova dövlət başçısının şəhid ailələrinə göstərdiyi humanist addımı müsbət qiymətləndirdiyini bildirdi: “Oğlum tələbə olarkən, 1992-ci ildə könüllü olaraq cəbhəyə yollanıb, Mingəçevir batalyonunda xidmət edib. İntizamlı döyüşçü olan Qamət Abbasov Tərtər rayonunun on kəndinin azad olunması uğrunda gedən əməliyyatlarda iştirak edib. O, 20 yaşında olarkən, 1993-cü il fevralın 5-də Ağdərə uğrunda gedən döyüşlərdə qəhrəmancasına şəhid olub”.
Şəhid anasının sözlərinə görə, Vətən yolunda şəhid olmuş balalarımızın xatirəsi yüksək ehtiramla anılır, şəhid ailələrinin sosial müdafiəsi daim diqqətdədir: “Bizim də ailəmiz dövlətin yüksək diqqət və qayğısı ilə tam əhatə olunub. Şəhid hərbi qulluqçuların ailə üzvlərinin sosial müdafiəsinin yaxşılaşdırılması, o cümlədən birdəfəlik ödəmələrin verilməsi ilə bağlı Prezident İlham Əliyevin fərmanını oxuyarkən bir daha inandım ki, bu əvəzsiz qayğının əsl səbəbkarı ölkəmizdə şəhid adını uca tutan, torpaqlarımızın azad olunması üçün gecə-gündüz yorulmaq bilmədən çalısan Prezidentimizdir. Oğlumun xatirəsinin əbədiləşdirilərək adının 284 saylı məktəbə verilməsinə görə dövlətimizin başçısına minnətdaram. Şəhidlərimizin xatirəsinə, onların ailələrinə göstərdiyi yüksək diqqət və qayğıya görə bütün şəhid anaları adından Prezident İlham Əliyevə təşəkkür edirəm. İnanırıq ki, şəhidlərimizin qanı yerdə qalmayacaq, işğal olunmuş torpaqlarımız tezliklə azad ediləcək”.
Qarabağ uğrunda gedən döyüşlərdə şəhid olan Emin Əliyevin anası İbadət Əliyeva bildirdi ki, ona da digər şəhid varisləri kimi 11 min manat məbləğində birdəfəlik ödəmə verilib: “Sənədləri hazırlayıb Əmək və Əhalinin Sosial Müdafiəsi Nazirliyinə ərizə ilə müraciət etdim. Rahatlıqla birdəfəlik müavinəti aldım. Eləcə də şəhid ailəsi olaraq bizə hər ay 200 manat müavinət verilir. Şəhid ailələrinə göstərilən diqqət və qayğıya görə dövlət başçısı İlham Əliyevə təşəkkür edirəm”.
Şəhid anası İ.Əliyeva qeyd etdi ki, oğlu 1993-cü ildə Qarabağ uğrunda gedən döyüşlərdə iştirak edib: “Öncə Zaqatalada hərbi təlimdə iştirak edib. Buradan oğlumu Ağdərəyə göndəriblər. Sonra isə Ağdam uğrunda döyüşüb. Qəhrəmancasına apardığı mübarizə nəticəsində strateji əhəmiyyətli ərazilər işğaldan azad olunub. Döyüşlərdə fərqləndiyinə görə Eminin komandiri bizə dəfələrlə təşəkkür edib. 1993-cü ilin iyul ayında, 19 yaşında oğlum şəhid oldu. Oğlumun qəhrəmanlığı unudulmur. Bu gün onun xatirəsi Xəzər rayonu 234 nömrəli tam orta məktəbdə əbədiləşib. 234 saylı məktəb şəhid Emin Əliyevin adını daşıyır”.
Günel CƏLİLOVA
