Kənan Qubadzadə: “Xocalıya ədalət!” kampaniyasının keçirilməsi olduqca zəruridir”
Tarixən ermənilərin Azərbaycan torpağında gözü olub. Ermənilər Azərbaycan xalqına amansız zülmlər ediblər. Ermənilərin azərbaycanlılara qarşı törətdiyi soyqırımlardan ən dəhşətlisi 1992-ci il fevralın 26-da Xocalıda baş verib. Xocalı faciəsi zamanı onlarla vətəndaşımız əsir düşüb və öldürülüb, əsgərlərimiz şəhid olublar.
Xocalı soyqırımının dünyada tanıdılması istiqamətində lazımi işlər görülür. Qeyd edək ki, bu gün ayrı-ayrı dünya ölkələri, nüfuzlu beynəlxalq qurumlar bu faciəni soyqırım kimi qəbul edirlər.
2008-ci il mayın 8-də Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət!” beynəlxalq təbliğat və məlumatlandırma kampaniyasına start verilib. Artıq 10 ildir “Xocalıya ədalət!” kampaniyası dünyanın 50-dən çox ölkəsində uğurla həyata keçirilib.
Maraqlıdır, bu illər ərzində Xocalı soyqırımı ilə bağlı illik ənənəvi keçirilən kampaniyalar hansı nəticələri əldə edib?
“Gənclər Mərkəzi” İctimai Birliyinin icraçı direktoru Kənan Qubadzadə “Bakı-Xəbər”ə açıqlamasında qeyd etdi ki, “Xocalıya ədalət!” kampaniyasının keçirilməsi olduqca zəruridir: “Azərbaycan tərəfindən bu kampaniyanın uğurla davam etdirilməsi üçün hər bir addım atılır. Amma, eyni zamanda, hesab edirəm ki, bütün soydaşlarımız bu məsələdə fəal olmalıdırlar. “Xocalıya ədalət!” kampaniyası artıq öz nəticəsini verməkdədir. Artıq bəzi xarici ölkələr ermənilərin Xocalıda törətdiyi cinayəti dövlət səviyyəsində soyqırım kimi tanıyıblar. Bəzi ölkələrin tarix dərsi kitablarına Xocalıda törədilmiş soyqırım haqqında məlumatlar daxil olunub. Bir çox ölkələrdə sərgi və konfranslar keçirilib. Hər il dünyanın müxtəlif ölkələrində yürüş və simpoziumlar təşkil olunur. Hesab edirəm ki, bu illər ərzində “Xocalıya ədalət!” kampaniyası çərçivəsində görülən işlər faydalıdır və Azərbaycan həqiqətlərinin dünyada tanıdılmasında olduqca əhəmiyyətlidir. Bu işlər davam etdirilməlidir”.
K.Qubadzadənin sözlərinə görə, dünyanın müxtəlif şəhərlərində Xocalı soyqırımı mövzusunda keçirilən elmi-praktik konfranslar, müxtəlif rəsm sərgiləri, fotosərgilər Azərbaycan xalqı ilə dünya xalqları arasında mədəni, mənəvi körpü yaradır. Eyni zamanda, incəsənətin, mədəniyyətin dili ilə Xocalı soyqırımı beynəlxalq ictimaiyyətə çatdırılır.
Günel CƏLİLOVA
