Elxan Mehdiyev: "Bu müddət ərzində ABŞ-da 3 prezident dəyişib. Amma onlardan heç birinin..."
Məlum olduğu kimi, on bir gündən sonra ABŞ-da növbəti prezident seçkiləri keçiriləcək. Bu seçkilərdə Demokratlar Partiyasının namizədi xanım Hillari Klinton, Respublikaçılar Partiyasının namizədi isə milyarder Donald Trampdır.
Demək olar ki, bütün dünya, o cümlədən Azərbaycan da ABŞ-da baş tutacaq bu seçkiləri diqqətlə izləyir. Dünyanın siyasi və iqtisadi nizamının müəyyən olunmasında önəmli rola malik ABŞ-da keçiriləcək prezident seçkilərində kimin qalib gələcəyi xüsusi maraq doğurur.
Bu arada demokratlar və respublikaçılar arasında siyasi mübarizə get-gedə daha da qızışır. Xüsusilə prezidentliyə namizədlər - Hillari Klintonla Donald Tramp arasında yaşanan hadisələr və bu olaylar çərçivəsində irəli sürülən ağılasığmaz ittihamlar amerikalı seçicilərin də böyük təəccübünə səbəb olmaqdadır. Hətta belə hesab etmək olar ki, Amerika tarixində budəfəki postseçki dövrü kimi heç bir dövr olmayıb. Tərəflərin bir-birini korrupsiyada, siyasi manipulyasiyalarda, seçiciləri müəyyən vasitələrlə ələ almaqda və s. ittiham etməsi, əslində, ABŞ-ın mövcud siyasi mənzərəsini göz qarşısına qoyur. Ümumiyyətlə, baş tutan hər bir debat sensasiyalı və təəccüblü nəticələrlə başa çatır. Artıq istər respublikaçıların, istərsə də demokratların tərəfdarları Klinton-Tramp mübarizəsini sivil, demokratik ənənələrə sahib rəqabət kimi deyil, aşkar düşmənçilik kimi qəbul etməyə başlayıb.
Ümumi rəy sorğularına, müşahidələrə görə, Hillari Klintonun qalib gəlmək şansı daha böyükdür. Ancaq, istənilən halda, Birləşmiş Ştatlarda seçkinin necə nəticələnəcəyini yüz faiz proqnozlaşdırmaq mümkün deyil. Bütün hallarda, proqnozların əksi olaraq respublikaçıların namizədi qalib gəlsə, ABŞ-Azərbaycan münasibətlərində nə kimi yeniliklər özünü göstərəcək? Məsələyə münasibət bildirən siyasi ekspert Elxan Mehdiyevin fikrincə, kimin qalib olmasının bu məsələdə elə bir böyük rolu yoxdur: "Əvvəla güman olunur ki, Klinton prosesdən qalib çıxacaq. Digər tərəfdən, ABŞ-da kimin prezident olmasının Azərbaycan üçün əhəmiyyəti yoxdur. Çünki Azərbaycan torpaqlarının 20 faizi işğal altındadır. Bu müddət ərzində ABŞ-da 3 prezident dəyişib. Amma onlardan heç birinin, vədlər verilsə də, Azərbaycanın bir nömrəli probleminin həllində zərrə qədər də olsa köməyi dəyməyib. Bu baxımdan tarix göstərir ki, ABŞ-da kimin prezident olması Azərbaycanın həyati məsələləri üçün əhəmiyyət daşımır. Lakin sorğulara əsasən söyləmək olar ki, Hillari Klinton digər namizəddən irəlidədir. Trampın verdiyi bəyanatlar da onun ABŞ-da yaşayan azlıqlar arasında nüfuzunu heçə endirib. Bu baxımdan indiki anda görünən səhnə daha çox Klintonun xeyrinədir. Bununla belə, hər şey irəlidədir".
Vidadi ORDAHALLI
