Moskva Dövlət Universitetinin Tarix fakültəsinin dosenti İsmayıl Ağakişiyev Azərbaycan və Ermənistan arasında atəşkəsin deyil, sülhün təmin edilməsinin vacib olduğunu deyir. Baki-xeber.com xəbər verir ki, Qafqaz regionu üzrə ekspert Ağakişiyev bu barədə Moskvada keçirdiyi mətbuat konfransında deyib.
Azərbaycanın Qarabağ bölgəsində yaşanan son hadisələrə toxunan Ağakişiyev bütün dünyanın Dağlıq Qarabağı Azərbaycanın torpağı kimi tanıdığını bildirib: "Dünya ictimaiyyətinə səhv məlumatlar çatdırılır. Ancaq bütün dünya Dağlıq Qarabağı Azərbaycanın torpağı kimi tanıyır. Hətta Ermənistan da...
Azərbaycan Dağlıq Qarabağ xaricindəki Ermənistan hərbi birləşmələrinin işğal etdiyi 7 bölgənin geri qaytarılmasını tələb edir. İllərdir bu danışıqlar davam edir. Amma danışıqlar xatirinə danışıqların aparılması Azərbaycan xalqının səbrini daşırır. Bu problemi gələcək nəsilə buraxmaq lazım deyil. Ermənistan ordusu Azərbaycan torpaqlarını işgal edib. Buna göz yummaq necə mümkün olar? Bu hansı beynəlxalq qanunda yazılıb? Hansı dövlət bu vəziyyətə düşmək istəyər? Yaxşı, niyə Azərbaycan bu vəziyyətə səssiz qalmalıdır? Düşünün ki, Rusiya ərazisini başqa bir dövlətin hərbi birliyi işğal edib. Tarixdə dəfələrlə olduğu kimi, Rusiya xalqı ola biləcək bu vəziyyətdə də işgalçı orduya qarşı nə lazımdırsa edər. Qarabağ daxil Azərbaycanda yaşayan erməni xalqı ilə heç bir problemimiz yoxdur. Problem Ermənistanın işğalçı ordusudur. Onlar Azərbaycanın işğal edilmiş torpaqlarını tərk etməlidir. Qarabağın Şuşa şəhəri Azərbaycanın ürəyidir. İnsan ürək olmadan necə yaşayar? Azərbaycan da Şuşa olmadan yaşaya bilməz”.
İ.Ağakişiyev ermənilərin Qafqaza köçürülməsinin tarixi mövzusuna da toxunub: "Rusiyalı diplomat Aleksandr Qriboyedov öz məqalələrində yazırdı: "Biz çox qorxurduq ki, bu ərazilərdəki azərbaycanlılar erməniləri qəbul etməyəcəklər, fikirləşəcəklər ki, bir vaxt onlar həmin ərazilərə iddia edəcəklər". Qriboyedov belə düşünürdü, amma azərbaycanlılar bu cür fikirləşmirdilər".
İ.Ağakişiyev bildirib ki, Azərbaycan xalqı öz torpaqlarının itirilməsi ilə heç vaxt barışmayacaq: "Azərbaycan tarixən haçansa ona məxsus olmuş ərazilərin heç birinə iddia etmir. Azərbaycan öz ərazi bütövlüyünü qoruyub saxlamaq istəyir”.