Kreml Suriya hökumətinin razılığı ilə bu ölkədə yeni həlledici zərbəyə hazırlaşır. Hesab edilir ki, bu həlledici zərbə istənilən nəticəni versə, Rusiya Yaxın Şərqdə əsas söz sahibinə çevrilərək ABŞ-ı və digər Qərb ölkələrini burada sıxışdıra biləcək.
Qərb isə Moskvanı yeni sanksiyalarla Suriyada hərbi əməliyyatlardan çəkindirməyə çalışsa da, istədiyi nəticəyə nail ola bilmir. Əksinə, görünən odur ki, Kreml Yaxın Şərqdə sürətlə mövqeləri möhkəmləndirir. Bundan məmnun qalan əsas tərəflərdən biri isə rəsmi Dəməşqdir. Suriya parlamentinin sədri Hədiyə Abbas bu xüsusda bildirir: "Biz həmişə inanmışıq və bilmişik ki, Rusiya bizimlə olacaq, bizə dəstək verəcək, öz milli maraqlarına və Suriyanın milli maraqlarına uyğun olan mövqe tutacaq". Rusiya Hava-kosmik Qüvvələrinin Suriyada antiterror əməliyyatlarına başlamasının birinci ildönümü ilə bağlı danışarkən o qeyd edib ki, Rusiya hər zaman aqressiyaya məruz qalanların, əzilənlərin tərəfindən çıxış edir. Bununla da göstərir ki, beynəlxalq arenada Rusiya kimi avtoritetin olması şübhə doğurmur və Rusiyanın maraqlarını rədd etmək olmaz: "Biz bütün məsələlərdə Rusiyaya etibar edirik. Biz görürük ki, Rusiyanın xarici işlər naziri Lavrov Suriyanın maraqlarını necə öz ölkəsinin maraqları kimi müdafiə edir. Rusiya prezidenti Suriyanı öz ölkəsini müdafiə edirmiş kimi müdafiə edir. Bizim dostluğumuz və hərbi qardaşlığımız bizim müdafiəçilərimizin, döyüş meydanlarında ölmüş qəhrəmanlarımızın qanı ilə bağlıdır. Əlbəttə, bizim əlaqələrimiz başqa cür də ola bilməz. Bizim vahid məqsədimiz, bütün bəşəriyyəti təhdid edən şərə qarşı vahid cəbhəmiz var".
Bu fonda isə bəlli olub ki, Rusiya Şimal donanmasının hamısını, Baltik donanmasının isə böyük qismini Hələb uğrunda gedən döyüşlərdə həlledici zərbəni endirmək üçün Suriya sahillərinə cəmləşdirir.
NATO-dakı yüksək rütbəli mənbə kəşfiyyat məlumatlarına istinadən "Reuters"ə bildirib ki, hazırda "Admiral Kuznetsov" təyyarədaşıyanının başçılığı ilə gəmi qruplaşması Aralıq dənizinə doğru üzür. Təyyarədaşıyanın göyərtəsində Hələbə zərbə endirmək üçün qırıcı-bombardmançı təyyarələr var: "Onlar bütün Şimal donanmasını və Baltik donanmasının böyük qismini səfərbər edib, soyuq müharibə dövründən bu yana ən irimiqyaslı dəniz qüvvələri cəmləşdirməsini həyata keçirib". NATO rəsmisi bu günlərdə Norveç sahillərində qeydə alınmış Rusiya gəmilərinin Aralıq dənizinə doğru üzdüyünü deyib: "İki həftə sonra biz Hələbə hava hücumlarının kəskin artmasını müşahidə edəcəyik. Bu, Rusiyanın Hələbdə qələbəni elan etməsi üçün strategiyasının bir hissəsidir".
Gözlənir ki, Moskva Suriyaya yenə Xəzərdən də zərbə endirsin. Belə ki, Rusiyanın Xəzər donanmasının gəmiləri toplanış səfəri çərçivəsində İranın Bəndər-Ənzəli limanına yollanıb. Məlumata görə, Rusiya Xəzər donanmasının "Tatarıstan" və "Qrad Sviyajsk" raket gəmiləri Xəzər dənizində toplanış səfərini davam etdirir. Heyətlər artıq silahların istifadəsi və şərti düşmənin raket zərbələrindən yayınmaya dair təlimlər keçirib. Kreml bildirir ki, hazırda Xəzər donanmasının gəmiləri iki ölkənin donanmasının inkişafı və onların əməkdaşlığının möhkəmləndirilməsi çərçivəsində İranın Bəndər-Ənzəli limanına yan alıb". Rusiya Xəzər donanması üçün ən rahat yer Xəzərin İran ərazisindən Suriyaya zərbə vurmaqdır. Gözlənir ki, Kreml İranın razılığı ilə yenidən bunu etsin.
Qeyd edək ki, Rusiya prezidenti Vladimir Putin və Suriya prezidenti Bəşər Əsəd arasındakı telefon danışığında da hazırlanan Hələb əməliyyatı müzakirə olunub. Suriya lideri ayrı-ayrı ölkələrin təzyiqlərinə baxmayaraq, Rusiyanın beynəlxalq hüquqa riayət etdiyini və dövlət müstəqilliyinə hörmət göstərdiyini bildirib. Putin Suriyadakı vəziyyət barədə Kremlin mövqeyinin qəti olduğunu və Rusiyanın terrorizmlə mübarizəni davam etdirəcəyini bildirib. Rusiya prezidentinin mətbuat katibi Dmitri Peskov isə bildirib ki, söhbət zamanı Hələb ətrafında və ümumilikdə Suriyadakı vəziyyət müzakirə olunub.
Moskva Suriyada hərbi irəliləyiş əldə etdiy vaxtda Qərb qüvvələrinin əsas diqqətlərini yönəltdiy İraqın Mosul şəhəri ilə bağlı yeni sensasion məlumatlar üzə çıxıb. Rusiya Silahlı Qüvvələri Baş Qərargahının rəisi, ordu generalı Valeri Gerasimov əslində Mosulda hansısa hərbi əməliyyatların başlmadağını bildirib:
"İraqın Mosul şəhərinin İŞİD terrorçularından azad edilməsi ilə bağlı genişmiqyslı əməliyyatın getdiyi deyilir. Fotolar, videolar yayılır, nümayiş olunur. Amma biz tam əminliklə bəyan edirik ki, Mosul əməliyyatı hələ başlanmayıb". Gerasimovun sözlərinə görə, Rusiya Mosul ətrafındakı prosesləri kosmosdan kəşfiyyat peykləri, səmadan isə pilotsuz uçan aparatlar (PUA) vasitəsilə izləyir: "Hazırda Mosul səmasında 10 PUA-mız var. Kosmosdakı peyklər vasitəsilə də situasiyanı müşahidə edirik. Bizdə olan məlumatlara görə, İŞİD terrorçuları Mosulu tərk edərək Suriyaya keçə bilərlər. Mosulda İŞİD-ə qarşı döyüşən güclər buna imkan verməməlidir. Terrorçular yerindəcə məhv olunmalıdır". Onun sözlərinə görə, Mosul əməliyyatı ilə bağlı yayılan gurultulu xəbərlər həqiqətəuyğun deyil: "Əməliyyat əslində başlanmayıb. Hazırda artilleriya atışları, hava bombardmanları həyata keçirilir, Mosul ətrafında qüvvələr toplanır"
Nahid SALAYEV
