Günel Fərhadqızı: “Sübut edir ki, bu layihələr kiməsə qarşı yönəlməyib, hamı üçündür”
Bakı-Tiflis-Qars dəmir yolunun açılış mərasimindəki çıxışında Prezident İlham Əliyev Azərbaycan ərazisində Şimal-Cənub dəmir yolu layihəsi ilə bağlı bütün işlərin tamamlandığını bildirib:
“Azərbaycan Şimal-Cənub nəqliyyat dəhlizinin yaradılması istiqamətində də önəmli addımlar atır. Bütün infrastruktur hazırdır və eyni zamanda, Azərbaycan digər ölkələrdə infrastrukturun yaradılması ilə bağlı öz texniki və maliyyə imkanlarını ortaya qoyur. Azərbaycan Şimal-Cənub və Bakı-Tbilisi-Qars nəqliyyat dəhlizlərinin inteqrasiyası istiqamətində işləyir. Bakı-Tbilisi-Qars tarixi İpək Yolunun bir hissəsinin bərpası deməkdir və buradan Çin, Qazaxıstan, Orta Asiya, Azərbaycan, Gürcüstan, Türkiyə, Avropa ölkələri istifadə edəcəklər. Şimal-Cənub nəqliyyat dəhlizi Hindistan, Pakistan, İran, Azərbaycan, Rusiya, Avropa ölkələrini birləşdirəcək və Azərbaycan hər iki layihədə fəal iştirakçıdır və öz maliyyə resurslarını ortaya qoyan ölkədir”.
Şimal-Cənub və Bakı-Tiflis-Qars nəqliyyat dəhlizlərinin inteqrasiyası istiqamətində işləyirik deməklə Prezident konkret olaraq nəyi nəzərdı tutub? Daha doğrusu, bu inteqrasiya uğurla baş tutsa, onun hansı iqtisadi, geosiyasi nəticələri olacaq?
İqtisadçı Günel Fərhadqızı qəzetimizə bildirdi ki, bununla Prezident böyük bir nəqliyyat layihəsinin anonsunu verib: “Bilirsiniz ki, bəziləri Bakı-Tiflis-Qarsa siyasi çalar qataraq, bundan Rusiyanın və İranın kənarda qaldığını iddia edirlər. Ancaq görürsünüz ki, Azərbaycan bir istiqamətlə kifayətlənmir, paralel olaraq Şimal-Cənub nəqliyyat dəhlizinin tikintisini həyata keçirir. Bir daha sübut olunur ki, Azərbaycan bu cür böyük layihələrin ərsəyə gəlməsində xüsusi ilhamverici rola malikdir. BTQ və Şimal-Cənub layihələri arasında inteqrasiyanın təmini analoqu olmayan imkanlar açmış olacaq. İki nəqliyyat budağının birləşdirilməsi, eyni zamanda, Rusiya və İran üçün böyük imkanlar açır. Rusiya və İran öz dəmir yolu şəbəkələrini Azərbaycan üzərindən Şimal-Cənub nəqliyyat dəhlizi çərçivəsində birləşdirir. Şimal-Cənub nəqliyyatı dəhlizinin Şərq-Qərb nəqliyyat dəhlizinə, yəni Bakı-Tiflis-Qars dəmir yolu xəttinə inteqrasiyası üçün böyük perspektiv var. Yəni gələcəkdə bu layihədən Rusiya və İran da istifadə edə bilər. Bununla da Azərbaycan böyük layihələri birləşdirən bir ölkə rolunu üzərinə götürəcək. Prezidentin bu açıqlaması bir daha sübut edir ki, Azərbaycan bir hədəfi əldə etməklə kifayətlənmir, daha böyük məqsədlər üçün çalışır. Sübut edir ki, bu layihələr kiməsə qarşı yönəlməyib, hamı üçündür. Belə layihələrdən kənarda qalmağı haqq edən bir ölkə varsa, o da Ermənistandır”.
Məhəmmədəli QƏRİBLİ
