Məhərrəm Zülfüqarlı: “Bütün dünyaya göstərdi ki, həmin tənqidlər ədalətli deyil və reallığı əks etdirmir”
Xəbər verildiyi kimi, Prezident İlham Əliyevlə NATO-nun baş katibi Yens Stoltenberqin görüşü olub. Görüşdə bir sıra məsələlər müzakirə edilib. Dövlət başçısı qeyd edib ki, Azərbaycanın NATO ilə əməkdaşlığı böyük potensiala malikdir.
NATO-nun baş katibi Y.Stoltenberq Brüsseldə Alyansın mənzil-qərargahında Azərbaycan Prezidenti İlham Əliyevlə birgə mətbuat konfransında bildirib ki, NATO ilə Azərbaycan arasındakı əməkdaşlıq uzun illərdir davam edir: “Bu əməkdaşlıq demokratik dəyərlərə və prinsiplərə sadiqliyə əsaslanır. Bu gün bizim əməkdaşlığımız bir çox sahələri əhatə edir”.
NATO-nun baş katibi, həmçinin, BMT Təhlükəsizlik Şurasının “Qadın, sülh və təhlükəsizlik” haqqında qətnaməsinin ikitərəfli əməkdaşlıq proqramına daxil edilməsi barədə qərara görə də Azərbaycana minnətdarlığını bildirib: “Bütün bunlar Avroatlantika məkanında təhlükəsizliyin artmasına xidmət edir. Biz bu sahələrdə Azərbaycanla işimizi davam etdirməkdə qəti qərarlıyıq”.
NATO Azərbaycanda islahatları, xüsusilə də müdafiə sahəsində islahatları dəstəkləməkdə davam edəcək. Bunu Brüsseldə keçirilən Şimali Atlantika Şurasının iclası ərəfəsində NATO-dan bildiriblər. Təşkilatdan bildiriblər ki, Azərbaycan və NATO uzunmüddətli əməkdaşlığa malikdir. NATO-dan onu da bildiriblər ki, təşkilatda Azərbaycanı Şimali Atlantika Şurası üçün vacib tərəfdaş hesab edirlər: “Bu ilin əvvəlində Azərbaycan NATO ilə tərəfdaşlıq fəaliyyətinin yeni fərdi planını təsdiq etdi. Biz Azərbaycanda bütün sahələrdə islahatların keçirilməsini dəstəkləyirik”.
Göründüyü kimi, Azərbaycan-NATO əlaqələri çoxşaxəlidir. Eyni zamanda, diqqətçəkən məqam odur ki, NATO Azərbaycanda demokratiya sahəsində aparılan islahatlara dəstək verir və birgə əməkdaşlığın davam etdirilməsində maraqlıdır. NATO-nun bu yanaşması bəzi Avropa təşkilatlarının Azərbaycanda demokratiya ilə bağlı tənqidlərinin qərəzli olduğunu sübut və nümayiş etdirmək baxımından nə dərəcədə əhəmiyyətlidir?
Məsələyə münasibət bildirən tarix üzrə fəlsəfə doktoru Məhərrəm Zülfüqarlının sözlərinə görə, NATO-nun bu cür yanaşması Azərbaycan üçün çox əhəmiyyətlidir: “Çünki NATO dünyada çox nüfuzlu və ciddi təşkilatlardan biridir. Belə bir təşkilatın Azərbaycanda demokratiya sahəsində görülən işləri qiymətləndirməsi, buna dəyər verməsi çox müsbət haldır. Bu bir daha sübut etdi ki, Azərbaycan demokratik dəyərlərə sadiqdir və bunların qorunması üçün əlindən gələni edir. Eyni zamanda, NATO bununla bütün dünyaya bəyan etdi ki, Azərbaycan demokratik dəyərlərə sadiqdir. Bu həm də bəzi Avropa təsisatlarının Azərbaycanda demokratiya ilə bağlı tənqidi fikirlərini alt-üst etdi. Bütün dünyaya göstərdi ki, həmin tənqidlər ədalətli deyil və reallığı əks etdirmir. Bu yanaşma ilə Alyans, bir növ, həmin təşkilatları fakt qarşısında qoydu və onların Azərbaycanda gedən proseslərə qərəzli yanaşdıqlarını sübut etdi. Məsələ ondadır ki, bəzi Avropa təşkilatları həqiqətən də Azərbaycanda görülən işlərə, aparılan islahatlara qərəzli prizmadan yanaşırlar. Bu da, istər-istəməz, insanda təəssüf hissi yaradır. Halbuki, bu istiqamətdə ölkədə işlər görülür və Azərbaycan sözügedən dəyərlərə sadiqdir. Hesab edirəm ki, NATO-nun bu cür yanaşması doğrudur və mövcud reallığı özündə əks etdirir”.
Vidadi ORDAHALLI
