Aydın Xan Əbilov: “Hesab edirəm ki, Azərbaycan Prezidentinin belə isti qarşılanmasının, bu cür mötəbər qurumlar tərəfindən Azərbaycan dövlətinin ərazi bütövlüyünün tanınmasının kökündə ölkəmizdəki mövcud tolerantlıq, multikulturalizm faktoru dayanır” Rafiq Kaşanlı: “Prezident İlham Əliyevin qazandığı zəfərin kökündə duran amillərdən biri də ölkəmizdə sağlam multikulturalizm, tolerantlıq mühitinin olmasıdır”
Gizlin deyil ki, bu gün beynəlxalq aləmdə Azərbaycan dövlətinin nüfuzu günü-gündən artır. Sevindirici haldır ki, ölkəmizə qarşı soyuq münasibət göstərən bəzi beynəlxalq qurumlar artıq öz mövqeyini dəyişir və Azərbaycanın haqq işinə dəstək verirlər.
Məlum olduğu kimi, Azərbaycan Respublikasının Prezidenti İlham Əliyev NATO üzvü dövlətlərinin Brüsseldə keçirilən zirvə toplantısında iştirak edib. NATO və Avropa Birliyi tərəfindən Azərbaycanın suverenliyini, ərazi bütövlüyünü dəstəkləyən sənəd qəbul edilib. Qeyd edək ki, Ermənistandan və onun rəsmi təmsilçisindən fərqli olaraq, Azərbaycan Respublikasının Prezidenti İlham Əliyevə, eləcə də Azərbaycana xüsusi münasibət bəslənib. Avropa Birliyinin və NATO-nun Azərbaycana isti, səmimi münasibət bəsləməsi, Prezident İlham Əliyevin tədbir çərçivəsində səmərəli görüşlər keçirməsi, ölkəmizə böyük siyasi zəfərlə dönməsi təqdirəlayiq haldır.
NATO və Avropa Birliyinin Azərbaycana, Prezident İlham Əliyevə isti münasibət göstərməsində, xüsusi münasibət sərgiləməsində ölkəmizdəki dinlərarası, mədəniyyətlərarası tolerantlıq, multikulturalizm mühitinin rolunun olduğu da danılmazdır.
Kulturoloq Aydın Xan Əbilov bizimlə söhbətində bildirdi ki, bu gün Azərbaycan cəmiyyətində hökm sürən multikulturalizm, çoxmədəniyyətlilik, bütün xalqların və dinlərin nümayəndələrinin dözümlülük şəraitində dinc və əminamanlıq mühitində yaşaması düsturunun müəllifi dahi şəxsiyyət Heydər Əliyevdir. Heydər Əliyevin yolunu davam etdirən ölkə başçısı İlham Əliyevin bu gün mövcud sahədə həyata keçirdiyi siyasət dünyanın bütün mütərəqqi qüvvələri tərəfindən müsbət qarşılanır.
