Xəzər Teyyublu: “Ermənistanın atdığı son addımlar və buna verilən reaksiyalar belə deməyə əsas verir ki, həmin ölkəni gələcəkdə yaxşı nəsə gözləmir”
Rusiyanın NTV telekanalının "Görüş yeri" proqramında Ermənistanın “Şərq Tərəfdaşlığı” təşəbbüsü çərçivəsində Avropa İttifaqı ilə tərəfdaşlıq razılaşması imzalaması müzakirəyə çıxarılıb. Proqramda Ermənistanın guya müstəqil olduğunu göstərmək istədiyi vurğulanıb. Müzakirə zamanı Ermənistanla bağlı kəskin fikirlər səsləndirilib. Hətta bu ölkə "gəzəyən qızla" müqayisə olunub.
Öncədən planlı formada hazırlanan proqramda faktlar təqdim olunub. Aparıcılar Rusiyanı Ermənistanın təhlükəsizlik qarantı adlandırıblar. Qeyd olunub ki, Ermənistan iqtisadiyyatı Rusiyadan asılı vəziyyətdədir.
Emənistanla Rusiyanın ticarət dövriyyəsi 1 milyard, birbaşa investisiyaları isə 4 milyard dollar təşkil edir. Proqrama dəvət olunan ekspertlər isə Ermənistan barədə sərt fikirlər səsləndiriblər. Məsələn, politoloq Oleq Barabanov bildirib ki, Ermənistan Avropaya gərək deyil: "Burada məsələ sadədir - Avropa İttifaqında yaranmış çata Rusiya tərəfindən kiminsə daxil edilməsi. Məsələ Avropaya yox, Ermənistana aiddir. Avropa İttifaqı həmişə bizim işimizə yarayıb, bundan sonra da yarayacaq. Sualları Ermənistana vermək lazımdır. Ermənistan 2013-cü ildə Avrasiya İttifaqı və Avropa İttifaqı arasında seçim edə bilərdi. O vaxt Ermənistan Avrasiya İttifaqını seçdi, indi isə Ermənistan azad deyil. Ermənistan bizim Gömrük İttifaqının üzvüdür. İttifaq çərçivəsində sərhədlər yoxdur və Ermənistan troya atına çevrilib"- o deyib.
Proqramda erməni ekspertlər gülüş obyektinə çevrilib. Aparıcı Olqa Belova Ermənistanın ünvanına tikanlı atmaca atıb. Ermənistan "gəzəyən qıza, ərinə xəyanət edən qadına" bənzədilib.
Siyasi Araşdırmalar İnstitutunun direktoru Sergey Markov Ermənistanla Rusiya arasında münasibətlərin faktiki korlandığını deyib: "İrəvanda Rusiyaya qarşı iradlar var ki, Moskva pulu az verir. Bizdə Njde məsələsi ilə bağlı konflikt də var, o, Hitlerin tərəfdaşıdır. Ermənistanda isə onu qəhrəman elan edib heykəl qoyurlar. Onu qəhrəman elan edirlər. Njde nasist cinayətkarıdır. Üstəlik, ermənilər Rusiyanın daxili işlərinə də qarışırlar, təzyiq edirlər ki, Rusiya kanalları niyə Njde haqda cinayətkar xəbərlər verir".
Bundan əlavə, müzakirələrdə Dağlıq Qarabağ müharibəsinə də diqqət çəkilib. Müharibə təhlükəsinin davam etdiyi bildirilib.
Aparıcılar Ermənistan-Azərbaycan münasibətlərinin tarixi haqda videoçarx təqdim edərək, Ermənistanın torpaq iddiaları, atəşkəs razılaşması - Bişkek protokolu, aprel döyüşlərində Ermənistanın rüsvayçı vəziyyətinə dair faktlar da nümayiş etdirilib.
Sonda aparıcılar bildiriblər ki, Ermənistanın sarsaq oyununa Rusiya soyuqqanlı şəkildə tamaşa edir. Rəsmi İrəvandan Rusiya ilə Avropa İttifaqı arasında seçim etmək hələ ki, tələb olunmur.
Ermənistanın Rusiya kanalında bu şəkildə aşağılanmasının kökündə hansı amil dura bilər?
Klassik Xalq Cəbhəsi Partiyasının funksioneri Xəzər Teyyublunun sözlərinə görə, Rusiyanın məşhur kanalında belə fikirlərin səslənməsi təsadüf sayıla bilməz: “Rusiya böyük ölkədir. Onun bütün strukturları operativ işləyir. Mediası, xüsusilə də televiziya məkanı ciddi nəzarət altındadır. Fikir verirsinizsə, Rusiyanın hardasa, kiminləsə dövləti marağı kəsişirsə, həmin dəqiqə informasiya savaşı başlanır. Rusiya bütün media arsenalını işə salır. Biz bunu Türkiyə və Ukrayna ilə həmin ölkənin münasibətlərinin gərginləşməsi fonunda müşahidə etdik. Yəni Ermənistanın populyar tok-şouda aşağılanması düşünülmüş şəkildə edilir. Bununla Rusiya Ermənistana mədəni şəkildə başa salır ki, ağıllı olmaq lazımdır. İlk olaraq belə bir mesajı Ermənistan Rusiyaya vermək istədi və öz parlamentlərində Avrasiya İttifaqından çıxmaqla bağlı tələblər səsləndirdilər. Həmin hadisədən dərhal sonra Rusiya kanalları belə mesajlar verdilər. Rusiya hələ ki, Ermənistan qarşısında konkret tələb qoymur. Amma onu dərindən izləyir. Görünür, sapmaları tutur və qərara alıb ki, zamanı çatanda birdəfəlik zərbə vurmaq lazımdır. Ermənistanı, Sarkisyanı gəzəyən xanıma bənzətmək, əslində, onlara verilən ən doğru qiymətdir. Həmin tok-şouda Ermənistanın diqqətinə Qarabağ problemi də çatdırıldı və deyildi ki, oralar qaynar nöqtə kimi Rusiyanın əlindədir. İstənilən vaxt həmin kartla Ermənistanı diz çökdürə bilərlər. Bir sözlə, Ermənistanın atdığı son addımlar və onlara verilən reaksiyalar belə deməyə əsas verir ki, həmin ölkəni gələcəkdə yaxşı nəsə gözləmir”.
Məhəmmədəli QƏRİBLİ
