Elşən Həsənov: “Ermənistanı qarşıda ağır günlər gözləyir”
Ermənistanla Avropa Birliyi arasında imzalanan məlum müqavilə, müəyyən qədər də olsa, Ermənistanla Rusiya Federasiyası arasında münasibətləri korlayacaq. Bu sözləri Rusiya Federasiyası İctimai Palatasının üzvü, politoloq Sergey Markov AB ilə Ermənistan arasında imzalanan müqavilənin doğura biləcəyi nəticələr haqda danışarkən deyib.
O qeyd edib ki, bu müqavilənin əsas məqsədinin Ermənistanı, az da olsa, Rusiyanın təsirindən çıxarmaq olduğunu hamı bilir: “Lakin bu müqavilə Ukrayna ilə imzalanan müqavilədən fərqlənir. Orada azad ticarət sistemi mövcud idi, Ermənistanla bağlanan müqavilədə isə bu yoxdur.
AB hesab edir ki, Ermənistan iqtisadiyyatının necə qurulması, onun reqlamenti və fəaliyyət göstərəcək qanunlarının tərtibatını bilavasitə AB tənzimləməlidir. Avropa Birliyi keçmiş SSRİ ölkələrində Rusiyanın simasında düşmən ölkə obrazı yaratmaqla öz məqsədlərinə nail olmaq istəyir. Buna görə də baş verənlər İrəvanla Moskva arasındakı münasibətləri pisləşdirəcək.
Bundan sonra dolayısı ilə Azərbaycanla Rusiya Federasiyası arasında olan münasibətlər üçün yaşıl işıq yanacaq. Rəsmi Bakı ilə Moskva münasibətlərinin inkişafı üçün yaranan münbit şəraiti dəyərləndirəcəklər”.
Markovun bu fikirlərini nə dərəcədə əsaslı saymaq olar?
Azərbaycan Sosialist Partiyasının sədri Elşən Həsənov qəzetimizə bildirdi ki, Rusiyanın Cənubi Qafqazdakı forpostunun Ermənistan olduğunu nəzərə alsaq, İrəvanın Brüssellə anlaşma imzalamasını Moskvadan uzaqlaşması kimi dəyərləndirənlər az deyil: “Noyabrın 24-də Belçikanın paytaxtı Brüsseldə Avropa Birliyinin 29 ölkəsinin və postsovet məkanının 6 ölkəsinin rəhbərlərinin iştirakı ilə “Şərq Tərəfdaşlığı” proqramının zirvə toplantısı başa çatdı. Sammitin sonucu olaraq yekun bəyannamə qəbul olundu. Sənəddə AB “Şərq Tərəfdaşlığı” proqramının iştirakçılarının niyyətlərini bəyəndilər və bütün münaqişələri dinc yolla çözməyə çağırdılar.
Dağlıq Qarabağ münaqişəsi, Krım məsələsi və Ukraynanın Donetsk vilayətindəki situasiya ilə bağlı sənəddə heç nə yazılmasa da, Avropa Birliyi ölkələrin sərhəd toxunulmazlığı ilə ərazi bütövlüyünün toxunulmazlığının ən mühüm məsələlərdən biri olduğunu vurğuladı.
Digər məqam Ermənistanın Avropa Birliyi ilə genişmiqyaslı əməkdaşlıq barədə anlaşma imzalaması oldu.
Rus politoloqu tamamilə doğru vurğulayir ki, həmin sənəddə Ermənistanla azad ticarətin qurulmasına elə də böyük diqqət ayrılmır. Ən azı, Azərbaycanla müqayisədə bunu iddia edə biərik. İmzalanan sənədin siyasi aspektində Ermənistanın uduzduğu məlumdur. İqtisadi sahədə AB ilə əməkdaşlıq üçün oranın iqtisadiyyatı tamamilə yenidən qurulmalıdır. Təbii ki, bütün bunlar AB-nin nəzarəti altında həyata keçiriləcək. Bir anlıq zənn edək ki, iqtisadiyyatla bağlı bəzi tövsiyələr bizə də verilir. Biz özümüzə sərf edəni qəbul edə bilərik. Kimsə bununla bağlı bizə irad bildirə bilməz. Çünki Azərbaycan qərarların qəbul edilməsində tam sərbəstdir. Ermənistanda isə vəziyyət tamamilə fərqlidir. Onlar Rusiyadan çox asılıdırlar. Bu baxımdan da Ermənistanı qarşıda ağır günlər gözləyir”.
Məhəmmədəli QƏRİBLİ
