Türkiyə və İsrail münasibətlərin normallaşdırılması ilə bağlı razılıq əldə edib. İyunun 28-də iki ölkə bununla bağlı saziş imzalayacaq. Razılaşmanın detalları da açıqlanıb.
Baki-xeber.com xəbər verir ki, Türkiyənin baş naziri Binəli Yıldırım bildirib ki, Türkiyə Xarici İşlər Nazirliyinin müşaviri ilə israilli həmkarı arasında sənəd imzalanacaq. Bunun ardınca, sənəd Türkiyə parlamenti və İsrail Nazirlər Kabineti tərəfindən ratifikasiya olunacaq. Məhz bundan sonra, iki ölkə arasında münasibətlərin normallaşması prosesi rəsmən başlamış olacaq.
Baş nazirin sözlərinə görə, sənəd ratifikasiya olunandan sonra hər iki ölkənin səfirlərinin fəaliyyəti aktivləşdiriləcək: "2010-cu ildən başlayan böhranın həllinin bu qədər uzun sürməsinin səbəbi Fələstinlə əlaqədardır. Biz Fələstin məsələsində də nəticələr əldə olunmasının tərəfdarı olmuşuq. Razılaşmada da bununla bağlı müddəlar var. Əsas məsələlərdən biri Qəzzanın su və elektrik enerjisi ilə təchizatıdır. İsrail bu müddəaya razılığını bildirib”.
B.Yıldırım bildirib ki, "Mavi Marmara" insidentinə görə, İsrail Türkiyədən üzr istəyib: "Sazişə əsasən, İsrail hakimiyyəti ölənlərin ailələrinə 20 milyon dollar məbləğində təzminat verəcək, həmçinin İsrail blokadasında olan Qəzza sektoruna Türkiyə tərəfdən humanitar yardımların daşınmasına icazə verəcək. Qarşıdakı cümə günü Mersin limanından humanitar yardımlar göndərəcəyik".
Baş nazirin sözlərinə görə, Qəzzada inşa olunan Türkiyə-Fələstin dostluq xəstəxanasının qısa vaxtda açılması ilə də bağlı razılıq əldə edilib.
O qeyd edib ki, saziş üç məsələ baxmından çox əhəmiyyətlidir: "Birincisi, "Mavi Marmara" olayına görə, İsrailin Türkiyədən üzr istəməsi, ikincisi, gəmidə həlak olmuş Türkiyə vətəndaşlarına təzminat ödəməyə razılıq verməsi, üçüncüsü isə, Fələstinə tətbiq olunmuş embarqonun yumşaldılmasıdır".
Bundan başqa, razılaşmada İsrail qazının Türkiyə üzərindən Avropa nəqli də əksini tapıb.
Baş nazirinin sözlərinə görə, saziş qüvvəyə mindikdən sonra Türkiyə İsrailə səfir də təyin edəcək.
İsrailin Baş naziri Benyamin Netanyahu isə öz növbəsində bəyan edib ki, bu sazişin ölkəsinin iqtisadiyyatına böyük təsiri olacaq. Xüsusilə, İsrail hakimiyyəti Türkiyə vasitəsilə Avropaya qaz tədarükünü təşkil etmək niyyətindədir.
Ancaq Netanyahu Qəzzadakı mühasirənin aradan qaldırılmayacağını da deyib: "Türkiyə ilə razılaşmadan sonra da İsrailin Qəzzaya tətbiq etdiyi dəniz mühasirəsi davam edəcək".
Bunla bağlı jurnalistlərin suallarını cavablandıran Türkiyə baş naziri isə, "Biz əlaqələrin normallaşdırılmasından danışırıq. Bu proses başlasın, hansı mövzuda nə qədər əməkdaşlıq edəcəyimiz iki ölkənin səylərindən asılı olacaq. Əsas hədəf Qəzzadakı qardaşlarımızla əlaqə yaratmağa nail olmaqdır. Hadisəni belə görmək lazımdır"deyə cavab verib.
Qeyd edək ki, iki ölkə arasında əlaqələr 2010-cu ildə "Azadlıq donanması" ilə bağlı baş vermiş insidentdən sonra pisləşmişdi. Həmin insident zamanı Qəzza sektoruna istiqamət almış gəminin 9 türkiyəli üzvü İsrail hərbçiləri tərəfindən öldürülmüşdü.