Elşən Həsənov: “Azərbaycan Əfqanıstana, onun müasir quruluşuna və legitim hakimiyyətinə hər cür dəstək verir”
Azərbaycan Prezidenti İlham Əliyev Bakıda “Asiyanın Qəlbi” - İstanbul Prosesi çərçivəsində “Güclü Asiyanın Qəlbi regionu naminə təhlükəsizlik və bağlılıq” mövzusunda VII nazirlər konfransında çıxışı zamanı deyib ki, Azərbaycan “Asiyanın Qəlbi” - İstanbul Prosesini Əfqanıstanda sülhün, barışığın, təhlükəsizliyin və iqtisadi inkişafın əldə edilməsi istiqamətində dialoq və əməkdaşlıq üçün dəyərli mexanizm hesab edir: “2012-ci ildə prosesə qoşulandan bəri biz bu çoxtərəfli platformada fəal şəkildə iştirak etməkdəyik”.
Prezident deyib ki, beynəlxalq hüququn norma və prinsiplərinə hörmət və riayət edilməsi, xüsusilə suverenlik, ərazi bütövlüyü və dövlətlərin beynəlxalq səviyyədə tanınmış sərhədlərinin toxunulmazlığı, suveren bərabərliyə hörmət və daxili işlərə qarışmama regional və beynəlxalq təhlükəsizliyin təmin edilməsində təməl olmaqla, sabitlik və yəqinlik təmin edir: “Bu prinsiplər İstanbul Prosesi çərçivəsində bizim münasibətlərimiz və əməkdaşlığımız üçün zəmin təşkil edir və bu, “Asiyanın Qəlbi” bəyannamələrində bir daha vurğulanmışdır”.
Azərbaycan Prezidenti əlavə edib ki, Əfqanıstanın rifahı və tərəqqisi iqtisadi artım və regional əməkdaşlıq məsələləri ilə qarşılıqlı şəkildə bağlıdır və regionun ümumi təhlükəsizlik mühitindən asılıdır: “Çox önəmlidir ki, Əfqanıstanın yenidən qurulması və iqtisadi inkişafı məsələlərinə səylərimizin yönəldilməsi ilə yanaşı, biz ölkənin indiyədək əldə etdiyi tərəqqini qoruyub saxlamaq üçün Əfqanıstanın üzləşdiyi təhlükəsizlik çağırışlarını həll etməkdə davam edirik. Belə ki, terrorizm, radikal ekstremizm və separatizmin bütün forma və ifadə vasitələrindən qaynaqlanan təhlükəsizlik təhdidləri ilə mübarizədə birgə səylərimizin davam etdirilməsi və bu məqsədlə regional əməkdaşlığın artırılması vacibdir”.
Dövlət başçısı qeyd edib ki, Azərbaycan ikitərəfli müstəvidə, eləcə də idarəçilik, hərbi, hüquq- mühafizə və minaların təmizlənməsi sahələri üzrə təlimlər vasitəsilə Əfqanıstanla öz təcrübəsini bölüşməyə sadiqdir: “Biz Beynəlxalq Təhlükəsizliyə Dəstək Qüvvələrindən (İSAF) sonrakı Qətiyyətli Dəstək Missiyasına (RSM) qüvvə, multimodal tranzit, təlim və maliyyə yardımı təchiz etməklə töhfə veririk.
Şəffaf, korrupsiyaya və rüşvətə dözümsüz olan Azərbaycanın Vətəndaşlara Xidmət və Sosial İnnovasiyalar üzrə Dövlət Agentliyi – “ASAN xidmət” Əfqanıstanla fəal şəkildə əməkdaşlıq edir. Bu əməkdaşlıq vətəndaşlara ictimai və fərdi xidmətlər göstərən “bir pəncərə” mərkəzlərinin yaradılması ilə Əfqanıstanın ictimai xidmətlərinin inkişaf etdirilməsinə yönəlmişdir”.
İlham Əliyev çıxışının davamında da Əfqanıstanla bağlı geniş nitq söyləyib. Ölkə başçısının Əfqanıstan mövzusuna belə önəm verməsi Azərbaycanın dünyada terror və radikalizmlə mübarizə aparan ölkə kimi imicinin möhkəmlənməsində necə rol oynayır?
Azərbaycan Sosialist Partiyasının sədri Elşən Həsənov qəzetimizə bildirdi ki, Əfqanıstan unikal bir ölkədir: “Demək olar ki, daim dünyanın bütün aparıcı ölkələrinin maraqları həmin ölkədə toqquşub. İngilislər oradan məğlub olub çıxdılar. Sonra SSRİ müdaxiləsi oldu. Sovetlər də həmin bataqlıqda çox çabaladılar, nəticəsi olmadı. 20 ilə yaxındır ki, beynəlxalq koalisiya orada modern ölkə qurmaq uğrunda çarpışır. Amma görürsünüz ki, nəticələr çətin əldə edilir. Asiyanın çox mühüm strateji çoğrafiyasında yerləşən bu ölkəyə radikal cərəyanlar geniş ayaq açıb. Məhz bu ideologiyaların təsirinə düşən bəzi əfqanlar modernizmə qarşı çıxır, hətta bu yolda kamikadzelik belə edirlər. Azərbaycan Əfqanıstana, onun müasir quruluşuna və legitim hakimiyyətinə hər cür dəstək verir. Əfqanıstana aparılan humanitar yüklərlə bağlı bizim ölkədən tranzit kimi istifadə edilir. Ölkəmizin sülhməramlı hərbi kontingenti uzun illərdir Əfqanıstanda xidmət keçir. Bakının evsahibliyi etdiyi “Asiyanın Qəlbi” - İstanbul Prosesi”nin gedişindən isə göründü ki, həmin müsəlman ölkəsində sülhün, əminamanlığın bərqərar olması üçün ölkəmiz diplomatik səylərini də əsirgəmir. Ölkə başçısının tədbirdə Əfqanıstanla bağlı çıxışında bu barədə ətraflı danışıldı. Hesab edirəm ki, ölkəmizin bu cür mövqeyi bizim terror və radikalizmlə mübarizədə rolumuzun danılmaz olduğuna möhür vurmuş olur”.
Məhəmmədəli QƏRİBLİ
