Silahlarımız erməniləri daha çox qorxutmağa başladı...
Ölkəmizdə keçirilən son hərbi parad və burada nümayiş etdirilən silahlar, əvvəldən də gözlənildiyi kimi, Ermənistanda böyük xof yaradıb. Paraddan artıq bir neçə gün keçsə də, burada nümayiş etdirilən silahlar hələ də qarşı tərəfdə əsas müzakirə mövzularından birini təşkil edir.
Erməni polkovnik, “Tiqran Mets” xüsusi hərbi təlim və tədris mərkəzinin direktoru Koryun Qumaşyan öncə diqqəti paradda Azərbaycan Prezidenti İlham Əliyevin səsləndirdiyi fikirlərə çəkir: “Azərbaycan Prezidenti İlham Əliyevin hərbi paradda son bəyanatı ciddi çağırışdır. Ermənistan isə susqunluğunu saxlamaqdadır. Azərbaycan Ordusunun son hərbi paradında müxtəlif ölkələrin nümayəndləri iştirak edirdi və İlham Əliyev düz onların qarşısında bu cür bəyanatla çıxış etdi”. Polkovnikin sözlərinə görə, Türkiyənin Bakıdakı hərbi paradda iştirakı müharibə olacağı təqdirdə bu ölkənin Azərbaycanın yanında olacağının əyani sübutdur: “Erməni tərəfi gecikməsin deyə ildırım sürətilə öz silahlarını modernləşdirməlidir. Hər hansı ölkənin bizim haqqımızda nə düşünməyindən asılı olmayaraq, bütün maliyyə resursları müdafiə sahəsinə yönləndirilməlidir. Müharibə qaçılmazdır. Hər kəs, böyükdən kiçiyə buna hazır olmalıyıq. Bu, 2016-ci ilin aprel hadisələrinin təkrarı olmayacaq. Faktdır ki, Azərbaycan Qarabağla Ermənistanı birləşdirən yolları - Arpa çayının yanında yerləşən Arpa kəndi və Basarkeçər şəhərini hədəf kimi seçib. Bütün bunlar onu göstərir ki, Azərbaycan daha genişmiqyaslı müharibəyə hazırlaşır. Rəsmi Bakı Arpa kəndi istiqamətində öz mövqelərini irəli çəkməklə Ararat, Keşişkənd və Arpa kəndini nəzarətdə saxlayır və bu reallıqdır. Bu hündürlük barədə erməni tərəfi deyir ki, bura texnika çıxarmaq mümkün deyil. Əslində isə ora texnika çıxarmaq lazım da deyil. Bura yalnız qarşı tərəfə vəziyyətə nəzarət etmək və əməliyyatlar zamanı düzgün taktiki gediş barədə göstəriş vermək üçün lazımdır”. K.Qumaşyan Ermənistan Müdafiə Nazirliyini kəskin tənqid edib: “Ermənistan Müdafiə Nazirliyi öz adını tam doğruldur, çünki yalnız müdafiə olunur. Gözləyirik ki, bizə hücum edəcəklər, biz də müdafiə olunaq. Müharibə genişmiqyaslı olacaq, bunu Azərbaycan Silahlı Qüvvələrinin ən müasir texnikası sübut edir. Ermənistanda ordu talan olunan zaman Azərbaycan hərbi texnikanın modernləşdirilməsi və ordu quruculuğu ilə məşğul idi”. Polkovnik həmçinin qeyd edib ki, Azərbaycan Ordusunun hazırlıq və döyüş qabiliyyəti yüksək səviyyədədir: “Parad zamanı mən Azərbaycan Silahlı Qüvvələrinin hərbi hazırlığını ciddi şəkildə izləyirdim. Silahlar yeni idi. Hətta sıra hazırlığı öz intizamı üzrə Koreya ordusunu xatırladırdı. Müharibədən keçən şəxsi bu cür vəziyyət çox ciddi narahat edir. Onlar yeni silahlarını göstərdi. Ehtimal ki, Azərbaycan payızda və ya yazda müharibəyə başlayacaq. Ona görə deyirəm, bizim vaxtımız yoxdur”.
Digər erməni ekspert Karen Vardanyan da narahatlığın kifayət qədər əsaslı olduğunu vurğulayır. O qeyd edir ki, Azərbaycan silahların bir qismini özü istehsal edir. Ermənistanda isə vəziyyət fərqlidir. Bu xüsusda ekspert Ermənistanın baş naziri Nikol Paşinyanın Avetik Kerobyanı Müdafiə Nazirliyinin Hərbi-sənaye komitəsinin sədri təyin etməsinə dair də maraqlı məqamlar açıqlayıb. Bildirib ki, müdafiə sənayesi dərhal Müdafiə Nazirliyinin tərkibindən çıxarılmalıdır. Çünki bu gün ordu hərbi sənayenin inkişafına mane olur, bilərəkdən deyil, sadəcə generallar həmişə əvvəlki müharibənin məntiqi ilə döyüşürlər: “Azərbaycan bizə qarşı İsrail istehsalı olan ən müasir pilotsuz sistemlər tətbiq edir, indi isə Azərbaycanda elə mərhələ yetişib ki, onların ən yeni texnologiyalarla yaradılan daha çox silahları var”. Karen Vardanyan Ermənistan ordusunun rabitə vasitələrinin çatışmaması üzündən apreldə böyük itkilər verdiyini vurğulayıb. O bildirib ki, aprel döyüşləri zamanı hətta Ermənistan prezidenti Serj Sarkisyan Dağlıq Qarabağ “ordusunun” baş qərargah rəisi olan general Movses Akopyanla adi mobil rabitə ilə əlaqə saxlayırdı. Və Vardanyan sensasion sayıla biləcək məlumat açıqlayaraq qeyd edib ki, Azərbaycanın pilotsuz kəşfiyyat təyyarəsi Sarkisyanın Akopyanla telefon danışıqlarını qeydə alıb, nəticədə general Movsesin yeri müəyyən olunub: “Ermənistan prezidenti Dağlıq Qarabağın Baş qərargah rəisi ilə mobil telefonla əlaqə yaratmağa çalışıb, həmin İsrail istehsalı olan pilotsuz təyyarə isə bu telefon danışığını ələ keçirib, Dağlıq Qarabağın hərbi rəisinin olduğu yerə zərbə endiriblər, amma sonuncunun bəxti gətirib və zərbədən yayınıb. Hətta bütün bunlardan sonra həmin adamı Ermənistan silahlı qüvvələrinin Baş qərargah rəisi təyin edirlər və o, yenə də rabitə vasitələrinə əhəmiyyət vermir. Bütün bunlardan sonra belə Ermənistanın yeni hakimiyyəti onu baş hərbi müfəttiş təyin edir. Bu adamın yeri zibillikdir, çünki Movses Akopyan hansı problemlərin olduğunu gördüyü halda iki il ərzində onları həll etməyib. Deməli, bu adam orduda qalmalı deyil, xüsusən də baş hərbi müfəttiş vəzifəsində”. Vardanyan Azərbaycanla irimiqyaslı müharibənin yaxınlaşması təhlükəsindən narahatlıq ifadə edib. Bildirib ki, Azərbaycanın hərbi-sənaye sahəsində Ermənistan üzərində açıq üstünlüyü var: “Biz isə özümüzün dağılıb çürümüş, tapdalanmış yanaşmalarımızla Azərbaycanı təxribata çəkirik ki, bizə hücum etsin”. Bütün bunlar erməni tərəfinin qorxusunu açıq ifadə edir.
Tahir TAĞIYEV
