Şimal qonşumuzun hərb müstəvisində atdığı addımlar Qərb dünyasında getdikcə daha böyük narahatlığa və təşvişə yol açmaqdadır. Hazırda bu narahatlığı artıran başlıca məqam Rusiyanın Şimal donanmasının hamısını, Baltik donanmasının isə böyük qismini Hələb uğrunda gedən döyüşlərdə həlledici zərbəni endirmək üçün Suriya sahillərinə cəmləşdirməsidir.
Hazırda "Admiral Kuznetsov" təyyarədaşıyanının başçılığı ilə gəmi qruplaşması Aralıq dənizinə doğru üzür. Təyyarədaşıyanın göyərtəsində Hələbə zərbə endirmək üçün qırıcı-bombardmançı təyyarələr var.
Qeyd olunduğu kimi isə, Rusiyanın Suriyaya doğru hərəkət edən və içində nüvə başlığı daşıyan gəminin də olduğu hərbi donanması NATO-da təşviş yaradıb. Çünki "Admiral Kuznetsov" təyyarədaşıyan gəmisinin başçılıq etdiyi qrupda nüvə başlıqları daşıyan "Pyotr Velikiy", həmçinin "Severomorsk" və "Admiral Kulakov" sualtı gəmiləri var. Sözügedən gəmilər Dover boğazından keçərək Suriyaya gedəcək. İngiltərə mediasının məlumatına görə, rus donanması Şotlandiya sahillərində Kraliça donanması və Norveç tərəfindən izlənir.
"Daily Mail" qəzeti yazır ki, rus donanmasındakı SU-33 döyüş təyyarələri və KA-27 helikopterləri havaya qalxaraq uçuşlar həyata keçirib. Təlim uçuşları İngiltərə və Norveç tərəfindən gərginliklə qarşılanıb. Məlumata görə, rus helikopterləri NATO gəmilərinin yaxınından uçub. Buna qarşılıq olaraq, İngiltərə və Norveç təyyarələri də havada manevrlər edib. NATO hərbi gəmiləri isə rus donanmasının yaxınlığına qədər üzüb. "Daily Mail" bunu Rusiya və NATO-nun bir-birinə "əzələ nümayişi" kimi dəyərləndirib. Hazırda belə vəziyyət Qərbdə ciddi narahatlığa yol açır. Burada hesab olunur ki, Kreml həm Avropada, həm də Suriyada durdurulmalıdır. Avropa Şurasının prezidenti Donald Tusk qeyd edir ki, Rusiya və Əsəd rejiminin Hələbdəki fəaliyyətinə son qoymaqdan ötrü Avropa Birliyi bütün variantları nəzərdən keçirir. Onun sözlərinə görə, Avropa Birliyi Hələbdəki vəhşiliyin dayandırılmasını tələb edir. Bundan başqa, digər cavab tədbiri kimi, NATO tərəfindən Litvada uzaqmənzilli "Patriot" raketlərinin yerləşdirilməsi müzakirə edilir. Litvanın Baş Qərargah rəisi Vitaliyus Vaykşnorasın sözlərinə görə, tezliklə "Patriot" raketləri ilə silanlanmış NATO batalyonu Litvada yerləşdiriləcək. Ümumiyyətlə, NATO Baltik regionunda əsas qüvvələrini 2017-ci ilin mayında yerləşdirəcək. "The Wall Street Journal" qəzetinin verdiyi məlumata görə, bəzi hərbi hissələr dislokasiya yerlərinə əsas qüvvələrdən öncə yerləşdiriləcək.
Qeyd edək ki, NATO Hərbi Komitəsinin son iclasında Baltikyanı ölkələrdə və Polşada 4 min NATO hərbçisinin yerləşdirilməsi məsələsi müzakirə edilib. Latviyaya isə Kanada, Litvaya Almaniya, Estoniyaya Böyük Britaniya, Polşaya ABŞ öz hərbçilərini göndərəcək. Polşada ABŞ-ın Almaniyanın Filzek şəhərindəki ikinci alayı yerləşdiriləcək. Bu qüvvələr təlim məqsədilə göndərilmir, müdafiə, lazım gələrsə, hücum vasitəsi rolunu oynamalıdırlar.
Kreml isə cavab olaraq "İsgəndər" operativ-taktiki raketlərini NATO-nun şərq sərhədlərinə göndərib. Bundan əvvəl də ABŞ-ın kəşfiyyat peykləri "İsgəndər"lərin Kalininqrad vilayətində yerləşdirildiyini qeydə alıb. Daha sonra Rusiya Müdafiə Nazirliyi faktı təsdiq edib. Baltik ölkələri də daxil olmaqla, NATO-nun Şərqi Avropadakı üzvləri, o cümlədən İsveç və digər Skandinaviya ölkələri bu raketlərin təsir zonasına düşür. Rusiya raketlərin Kalinqradda yerləşdirildiyini təsdiq etməklə yanaşı, bu raketlərin imkanlarını da geniş təbliğ edir.
Bundan əlavə, İsveçrə mətbuatına müsahibəsində Rusiya Federasiya Şurasının sədri Valentina Matvienko açıq etiraf edib ki, Rusiya Krımı NATO gəmilərinin Sevastopolda özlərinə yer edəcəklərindən qorxduğu üçün anneksiya edib. Onun sözlərinə görə, Rusiya NATO-nun Krımda özünə yer etməsinə heç vaxt imkan verə bilməzdi: "Ukrayna 2014-cü ildə artıq NATO-ya qoşulmaq istədiyini bəyan etmişdi. O zaman Alyans bizə Ukraynanın NATO-dan kənar qalacağına dair zəmanət verməmişdi. Nəticədə bir neçə ay sonra NATO gəmiləri Sevastopoldakı limanlarımız qarşısında peyda oldular. Rusiya buna imkan verə bilməzdi". Hazırda Rusiya Krımda da NATO-ya qarşı əlavə qüvvələr yerləşdirməklə məşğuldur. Bu isə NATO-nun əlavə cavab tədbirləri görməsi ilə müşayiət olunur. Bütün bunlar da NATO və Ruciya arasında hərbi müstəvidə üz-üzə gəlmə ehtimalını daha da artırır.
Nahid SALAYEV
