Vüqar Həsənli: "Bu faktor isə Amerikanın əsrlərdən bəri formalaşmış seçki ənənələrinin dəfni kimi də qiymətləndirilə bilər"
Respublikaçılar Partiyasından ABŞ prezidentliyinə namizəd olan Donald Tramp rəqibi Hillari Klintonun prezident seçiləcəyi halda aparacağı siyasətin ölkəni üçüncü dünya müharibəsinə sürükləyə biləcəyini bəyan edib. Bu barədə Tramp "Reuters"ə müsahibəsində bildirib.
"Klintonun Suriyaya dair heç bir planı yoxdur. Onun prezident seçilməsi üçüncü dünya müharibəsi ilə nəticələnəcək. O, Liviyada nə etdiyini bilmir", - deyə Tramp vurğulayıb.
Tramp, eyni zamanda, ölkə KİV-ini seçkiqabağı kampaniyanı qərəzli işıqlandırmaqda ittiham edib. Onun sözlərinə görə, ABŞ KİV-ində korrupsiya tüğyan edir.
"Biz birlikdə fırıldaqçı və korrupsiyaya düçar olan mediaya qalib gələcəyik. KİV əməkdaşlarından çox rüşvətxor yoxdur. Hamısı olmasa da, əksəriyyəti elədir. Onlar korrupsiyalaşmış qruplardır".
Qeyd edək ki, Tramp seçki siyahılarından ölmüş adamların adının çıxarılmadığını da bildirib və bəyan edib ki, bütün bu faktorlar seçkinin demokratikliyini şübhə altına salır.
Dünyaya seçki mədəniyyəti, söz azadlığı və demokratik dəyərlərdən dərs keçən ABŞ-ın özündə belə halların olması necə dəyərləndirilə bilər?
Seçki məsələləri üzrə ekspert Vüqar Həsənli qəzetimizə açıqlamasında bildirdi ki, ABŞ-da prezident seçkiləri ərəfəsində demokratlar və respublikaçılar arasında siyasi mübarizənin get-gedə daha da qızışması bir sıra mətləblərə işıq salır: "Xüsusilə prezidentliyə namizədlər - Hillari Klintonla Donald Tramp arasında yaşanan olaylar və bu olaylar çərçivəsində irəli sürülən ağlasığmaz ittihamlar amerikalı seçicilərin də böyük təəccübünə səbəb olmaqdadır. Hətta belə hesab etmək olar ki, Amerika tarixində budəfəki postseçki dövrü kimi heç bir dövr olmayıb. Tərəflər bir-birini korrupsiyada, siyasi manipulyasiyalarda, seçiciləri müəyyən vasitələrlə ələ almaqda və s. ittiham etməklə, əslində, ABŞ-ın mövcud siyasi mənzərəsini göz qarşısına qoyur. Ümumiyyətlə, baş tutan hər bir debat sensasiyalı və təəccüblü nəticələrlə başa çatır. Artıq istər respublikaçıların, istərsə də demokratların tərəfdarları Klinton-Tramp mübarizəsini sivil-demokratik ənənələrə sahib rəqabət kimi deyil, aşkar düşmənçilik kimi qəbul etməyə başlayıb. Bu faktor isə Amerikanın əsrlərdən bəri formalaşmış seçki ənənələrinin dəfni kimi də qiymətləndirilə bilər. Ortada olan iddialar, faktlar və dəlillər də bu cür düşünməyə zəmin yaradır.
Trampın növbəti ittihamı seçici qeydiyyatı ilə bağlıdır. O bildirir ki, hətta qeydiyyata alınmamalı olan seçicilər belə qeydiyyata alınıb ki, burada Klinton düşərgəsinin "ölü canlar"dan istifadəsinə eyham vurulub. Bütün bu faktorlar sübut edir ki, ABŞ-dakı demokratiyanın vəziyyəti heç də digər ölkələrin nümunə götürəcəyi dərəcədə deyil".
Məhəmmədəli QƏRİBLİ
