Günel Fərhadqızı: "Yalnız deyilən ərzaq növünə xərclənən pul büdcənin 70 faizini təşkil edirsə, demək, ailə büdcələri də ağır durumdadır"
Ermənistanda aclıq və səfalətin hökm sürməsi haqda çox yazılıb. Həmin ölkədə yaşayan insanlar çox bədbindir. Ermənistana səfər edən xarici jurnalistlər öz qeydlərində bu barədə ətraflı bəhs edib.
İgiltərəli jurnalist Ermənistandakı vəziyyətə aid məqaləsinin girişini bu sözlərlə başlayır: "Ermənistan ərazisinə daxil olduqda gördüklərim məni dəhşətə gətirib". Müəllif yazır ki, ölkə məhvə doğru addımlayır. Kənd və şəhərlərdə adam tapmaq, demək olar ki, problemdir. Sakinlərlə söhbət zamanı aydın oldu ki, işsizlik səbəbindən ölkəni tərk edərək xaricə üz tuturlar. Bəzi ailələr isə Ermənistandan birdəfəlik çıxıb gedir. Miqrasiya axınının qarşısını almaqda hökumət acizdir. Amma problem bununla bitmir. Vətəndaşların ən çox şikayət etdiyi digər məsələ isə məmur özbaşınalığı və rüşvətxorluqdur.
Müəllif məqaləsində regionlardakı uşaq bağçaları və məktəblərin vəziyyətinə də toxunub. Binaların təmirsiz və baxımsız vəziyyətdə olduğunu qeyd edən jurnalist uşaq bağçalarında hətta körpələrin qida rasionuna belə fikir verilmədiyini nəzərə çatdırıb.
Yazıda, həmçinin, həbsxana işçilərinin məhkumları döyərək təhqir etməsi, onlara işgəncələrin verilməsi də qeyd olunub. Ölkədə təhsil və səhiyyə sahəsində də ciddi problemlər var. Bölgələrdə təhsil, demək olar ki, yox səviyyəsindədir. Səhiyyə sahəsindən isə heç danışmağa dəyməz. Bir sözlə, Ermənistanın bölgələrində həyat, demək olar ki, dayanıb.
Dünyanın nüfuzlu "Oxfam" təşkilatının təqdim etdiyi statistikadan da görünür ki, həmin ölkədə vəziyyət olduqca acınacaqlıdır. Təşklatın hesabatında qeyd edilir ki, Ermənistan əhalisinin 15 faizi qazanclarının 70 faizini çörək və kartof almağa xərcləyir.
"Oxfam"ın hesabatından hansı nəticəni çıxarmaq olar?
İqtisadçı Günel Fərhadqızı qəzetimizə açıqlamasında bildirdi ki, Ermənistandakı iqtisadi vəziyyətin ağır olması sirr deyil: "Ölkə, demək olar ki, məhvə doğru gedir. Təbii ehtiyatlarla zəngin olmayan Ermənistan, eyni zamanda, regional layihələrdən kənarda qalıb. Hətta tranzit rolunu oynamağa belə şanslı deyil. Səbəbi bəllidir. Yürüdülən işğalçı siyasət ölkəni çıxılmaz vəziyyətə düçar edib. Ölkədə, demək olar ki, yaşlı nəsil qalıb. Cavanlar sürətlə Ermənistanı tərk edir. "Oxfam"ın hesabatında vacib detal diqqəti çəkir. Bilirsiniz ki, çörək və kartof o qədər də baha olmayan ərzaq məhsullarıdır. Ancaq vacib gündəlik ərzaq sayılır. Bu nəticəyə gəlinir ki, əhalinin böyük hissəsinin ancaq çörək və kartof almağa imkanı çatır. Digər tərəfdən isə bəlli olur ki, Ermənistanda verilən əməkhaqqı və müavinətlər çox aşağıdır. Çünki yalnız deyilən ərzaq növünə xərclənən pul büdcənin 70 faizini təşkil edirsə, demək, ailə büdcələri də ağır durumdadır".
Məhəmmədəli QƏRİBLİ
