Tarixi referendumla Avropa Birliyindən ayrılmağa (Brexit) qərar verən Böyük Britaniya, üç əsr əvvəl ələ keçirdiyi Cəbəllütariq boğazına görə, İspaniya ilə üz-üzə gəlir. Baki-xeber.com xəbər verir ki, ancaq buradakı hakimiyyətindən imtina etmək niyyətində olmayan London rəhbərliyi, Cəbəllütariq hərbi limanına sualtı gəmi yerləşdirərək burada hərbi gücünü artırmağa başlayıb.
Qeyd edək ki, İspaniyanın xarici işlər naziri Jose Manuel Qarsia Marqallo referendumdan dərhal sonra Cəbəllütariqdə İspan bayrağının dalğalanmasını görmək istədiklərini deyib: "Brexit, Cəbəllütariq üçün uzun müddətdir görülməyən yeni fürsətlər yaradıb".
İngiltərə xarici işlər naziri Philip Hammond Brexit qərarının ardından Cəbəllütariqin maraqlarını qorumağın çətinləşəcəyini bildirib: "Cəbəllütariqin yanında olacağıq və xalqın istəyi xaricində müstəqillik müzakirələri aparmayacağıq, ancaq onların maraqlarını qorumaq çətinləşəcək".
İngiltərə artıq bölgəyə "HMS Ambush” adlı sualtı gəmi də göndərib.
Qeyd edək ki, iyunun 23-də keçirilən AB referendumu zamanı Birləşmiş Krallığın nəzarətində olan Cəbəllütariqdəki seçicilərin 96 faizi AB-də qalmağı dəstəkləyib. Ancaq Birləşmiş Krallıqda xalqın 52 faizi AB-dən çıxmaq qərarını seçib.
Üç əsr ərzində ingilislərin "Ağ qitə"də yeganə müstəmləkəsi olan bölgənin əhalisi çoxmillətlidir. Müxtəlif tarixlərdə koloniyalar şəklində yayılan ingilis əhalisi ilə yanaşı portuqal, ispan, italyan və maltalılar da üstünlük təşkil edir. 30 min adamın yaşadığı bu bölgə Avropanın əksər hissəsinə nisbətən yüksək iqtisadi tərəqqi və işsizliyin aşağı olması ilə diqqəti çəkir. Əsas gəlir mənbəyi turizm, ticarət, bank, online qumar, rabitə və dənizçilikdir.
İspaniyanın cənubunda olan 6,8 kvadrat kilometrlik ərazinin kimə aid olması İspaniya ilə İngiltərə arasında tez-tez gərginliyə səbəb olur.
İspaniya, 1713-cü ildə Utrext sülh müqaviləsi ilə Cəbəllütariqi İngiltərəyə vermişdi. 1950-ci illərdə isə İspan General Fransisko Franko, Cəbəllütariqin İspaniyanın suverenliyində olduğunu bildirmiş və 13 il ərzində İspaniyanın Cəbəllütariq sərhədini bağlamışdı. 1967 və 2002-ci illərdə keçirilən iki referendumla Cəbəllütariq xalqının əksəriyyəti İngiltərənin suverenliyində qalmağı seçmişdi.