Aqşin Əliyev: “İnanmıram ki, prezidentliyə namizədin təklif etdiyi dialoqla bunlardan qurtulmaq mümkün olsun”
Ermənistanda 4-cü prezidentliyə real namizəd olan Armen Sarkisyan ölkəsindəki acınacaqlı vəziyyət barədə fikir bildirib. Ermənistan mətbuatının yazdığına görə, o, keçirdiyi görüşlərdən birində deyib ki, ölkəni bürüyən problemlərin kökləri elə dərindir ki, onların həllinə kompleks yanaşma lazımdır:
“Bunun üçün etimad mühitini gücləndirmək, vətəndaş cəmiyyəti institutunu rekonstruksiya etmək və dəqiq proqramlar ortaya qoymaq lazımdır. Bu, demokratiyadan tutmuş, korrupsiya ilə mübarizəyə qədər olan sahələri əhatə etməlidir”.
Armen Sarkisyan çıxışının sonunda deyib ki, milli dialoq olmadan ölkənin heç bir problemini həll etmək mümkün deyil: “Bunun vaxtı çatıb”.
Qeyd edək ki, Ermənistanın problemləri yalnız bununla bitmir. Ölkədəki iqtisadi vəziyyət də katostrofikdir.
Ermənistan yeni ilə iri məbləğli dövlət borcu ilə başlayıb, təkcə yanvar ayında bu borc 123,5 milyon artaraq ayın axırına 6 milyard 898 milyon ABŞ dolları təşkil edib.
Bu il Ermənistan xaricdən 360 milyon dollar borc götürməyi planlaşdırır. Bu məbləği ötənilki göstərici ilə müqayisə edən erməni nazirlərdən biri deyib ki, ötən il Ermənistanın borcu 832,5 milyon dollar artıb. Son iki ildə isə ümumilikdə ölkə 1,7 milyard dollar borcun altına girib.
Bütün bunlar Ermənistanda ciddi siyasi və iqtisadi böhranın olduğundan xəbər verirmi?
Ekspert Aqşin Əliyevin sözlərinə görə, Ermənistandakı dərin böhranın olduğunu hamı gözəl bilir: “Ermənistan ciddi iqtisadi və siyasi böhran içərisində çabalayır. Aparılan araşdırmalara görə, əhalinin vəziyyəti 2018-ci ildə ötən illə müqayisədə 10 faizdən çox pisləşəcək. 2018-ci il üçün nəzərdə tutulan dövlət büdcəsində təqaüd, müavinət və minimum əməkhaqqı da artırılmayacaq. Bu azmış kimi, hələ səhiyyə sahəsinə ayrılan xərclər 5 milyard dram, yəni yüz milyon dollara yaxın, sosial xidmətə 300 milyon dram, təhsilə ayrılan xərclər isə 700 milyon dram ixtisar ediləcək. Ölkənin xarici borcları artıb, qiymətlər isə bahalaşıb. Bütün bunlar isə Ermənistan əhalisinin həyat şəraitinin bu il daha da ağırlaşacağını deməyə əsas verir. İşğalçılıq siyasəti ilə özünü təcrid vəziyyətinə salmış Ermənistanın mövcud real mənzərəsi isə belədir: iqtisadi tənəzzül, aclıq və səfalət, vətəndaşların öz gələcəklərinə və dövlətlərinə inamsızlığı. Həmişə büdcəsini xarici ianələr, diaspor təşkilatlarından diləndiyi maliyyə hesabına doldurmağa çalışan Serj Sarkisyan hökuməti artıq erməni diasporunun da etimadını itirib. Diaspor liderləri investorları ayıq-sayıq olmağa və Ermənistana sərmayə qoymamağa çağırıblar. Ölkədəki siyasi böhran da dərindir. Yerli Ermənistan əhalisinin Dağlıq Qarabağdan gedib dövləti qəsb etmiş hərbi cinayətkarlara mənfi münasibəti var. Onları oğru və bandit kimi tanıyırlar. Serj Sarkisyan elə zənn edir ki, Armen Sarkisyan kimi, əslən İrəvandan olan bir ziyalı tipajı hakimiyyətə gətirməklə ölkədə əminamanlıq yarada biləcək. Ancaq problemin kökü çox dərindir. İnanmıram ki, prezidentliyə namizədin təklif etdiyi dialoqla bunlardan qurtulmaq mümkün olsun”.
Məhəmmədəli QƏRİBLİ
