Mehman Muradlı: “Həmin məhkəmə qərarlarından doğacaq obyektiv nəticələr bizə gələcəkdə böhtan atmaq istəyənlər üçün də bir “Domokl qılıncı” rolunu oynayacaq”
Məlum olduğu kimi, Milan Məhkəməsinin 2018-ci il 13 fevral tarixli qərarına əsasən, ötən ilin ortalarında məlum anti-Azərbaycan mərkəzlərin və şəbəkələrin sifarişi ilə Mütəşəkkil Cinayətkarlıq və Korrupsiyaya Qarşı Jurnalistika Layihəsi (OCCRP) adlı qurum vasitəsilə yayılmış məlumatların əsassız, qərəzli olduğu təsdiqləndi.
Azərbaycan Prezidentinin ictimai-siyasi məsələlər üzrə köməkçisi Əli Həsənov Azərbaycanla korrupsiya əlaqələrində ittiham olunan, AŞ PA-da Avropa Xalq Partiyası deputatlar qrupunun sədri olmuş Luka Volonte barədə İtaliyanın Milan Məhkəməsinin bəraət qərarını şərh edib:
"Qeyd edim ki, anti-Azərbaycan mərkəzlər və şəbəkələr bu kimi çoxsaylı feyk-məlumatlarla həm Azərbaycan dövlətini, həm də ölkəmizə dost münasibəti bəsləyən, onunla bağlı pozitiv fikirlər bildirən tanınmış şəxsləri - ictimai-siyasi xadimləri, ekspertləri, jurnalistləri və s. hədəfə götürmək və qınaq obyektinə çevirmək istəyirdilər. Təsadüfi deyil ki, həmin vaxt OCCRP-nin “Azərbaycanın pulyuyan maşını” adlı qondarma materialı dünya mediasında sürətlə tirajlandı, məsələ ilə ayrı-ayrı ölkələrin rəsmi instansiyaları maraqlandı və orada adları keçən şəxslər, o cümlədən də guya Azərbaycandan 2 milyon 640 min dollar almış AŞ PA-da Avropa Xalq Partiyası deputatlar qrupunun sədri olmuş Luka Volonte barədə xüsusi araşdırma başladıldı.
Xatırladım ki, həmin dövrdə də biz açıqlama yayaraq OCCRP-nin imzası ilə dövriyyəyə buraxılmış bu iddiaların qərəzli, əsassız, təxribat xarakteri daşıdığını və Azərbaycana qarşı bəlli dairələr tərəfindən təşkil edilmiş çirkin qarayaxma kampaniyasının tərkib hissəsi olduğunu bildirmişdik. Göründüyü kimi, Milan Məhkəməsinin obyektiv araşdırması da bunu bilavasitə təsdiqlədi".
Əli Həsənov deyib ki, Azərbaycan hakimiyyəti dövlətin və onun tərəfdaşlarının imicini ləkələmək məqsədilə həyata keçirilən belə qarayaxma kampaniyasının təşkilatçıları və icraçıları haqqında kifayət qədər məlumatlıdır və yalnız Milan Məhkəməsinin qərarı ilə kifayətlənmək niyyətində deyil: "Biz bu çirkin əməldə əli olanlarla bağlı müvafiq qaydada hüquqi prosedurlara başlamaq niyyətindəyik. Məsələ ilə bağlı artıq Azərbaycanın aidiyyəti dövlət orqanlarına tapşırıqlar verilib. Hesab edirik ki, demokratiya və söz azadlığı pərdəsi altında gizlənərək beynəlxalq miqyasda ayrı-ayrı dövlətlərə, qurumlara, şəxslərə qarşı kampaniya təşkil edənlər bunun məsuliyyətini də dərk etməli və cavabdehlik daşımalıdırlar".
Göründüyü kimi, Əli Həsənov Azərbaycan dövlətinin yalnız Milan Məhkəməsinin çıxardığı qərarla kifayətlənməyəcəyini və əlaqədar qurumlara bu şər-böhtan kampaniyasına qarşı prosesə başlamaqla bağlı tapşırıq verildiyini bildirib. Bu istiqamətdə Azərbaycan hansı addımları ata bilər?
Hüquqşünas Mehman Muradlı qəzetimizə açıqlamasında bildirdi ki, bunu Azərbaycanın qələbəsilə yanaşı, həm də haqqın-ədalətin öz yerini tapması, şantajçıların isə ifşa olunması kimi dəyərləndirmək olar: “Bilirsiniz ki, Azərbaycan bu ittihamlara təsadüfən tuş gəlməmişdi. Məqsəd bu cür şantaj vasitələrilə ölkəmizə öz şərtlərini diqtə etmək olub. Ancaq biz bu cür təzyiqləri dəf etməyi artıq öyrənmişik. Bilirsiniz ki, Milan Məhkəməsində şər və böhtan kampaniyasının qurbanına çevrilmiş, Avropanın tanınmış siyasətçilərindən olan Luka Volontenin “çirkli pullar”ın yuyulması ilə bağlı 2 ildən çoxdur gedən məhkəmə prosesi başa çatıb. Luka Volonte Milan Məhkəməsinin qərarı ilə bəraət alıb. İddia olunurdu ki, guya Volonte Azərbaycan hökumətindən böyük miqdarda rüşvət alıb
Məlum “jurnalist” araşdırması yalnız bununla kifayətlənmirdi. Orada Azərbaycanın bir dövlət kimi imicinə xələl gətirə biləcək çoxsaylı ittihamlar yer alıb. “Volonte işi” onların bir parçasıdır. Bilirsiniz ki, hüquqda bəraət almağın başqa aspektləri də var. Yəni günahı sübuta yetirilməyən şəxs ona bu şəri atanlardan təzminat tələb edə bilər. Şübhə etmirəm ki, edəcək də. Həmin iş üzrə zərərçəkənlərdən biri də Azərbaycan dövlətidir. Məlum böhtan kampaniyasında hədəfə alınan xarici siyasətçilərin çoxu isə ölkəmizin dostları olub. Məqsəd həm də başqa siyasətçiləri Azərbaycanla əməkdaşlıqdan çəkindirməyə hesablanıb. Əli Həsənovun fikirlərindən bu nəticəni çıxarmaq olar ki, Azərbaycan bu sərsəm iddiaların tamamilə darmadağın olması və günahkarlara layiqli cəzanın verilməsində maraqlıdır. Dövlətin resursları bu işə cəlb edilibsə, ciddi nəticələr olacaq. Düşünürəm ki, bütün ittihamlar üzrə məhkəmə davaları açmaq lazımdır. Əminəm ki, həmin məhkəmə qərarlarından doğacaq obyektiv nəticələr bizə gələcəkdə böhtan atmaq istəyənlər üçün də bir “Domokl qılıncı” rolunu oynayacaq”.
Məhəmmədəli QƏRİBLİ
