Fikrət Sadıqov: “Qondarma qurumu dünyada heç bir ölkə, hətta Ermənistanın özü də tanımır”
Fransa Azərbaycan torpaqlarında yaradılan qondarma rejimi tanımır. Bu barədə Fransanın Xarici İşlər Nazirliyindən (XİN) bu ölkənin Azərbaycandakı Səfirliyi vasitəsilə bildirilib. Qeyd edilib ki, hökumət Alforvil bələdiyyəsi tərəfindən imzalanan “xartiya”ya riayət etməyə məcbur deyil.
“Bizim mövqeyimiz aydındır. Fransa “Dağlıq Qarabağ”ı tanımır”. Lakin bir neçə gün öncə bununla tam zidd olan bir hadisə baş vermişdi. Belə ki, bir neçə gün əvvəl Fransanın Alforvil kommunası ilə Ermənistanın işğalı altında olan Azərbaycanın Laçın rayonu arasında “dostluq xartiyası” imzalanıb. Tədbirdə Alforvil meri Mişel Gerşinovitz, Ara Torayan, deputatlar, bələdiyyə üzvləri, Ermənistanın Parisdəki səfiri, Dağlıq Qarabağ separatçılarının Fransadakı “daimi nümayəndəsi” Hovanes Gevorkyan və Laçının “meri” Artyom Sarıbekyan iştirak ediblər.
Fransanın bu mövqeyini necə dəyərləndirmək olar?
Politoloq Fikrət Sadıqovun sözlərinə görə, Fransada ermənipərəst qüvvələr çoxdur: “Hətta keçmiş prezident Nikola Sarkozi Ermənistanı “Fransanın bacısı” adlandırmışdı.Separatçı rejimin nümayəndələrinin rəsmi pasportu yoxdur. Qondarma Dağlıq Qarabağ heç kəs tərəfindən tanınan qurum deyil. Azərbaycanın isə ərazi bütövlüyü tanınır. Həmin şəxs də Ermənistanın pasportu ilə Fransaya gedib.
Yaxşı dərk edirlər ki, Bako Saakyan turistik məqsədlə, yaxud adi səyahət üçün Fransaya səfər etməyib. O erməni guya Laçınla Fransanın kiçik bir şəhərinin “qardaş” olması ilə bağlı “saziş” imzalayıb. Fransanın həmin şəhərinin hətta xəritədə adı belə yoxdur. Lakin ermənilər hansısa “saziş” imzalayır, tədbirlər keçirirlər. Bu, Fransa-Azərbaycan münasibətlərinə zərbədir. Bu, rəsmi Parisin siyasəti olmasa da, separatçı rejimin nümayəndəsini qəbul etmək, “saziş” imzalamaq halları ortaya çıxıb. Bütün bunlar nə məntiqə, nə də beynəlxalq normalara uyğundur. Fransa ilə Azərbaycan arasındakı münasibətlərin normal inkişafına müsbət təsir göstərmir. Hesab edirəm ki, qondarma qurumu tanımamaqla bağlı bəyanat verməklə məsələ həllini tapmır. Qondarma qurumu dünyada heç kim, hətta Ermənistanın özü də tanımır. Bunu biz gözəl bilirik. Münasibətləri qoruyub saxlamaq üçün qondarma qurum təmsilçilərinə orada öz təbliğatlarını aparmağa imkan verməmək lazımdır. Fransada belə hadisələrin tez-tez olması isə bizə düşünmək və etiraz etmək üçün ciddi əsaslar verir”.
Məhəmmədəli QƏRİBLİ
