Məhərrəm Zülfüqarlı: "Putin demək istəyir ki, Qərbin səylərinə rəğmən, Rusiyanın regionda nüfuzu və təsir imkanları praktiki baxımdan daha böyükdür"
Oktyabrın 18-də Belarusun paytaxtında, MDB İcraiyyə Komitəsində Birliyin iştirakçısı olan ölkələrin qurumun nizamnamə və digər orqanları yanında Daimi Səlahiyyətli Nümayəndələr Şurasının iclası keçiriləcək.
Əvvəlcə Rusiya Federasiyasının (RF) daimi nümayəndəsi Andrey Şvedov həmkarlarına Rusiya prezidenti Vladimir Putin tərəfindən təsdiq edilmiş 2017-ci ildə RF-nin MDB-yə sədrliyi Konsepsiyasını təqdim edəcək.
Bundan əlavə, daimi səlahiyyətli nümayəndələr MDB-nin 25 illiyinə həsr olunan tədbirlər planının icrasının gedişini nəzərdən keçirəcək. Planda cari ildə 29 tədbirin hazırlanması və keçirilməsi nəzərdə tutulur. Oktyabrın 10-na olan vəziyyətə görə, 12 tədbir keçirilib, 13-ü icra mərhələsindədir, 4-ü obyektiv səbəblərə görə ləğv edilib.
Bu arada Rusiya prezidenti Vladimir Putin mətbuata açıqlamasında maraqlı məqamlara toxunub. Onun sözlərinə görə, Rusiyanın hətta Kollektiv Təhlükəsizlik Müqaviləsi Təşkilatına üzv olmayan bəzi MDB ölkələri ilə elə münasibətlər var ki, heç NATO-nun üzvü olan ölkələrin öz arasında elə münasibət yoxdur. Maraqlıdır, bununla Putin nə demək istəyib?
Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, bununla Putin ikitərəfli münasibətlərin üstün olmasına eyham vurub: "Həqiqətən MDB-də elə ölkələr var ki, KTMT-də təmsil olunmur. Ancaq nəinki Rusiyanın, eləcədə digər KTMT üzvü olan dövlətlərin sözügedən ölkələrlə münasibətləri çox yüksək səviyyədədir. Söhbət yüksək səviyyəli ikitərəfli əlaqələrdən gedir. Məsələn, Azərbaycan KTMT üzvü deyil, amma bu qurumda təmsil olunan Rusiya, Belarus və Qazaxıstanla çox yüksək səviyyəli münasibətlərə malikdir. O cümlədən KTMT-də təmsil olunmayan Türkmənistanın Rusiya ilə münasibətləri yaxşı səviyyədədir. Ancaq Türkiyə NATO üzvü olsa da, bu dövlətin ABŞ və bəzi blok üzvləri ilə münasibətləri elə də yüksək səviyyədə deyil. Görünür, Putin həm də buna eyham vurub. Görünən odur ki, Putin son dövrlər son dərəcə aktiv siyasət yürüdür. İstər regionda, istərsə də Yaxın Şərqdə. Putin demək istəyir ki, Qərbin səylərinə rəğmən, Rusiyanın regionda nüfuzu və təsir imkanları praktiki baxımdan daha böyükdür". Vidadi ORDAHALLI
