Yeganə Hacıyeva: “İstər Azərbaycan, istərsə də Ermənistanla mövcud münasibətlərdə Türkiyənin belə bir yeni yanaşma sərgiləyəcəyini əsaslandıracaq heç bir məqam yoxdur”
Türkiyənin xarici işlər naziri Mövlud Çavuşoğlu Ankarada ATƏT-in Dağlıq Qarabağ münaqişəsinin nizamlanması üzrə Minsk Qrupunun həmsədrləri ilə görüşüb. Minsk Qrupunun həmsədrləri İqor Popov, Stefan Viskonti, Endryu Şofer və ATƏT-in fəaliyyətdə olan sədrinin xüsusi nümayəndəsi Anjey Kaspşiki qəbul edən Türkiyənin xarici işlər naziri Mövlud Çavuşoğlu Türkiyənin Minsk Qrupunun münaqişənin nizamlanması üzrə səylərini dəstəklədiyini bildirib.
Ancaq maraqlıdır ki, Ermənistan mətbuatı bu görüşü başqa aspektdə yozmaq istəyir. Bildirirlər ki, guya Çavuşoğlunun bu görüşünün məğzi Türkiyənin Ermənistanla sərhədlərin açılması ilə bağlı qoyduğu şərtlərdən geri çəkilmək niyyətində olması ilə bağlı olub. Erməni mətbuatı iddia edir ki, guya Ermənistanla münasibətlərdə Türkiyə məlum Qarabağ şərtlərindən imtina edir. Təbii ki, bu şərhlərin reallığa heç bir uyğunluğu yoxdur. Ermənistan mətbuatının yaydığı bu iddialar barədə politoloqlar nə düşünürlər?
Politoloq Yeganə Hacıyeva qəzetimizə bildirdi ki, ermənilərin bu iddiaları heç bir real fakta əsaslanmayan sərsəmlikdən başqa nəsə deyil: “Türkiyə xarici işlər naziri son görüşündə də Dağlıq Qarabağ münaqişəsinin sülh və diplomatiya vasitəsilə həll edilməli olduğunu, ölkəsinin isə münaqişənin həllində məhz Azərbaycanın yanında olduğunu bildirib. Sırf ATƏT-in Minsk Qrupunun bundan öncəki Ankara toplantısı zamanı da Türkiyə XİN başçısı ATƏT-in Dağlıq Qarabağ münaqişəsinin nizamlanması istiqamətində fəaliyyətini dəstəkləmiş və bu formatın istənilən görüşlərində məhz Azərbaycanın qəbul edəcəyi formulların irəli sürülməsinə və dəstəklənməsinə çalışacağına davam edəcəyini konkret bildirib. Məhz keçənilki görüşdə Türkiyənin xarici işlər naziri M.Çavuşoğlu vurğulayıb ki, Rusiya ilə münasibətlərin indi daha da normallaşmasından sonra Türkiyə könflikti həm prezidentlər, həm də xarici işlər nazirləri səviyyəsində müzakirə etməyə hazırdır və konfliktin həllində irəliləyişlərin əldə olunmasına səylərini davam etdirəcək və biz bunların şahidi olduq.
Türkiyə və Ermənistan arasında 2009-cu ildə imzalanmış protokollar və ən əsası Türkiyənin protokolların ratifikasiyası üçün əsas şərti olan “Ermənistanın işğal etdiyi Azərbaycan torpaqlarından qeyd-şərtsiz geri çəkilməsi” haqqında yazılanlardan imtina edə biləcəyi haqqında deyilənlər doğru deyil. İstər Azərbaycan, istərsə də Ermənistanla mövcud münasibətlərdə Türkiyənin belə bir yeni yanaşma sərgiləyəcəyini əsaslandıracaq heç bir məqam yoxdur. Əksinə, keçən illər ərzində sırf regionda Türkiyə-Azərbaycan-Rusiya üçtərəfli iqtisadi-siyasi və digər əlaqələri , həmçinin, ölkələrin Cənubi Qafqaz kimi strateji tranzit qovşağı olan regionda mövcud olan və yeni həyata keçirdiyi birgə iqtisadi və tranzit layihələrdə oxşar və razılaşdırılmış bərabər fəaliyyəti dərinləşib”.
Məhəmmədəli QƏRİBLİ
