Vüqar Qədirov: "Çox güman ki, uduzan namizəd seçkinin nəticəsini şübhə altına alacaq açıqlamalarla çıxış edəcək"
ATƏT müşahidəçiləri ABŞ-da noyabrın 8-də baş tutacaq seçkilərin təşkilindəki pozuntulara görə narahatlıq keçirir.
ATƏT-in Demokratiya və İnsan Haqları Bürosunun (DTİHB) direktoru Mixael Georq Linkin sözlərinə görə, altı milyona qədər amerikalı seçki prosesindən kənarda saxlanıb. O, "Frankfurter Allgemeine Zeitung"a bildirib ki, söhbət 2,6 milyon məhkumdan və hazırda istintaq altında olan 3,2 milyon şübhəli şəxsdən gedir.
ABŞ-dakı seçkiləri müşahidə edən ATƏT nümayəndəsi Yurgen Klinke isə Almaniyanın "Bild" qəzetinə deyib ki, ABŞ-da seçki prosedurları ilə bağlı narahatlıqlar var. Onun sözlərinə görə, ABŞ hökuməti "Beynəlxalq normalara əməl etmək üçün çalışmalıdır".
Klinke bildirib ki, ABŞ-da bəzi saat qurşaqlarında yerləşən ştatlarda hələ səsvermə bitməmiş, digər qurşaqlarda yerləşən ştatlarda artıq nəticələr açıqlanacaq. Bu isə seçicilərin düşüncəsinə təsir etdiyi üçün yolverilməzdir.
ABŞ-da nəzərdə tutulan seçkilərə verilən bu cür qiymət nəyin əlaməti sayıla bilər?
Ekspert Vüqar Qədirovun sözlərinə görə, Amerika tarixində budəfəki postseçki dövrü digərlərindən xeyli fərqlənir:
"Bu faktor isə Amerikanın əsrlərdən bəri formalaşmış seçki ənənələrinin deqradasiyaya uğraması kimi də dəyərləndirilə bilər. Xüsusilə prezidentliyə namizədlər - Hillari Klintonla Donald Tramp arasında yaşanan olaylar və bu olaylar çərçivəsində irəli sürülən ağlasığmaz ittihamlar amerikalı seçicilərlə yanaşı, dünya birliyinin də böyük heyrətinə səbəb olub. Tərəflər bir-birini korrupsiyada, siyasi manipulyasiyalarda, seçiciləri müəyyən vasitələrlə ələ almaqda və s. ittiham etməklə, əslində, ABŞ-ın mövcud siyasi mənzərəsini göz qarşısına qoyur. Bütün bu faktorlar sübut edir ki, ABŞ-dakı demokratiyanın vəziyyəti ciddi ağsayır. ATƏT-in məlum bəyanatı da təsadüfdən ortaya çıxmayıb. Xüsusilə də seçki siyahılarına ölü adamların adının salınması kimi ittihamlar müşahidəçilər tərəfindən ciddi araşdırmaya məruz qalıb. Konkret faktların mövcudluğu belə bir narahatlığın olmasını ifadə edib. Düşünürəm ki, indidən belə bir dəlillərin ortaya qoyulması seçkinin gərgin keçəcəyinə işarədir. Çox güman ki, uduzan namizəd seçkinin nəticəsini şübhə altına alacaq açıqlamalarla çıxış edəcək".
Məhəmmədəli QƏRİBLİ