Tarixən Azərbaycanda müxtəlif mədəniyyətlərin, dinlərin nümayəndələrinin azad və firavan şəkildə yaşadığını və ölkəmizin bir sıra dünya ölkələrinə nümunə olduğunu deyən A.X.Əbilovun sözlərinə görə, ölkə başçısının NATO və Avropa Birliyi rəsmiləri tərəfindən isti, səmimi qarşılanmasının kökündə həm ölkəmizdəki sabitlik, sülh və əminamanlıq faktoru, həm də mədəniyyətlər, dinlər arasındakı tolerant münasibət durur. “Azərbaycan Respublikasının Prezidenti İlham Əliyev bütün dünyada nüfuzlu bir dövlət xadimi kimi qəbul edilir. İndiyə qədər Prezdentimizin keçirdiyi bütün rəsmi görüşlər, apardığı danışıqlar Azərbaycana müsbət dividendlər qazandırıb, ölkəmizi dünyada tanıdıb, nüfuz sahibi edib. İlham Əliyevin uzaqgörən və məqsədyönlü fəaliyyəti sayəsində bu gün beynəlxalq qurumların bir çoxunun ölkəmizə münasibəti istiləşməyə başlayır. Bu gün beynəlxalq qurumlar özləri anlayırlar ki, Azərbaycan Cənubi Qafqazda lider dövlətdir, o yalnız iqtisadiyyatına və təbii resurslarına görə deyil, həm də multikulturalizm, tolerantlıq kimi bəşəriyyət üçün böyük dəyərə malik sərvətə sahib olduğu səbəbindən güclüdür. Son illər Azərbaycanda keçirilən mədəniyyətlərarası dialoq forumları, humanitar beynəlxalq tədbirlər ölkəmizdən bütün dünyaya sülh, əminamanlıq şöləsi kimi yayılıb. Azərbaycan bütün dünyada tolerantlığın, müxtəlif xalqların və mədəniyyətlərin bir-birinə mane olmadan, bir-birinə dayaq olaraq yaşadığı bir diyardır. Azərbaycan dövləti şəffaf, aydın siyasət aparır və açıq şəkildə dünyaya bəyan edir ki, dünyanın xilas açarı sülh, əminamanlıq, mədəni, dini, milli dözümlülükdədir. Azərbaycan dövləti beynəlxalq aləmdə artıq özünü nümunəvi bir ölkə kimi tanıdır. Beynəlxalq qurumların əməkdaşları ölkəmizə gələrkən buradakı multikulturalizmi, millətlər, dinlərarası müsbət münasibətləri, əlaqələri gözləri ilə görürlər. Azərbaycan Respublikası Prezidentinin NATO və Avropa Birliyinin Azərbaycanın ərazi bütövlüyünü, suverenliyini dəstəkləməsinə nail olması xalqımıza, dövlətimizə zəfər qazandırdı. Ölkə başçısı respublikamızda tolerant mühitin formalaşması sahəsində böyük addımlar atıb. Ölkəmizdə bu artıq dövlət siyasətinə çevrilib. Təbii ki, bu da nə NATO-nun, nə də Avropa Birliyinin diqqətindən yayınır. Bu baxımdan da hesab edirəm ki, Azərbaycan Prezidentinin belə isti qarşılanmasının, mötəbər qurumlar tərəfindən Azərbaycan dövlətinin ərazi bütövlüyünün tanınmasının kökündə ölkəmizdəki mövcud tolerantlıq, multikulturalizm faktoru dayanır” - deyə A.X.Əbilov bildirdi.
Ermənistanın baş naziri N.Paşinyanın sözügedən qurumlar tərəfindən soyuq qarşılanmasına gəlincə, A.X.Əbilov qeyd etdi ki, bu gün Ermənistan və onun siyasi liderləri həm Cənubi Qafqaz, həm də dünya üçün tolerantlığın, multikulturalizmin düşmənləri kimi qəbul edilir. Müasir Ermənistanın təkdinli və təkmillətli bir respublika olduğunu deyən A.X.Əbilovun sözlərinə görə, bu məqam isə nə NATO-nun, nə Avropa Birliyinin, nə də digər beynəlxalq qurumların xoşuna gəlir.
Mədəniyyətşünas Rafiq Kaşanlı da bizimlə söhbətində bildirdi ki, ölkə başçısının dövlətimiz adına qazandığı siyasi zəfərin kökündə duran amillərdən biri respublikamızdakı tolerant, multikultural mühitin mövcudluğudur: “Azərbaycan dünyada çox müsbət qəbul edilir. Son illər ölkəmiz multikulturalizmin, tolerantlığın mövcud olduğu nümunəvi bir dövlət kimi tanınır. Bunu biz demirik, bu sözlər beynəlxalq tribunalardan səsləndirilir. Bura gələn alimlər, siyasətçilər ölkəmizdəki millətlərarası, dinlərarası münasibətlərin başqa dövlətlər üçün nümunə olduğunu deyirlər. Prezident İlham Əliyevin qazandığı zəfərin kökündə duran amillərdən biri də ölkəmizdə sağlam multikulturalizm, tolerantlıq mühitinin olmasıdır”.
Namiq QULİYEV
