Qərb və Rusiya arasında artan gərginlik fonunda böyük narahatlıq predmetinə çevrilən məsələlərdən biri də mümkün nüvə qarşıdurmasıdır. Belə bir vaxtda isə ABŞ və Avropada narahatlıq predmetinə çevrilən əsas məqam Rusiyanın "Satana 2" adlı raketidir.
Rusiyanın özündə bu raket "RS-28 Sarmat" adlanır. O, "Voyevoda" R-36M2 komplekslərinin bazası əsasında hazırlanıb. "Voyevoda" R-36M2 raketləri isə NATO təsnifatında "Satana", yəni "İblis" adlanır. "Satana 2" isə sələfindən daha güclüdür. "Sarmat"ın xarakteristikaları tam olaraq açıqlanmayıb. Ancaq hərbçilər bildirir ki, raketin faydalı yüklənməsi təxminən 10 ton təşkil edəcək. Yeni raket, həmçinin, 4 tona yaxın nüvə başlığını 10 min kilometrə qədər məsafəyə daşıya biləcək. Bu raket 105 tondan yuxarı kütlə ilə strateji hücum silahlarının ixtisarı haqqında müqavilələrin təsnifatı üzrə "ağır" hesab edilir. Müqayisə üçün deyək ki, "Voyevoda" kompleksinin raketi 211 ton təşkil edir və faydalı yükü 8,7 tondur.
Ballistik raket üzərindəki işlər ABŞ-ı təşvişə salıb. Bəzi ekspertlər bu raketin ABŞ üçün "cəhənnəm silahı" ola biləcəyini bildirir. Raket lazımı energetika imkanlarına malik olacaq. "Sarmat"ın tək ballistik trayektoriya üzrə yox, eyni zamanda atmosferin yuxarı qatlarında da hərəkət etmək imkanına malik olacağı bildirilir. Bu, gözlənilməz rakurslardan döyüş yükünü çatdırmağa imkan verir və raket əleyhinə müdafiənin təşkilini əhəmiyyətli dərəcədə çətinləşdirir. ABŞ-ın CNBC kanalı bildirir ki, o, bütün Fransanı, yaxud Texası yer üzündən silmək iqtidarındadır. Özü də bu raket beşinci nəsil raketlər sırasına aiddir. Üstəlik, qeyd olunduğu kimi, "Sarmat" raketdən müdafiə sistemlərindən qaçmaq imkanına malikdir.
ABŞ-ın "The New York Post" qəzeti isə "Sarmat"ı cildini dəyişmiş iblis adlandırır və onun "cəhənnəmi Yerdə yaratmağa qadir silah" olduğunu bildirir: "Moskvadakı silah mütəxəssisləri "Satana 2"nin müdafiə radarlarından yayınaraq 10 min kilometrə qədər məsafəni asanlıqla qət edə biləcəyini deyir. Bu o deməkdir ki, Rusiya bu nüvə silahı ilə Nyu-Yorku da vura bilər". Belə bir vaxtda "The Wall Street Journal" qəzeti Rusiyada nüvə hücumundan qorunmaqdan ötrü keçirilən kütləvi təlimlərin videosunu paylaşıb. Bu videoları Rusiyanın dövlət kanalları yayıb və kadrlarda vətəndaşların hərbi heyətlə birgə təhlükəli materiallardan qoruyan xüsusi geyimlərdə hərəkət etdiyi, məktəb və universitetlərdə şagird və tələbələrə nüvə hücumu zamanı necə davranmalı olduqları haqda məlumat verildiyi görünür. Qəzet təlimlərə 40 milyon vətəndaşın qatıldığını, bunun Sovet İttifaqının süqutundan sonra ən genişmiqyaslı təlimlər olduğunu yazır.
ABŞ-ın "The Daily Beast" nəşrinin məqaləsində isə deyilir ki, Rusiyanın Sankt-Peterburq şəhərində "Zenit-Arena" stadionunun tikintisini aparan menecerlərə Fövqəladə Hallar Nazirliyindən xəbərdarlıq gəlib ki, dərhal layihədə düzəliş edilsin və müharibə zamanı insanların sığınması üçün bunker inşa edilsin. Rusiyada 2018-ci ildə keçiriləcək Futbol üzrə Dünya Çempionatı üçün tikilən stadion şəhərdən kənarda yerləşir. Lakin FHN xəbərdarlıq edir ki, nüvə hücumu zamanı stadion "potensial dağıntı və radioaktiv çöküntü zonasında" yerləşəcək. O da xatırlanır ki, bu günlərdə Rusiya prezidenti Vladimir Putin hərbi təyinatlı plutonium ehtiyatlarının ləğvinə dair ABŞ-la imzalanmış müqavilədən çıxmaq barədə qərar verib. Bu, Birləşmiş Ştatlarla Rusiya arasında gərginliyin getdikcə artdığı, Rusiyanın "nüvə dəyənəyi"ni getdikcə daha tez-tez yellədiyi bir vaxtda baş verir. Rusiya İctimai Palatasının üzvü Sergey Markov bildirir: "Bu, Moskva ilə Vaşinqton arasında son onilliklər ərzində ən ciddi gərginlikdir. Müharibə hətta ABŞ-dakı noyabr seçkilərinə qədər başlaya bilər".
"Business Insider" saytı da Rusiyanın nüvə müharibəsinə hazırlaşdığını yazır. Sayt Rusiya ilə ABŞ arasında Suriya danışıqlarının uğursuzluqla nəticələnməsindən sonra Moskvanın nüvə silahının yayılmaması haqda razılaşmadan çıxdığını, sonra da nüvə başlıqlı raketlərini Kalininqrada, Avropa ilə sərhədə yerləşdirdiyini xatırladır. Rusiyanın xarici işlər nazirinin müavini Sergey Ryabkov isə bu günlərdə Federasiya Şurasının xarici əlaqələr komitəsində çıxışında deyib ki, ABŞ Moskvaya qarşı sanksiyalarını artırsa, onlar da "qeyri-simmetrik" tədbirlər görəcək. Ryabkov bildirib ki, ABŞ Rusiyaya qarşı sanksiyalar siyasətini çoxdandır yürüdür: "Biz bu müddətdən müəyyən araşdırma aparmaq və məhdudiyyətlər artdığı halda adekvat cavab verməkdən ötrü bəzi tədbirlər planı hazırlamaq üçün istifadə etdik".
Nahid SALAYEV
