Məhəmməd Əsədullazadə: “NATO yekun bəyannamədə ərazi bütövlüyümüzə verdiyi dəstəklə Paşinyanın Qarabağla bağlı diplomatik cəbhədə tutduğu mövqeyə zərbə vurdu”
Xəbər verildiyi kimi, NATO-ya üzv dövlətlərin Brüsseldə keçirilən zirvə toplantısı ölkəmiz üçün əlamətdar hadisələrlə yadda qaldı. Zirvə toplantısına qatılan Prezident İlham Əliyev səfər çərçivəsində bir sıra dövlət və hökumət başçıları, eləcə də nüfuzlu beynəlxalq təşkilatların rəhbərləri ilə səmərəli görüşlər keçirdi.
Tədbirlərdə çıxış edən Prezident Azərbaycan-NATO əməkdaşlığının perspektivləri və Dağlıq Qarabağ münaqişəsinin həlli ilə bağlı fikirlər səsləndirdi. Dövlət başçısının çıxışları və keçirdiyi mühüm görüşlər fonunda zirvə toplantısının yekununda iştirakçı dövlətlər tərəfindən bəyanat qəbul edilib. Toplantı iştirakçıları sənəddə növbəti dəfə Azərbaycanın ərazi bütövlüyünə, müstəqilliyinə və suverenliyinə dəstək ifadə etdilər.
Vurğulayaq ki, 2006-cı ildən başlayaraq, NATO-ya üzv dövlətlər bütün bəyanatlarda Azərbaycanın ərazi bütövlüyünə dəstək ifadə ediblər. Bu o deməkdir ki, artıq dünya birliyi, nüfuzlu beynəlxalq təşkilatlar Azərbaycanın mövqeyini yüksək qiymətləndirərək ölkəmizlə əməkdaşlığa ciddi önəm verirlər.
Son aylar ərzində reallaşan mühüm beynəlxalq iqtisadi layihələr, neft-qaz kəmərlərinin işə düşməsi Azərbaycanın Avropanın enerji təhlükəsizliyindəki rolunu artırıb. Avropa ölkələrinin rəhbərləri açıq şəkildə etiraf edirlər ki, Azərbaycanın liderliyi ilə həyata keçirilən transmilli enerji layihələri Avropanın enerji təhlükəsizliyinin təmin olunmasına mühüm töhfədir. Eyni zamanda, Azərbaycanla Avropa İttifaqı arasında paraflanmış "Tərəfdaşlıq prioritetləri” sənədi də ikitərəfli tərəfdaşlıq əlaqələrinin gələcək inkişafı üçün yeni imkanlar açır. Nəzərə almaq lazımdır ki, Avropa İttifaqı ölkələrin ərazi bütövlüyü, müstəqilliyi və suverenliyi prinsipini dəstəkləyirlər. Bu baxımdan sərhədlərin toxunulmazlığı məsələsinin Avropa İttifaqı tərəfindən xüsusi qeyd edilməsi, Avropa İttifaqının diplomatiya rəhbəri Federika Mogerininin Dağlıq Qarabağ münaqişəsinin tərəflərini ilkin şərtlər olmadan danışıqlara çağırması mühüm amil kimi xarakterizə edilir. Avropa İttifaqı Azərbaycanın dünyəvi və müasir cəmiyyət quruculuğu sahəsində müsbət təcrübəsini də yüksək qiymətləndirir. Amma Azərbaycanla bağlı dilə gətirilən xoş ifadələrin heç biri işğalçı Ermənistan barədə deyilmir.
Bir sözlə, Aİ və NATO zirvəsində Azərbaycanla bağlı müzakirələr, müsbət qərarların verilməsi Ermənistanda “məxməri inqilab” dalğasında gələn yeni hakimiyyətin Qarabağla bağlı planlarının alt-üst olmasında nə dərəcədə rol oynadı? Qeyd edək ki, onların Dağlıq Qarabağla bağlı bir sıra istəkləri var idi, amma onların heç biri reallaşmadı.
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “Ermənistanda etirazlar fonunda hakimiyyətə gələn Nikol Paşinyanın Qarabağ münaqişəsinin həlli ilə bağlı ziddiyyətli, hətta danışıqları fiaskoya aparan bəyanatları ilk gündən işğalçı ölkənin konfliktin həlli ilə bağlı mövqeyinin dəyişməz olduğunu büruzə verdi. Ümumiyyətlə, Ermənistanda hakimiyyətin dəyişməsi onların dövlət siyasətinin dəyişməsi demək deyil. Əsasən erməni-faşist millətçiliyinin bariz nümunəsi olan Qarabağ münaqişəsi bu siyasətin əsas prioritetidir. Hər hakimiyyətə gələn yeni sistem Qarabağ kartından yararlanmaqla, daxildə dəstək qazanmağa çalışır. Nikol Paşinyan da Serj Sarkisyanın bu kimi siyasətini davam etdirərək, sərsəm və konflikti alovlandıra biləcək açıqlamalar verməyə başladı. Onun NATO-nun zirvəsinə getməzdən əvvəl Gorusda əhali arasında çıxışında Qarabağla və ərazi bütövlüyü ilə bağlı məlum açıqlaması, demək olar, onu ifşa etdi. NATO yekun bəyannamədə ərazi bütövlüyümüzə verdiyi dəstəklə Paşinyanın Qarabağla bağlı diplomatik cəbhədə tutduğu mövqeyə zərbə vurdu. Həm NATO, həm də Avropa İttifaqının qəbul etdiyi bəyannamələrdə ölkəmizin ərazi bütövlüyünün tanınması, demək olar ki, Paşinyanın ilk yüksək səviyyəli xarici səfərini fiaskoya uğratdı. Onun bu səfərindən müəyyən gözləntilər var idi. Ancaq beynəlxalq birliyin ədalətli mövqeyi bu səfərin əhəmiyyətini kifayət qədər azaltdı. Paşinyan xarici səfərdə nə maliyyə yardımı aldı, nə də Qarabağla bağlı dəstək. NATO və Avropa İttifaqı artıq regionun ümumi təhlükəsizliyini, dövlətlərin ərazi bütövlüyü və toxunulmazlığını, sərhədlərin zorla dəyişdirilməməsini Helsinki Yekun Aktına uyğun olaraq qəbul edir. Rəsmi İrəvan bundan sonra da nə qədər çalışsa da, diplomatik cəbhədə ölkəmizlə ayaqlaşa bilməyəcək. Çünki beynəlxalq birliyin və maraqlı ölkələrin Cənubi Qafqaza diqqəti artır. Həmçinin, Azərbaycanın Qərblə iqtisadi və enerji əməkdaşlığı ölkəmizin nə qədər geoiqtisadi əhəmiyyət kəsb edən ölkə olduğunu göstərir. Hesab edirəm ki, Brüssel sammiti rəsmi İrəvanın xarici siyasətinin tənəzzülü olmaqla yanaşı, Azərbaycan xarici siyasətinin uğurudur”.
Vidadi ORDAHALLI
