Məhəmməd Əsədullazadə: “Bu, qurumun Azərbaycana verdiyi xüsusi əhəmiyyətdən irəli gəlir”
Azərbaycanda dövlət və cəmiyyət həyatının müxtəlif sahələrində iqtisadi, sosial, mədəni islahatlarla yanaşı, zaman-zaman hüquqi islahatlar da aparılır. Ümumilikdə, hüquqi islahatlar hüquqi, demokratik, dünyəvi dövlət quruculuğunun prioritet prinsiplərindəndir. Artıq bu gün inamla demək olar ki, Azərbaycanın ötən müddət ərzində bu sahədə qazandığı nailiyyətlər, ilk növbədə, hüquqi islahatların düzgün istiqamətləndirilməsi və səmərəli həyata keçirilməsi ilə sıx bağlıdır.
Azərbaycan dövləti tərəfindən islahatlar, o cümlədən, hüquqi islahatlar bu gün də davam etdirilir. Aparılan məhkəmə-hüquq islahatları, yeni təsisatların yaradılması, ədliyyə və məhkəmə-hüquq sisteminin təkmilləşdirilməsi vətəndaş cəmiyyətinin inkişafını təmin edən tədbirlərdir. Bu sahədə qanunvericiliyin təkmilləşdirilməsini, yeni məhkəmələrin və məhkəmə təsisatlarının yaradılmasını, hakimlərin sayının artırılmasını, elektron məhkəmə-informasiya sisteminin tətbiqi və infrastrukturun müasirləşdirilməsi üzrə görülən tədbirləri qeyd etmək olar. Cəza siyasətinin humanistləşdirilməsinə dair ölkə başçısının 2017-ci il 10 fevral tarixli Sərəncamı bu istiqamətdə müstəsna əhəmiyyətə malikdir.
Bununla yanaşı, görünən odur ki, Avropa Şurası da Azərbaycanda aparılan hüquqi islahatları dəstəkləyir. Avropa Şurasının İnsan hüquqları siyasəti və inkişaf departamentinin rəhbəri Mixail Lobov və Avropa Şurasının Azərbaycandakı Ofisinin yeni rəhbəri Zoltan Hernyes ədliyyə nazirinin müavini Azər Cəfərovla görüşdə bildiriblər ki, Azərbaycanın məhkəmə-hüquq sahəsindəki nailiyyətləri Avropa Şurasının rəhbərliyi tərəfindən yüksək qiymətləndirilir.
Bütövlükdə, Avropa Şurasının ölkədə aparılan hüquqi islahatları dəstəkləməsini ekspertlər necə dəyərləndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna müsbət prizmadan yanaşdı: “Avropa Şurası ilə Azərbaycan arasında siyasi əməkdaşlıq daim yüksək səviyyədə olub. Azərbaycanın ərazi bütövlüyü ilə bağlı qəbul edilən qətnamələr və ölkəmizin ədalətli mövqeyi dəstəklənib. Müəyyən qısa müddət ərzində ikitərəfli əlaqlərdə “soyuq küləklər” əsməsinə baxmayaraq, nəticədə Strasburq və Bakı problemləri arxada qoyub. Cari məsələlərin həlli və davamlı əlaqaləri inkişaf etdirmək üçün əməkdaşlığı yüksək səviyyədə saxlamağa qərar veriblər. Avropa Şurasının baş katibliyi və komitə rəhbərliyinin ölkəmizlə əməkdaşlıq üçün verdiyi olumlu mesajlar hesab edirəm ki, qurumun Azərbaycana xüsusi əhəmiyyət verməsindən irəli gəlir. Bu gün ölkəmiz Avropanın enerji siyasətinin şaxələndirilməsində və təhlükəsizliyində mühüm rol oynayan əsas tərəfdaş ölkədir. Görünür, Avropa Şurası bu və ya digər məsələlərə görə Azərbaycanla əməkdaşlığı genişləndirmək siyasi kursunu davam etdirir. Qeyd edim ki, hüquqi sahədə islahatların aparılması Avropa Şurası qarşısında götürülən öhdəliklərə cavab verdiyi üçün, Azərbaycanda bu sahədə aparılan islahatlar bu qurum rəsmisi tərəfindən yüksək dəyərləndirlir. Ümumiyyətlə, Avropa Şurası insan hüquqları, siyasi və demokratiya sahələri üzrə ixtisaslaşmış təşkilatdır. Bu quruma üzv olan ölkələr mütləq şəkildə öhdəlikləri yerinə yetirməlidirlər. Təbii ki, ölkəmiz də bu qurumun üzvü olduğundan, üzərinə götürdüyü hüquqi islahatları yekunlaşdırmalıdır. Bu sahədə aparılan islahatlar qurumla ölkəmiz arasında gələcək perspektivdə də əlaqələri genişləndirəcək. Avropa Şurası Azərbaycan həqiqətlərini Avropa məkanına çıxarmağa və maraqlarımızı qorumaq üçün əlverişli bir tribunadır. Bu tribunadan istifadə etmək və əməkdaşlıq günün tələbidir. Düzdür, ölkəmizdə hüquqi sahədə islahatlar davam edir və burada insan hüquqları əsas prioritet olmalıdır. Avropa Şurası ilə əməkdaşlığa kölgə sala biləcək məsələlər kənara qoyulmalıdır. Mixail Lobovun Avropa Şurasının bu mövqeyini açıqlaması təşkilatla Azərbaycan arasında “buzların əriməsi” deməkdir”.
Cəmilə QARAYEVA
