"Moskva Azərbaycanın ərazi bütövlüyünü dəstəklədiyi halda, Rusiya silahlarının Qarabağda olmasında heç bir məntiq yoxdur"
Azərbaycan Rusiya ilə hərbi sahədə əməkdaşlığı davam etdirməkdə maraqlıdır. Rusiya silahlarının alınmasına dair müqavilələr üzrə həll olunmamış maliyyə məsələlərinin olması barədə yayılan xəbərlər həqiqətə uyğun deyil. APA-nın verdiyi xəbərə görə, bunu Rusiyanın "Kommersant” nəşrinə müsahibəsində Azərbaycan XİN rəhbəri Elmar Məmmədyarov deyib.
"Ödənişlərlə bağlı heç bir problem yoxdur, Rusiya və Azərbaycan arasında həll olunmamış maliyyə məsələlərinin olması barədə məlumat həqiqətə uyğun deyil. Biz sazişlərə uyğun şəkildə bütün ödənişləri vaxtında edirik. Sazişlərin icrası ilə bağlı isə problemlər var: o mənada ki, Azərbaycana tədarük olunan silah müqavilələrdə qeyd olunan parametrlərə uyğun olmalıdır. Dmitri Roqozinin Bakıya səfəri məhz bu parametrlərlə bağlı problemlərə aydınlıq gətirmək məqsədi ilə baş tutmuşdu. Hazırda məsələ ilə bağlı bütün suallara aydınlıq gətirilib”, - deyə nazir qeyd edib.
Nazir qeyd edib ki, Azərbaycanın Rusiya ilə hərbi-texniki əməkdaşlıq sahəsində əlaqələri kommersiya prinsiplərinə uyğun şəkildə və qarşılıqlı sərfəli əməkdaşlıq əsasında uğurla inkişaf edir.
"Rusiya, bir tərəfdən, ATƏT Minsk Qrupunun həmsədri qismində çıxış edir. Digər tərəfdən isə, hər bir dövlət lazım bildiyi ölkəyə silah tədarük etmək hüququ var, biz bunu qəbul edirik. Rusiyaya bir müddət əvvəl təqdim olunan notada xahiş olunub ki, Rusiya Ermənistana silahları tədarük edərkən nəzərə almalıdır ki, həmin silah-sursatların Azərbaycanın işğal olunmuş ərazilərinə ötürülməsinə yol verilməməlidir” - deyə nazir bildirib.
Nazirin sözlərinə görə, bu tip tədarüklərdə "sonuncu istifadəçi” qaydası var: "Sonuncu istifadəçi Ermənistan olacağı təqdirdə məsələ Moskva və İrəvan arasında ikitərəfli münasibətlər çərçivəsindən kənara çıxmazdı. Lakin, silahlar Azərbaycanın işğal olunmuş ərazilərində peyda olduqda, bu artıq tam başqa məsələyə çevrilir”.
Azərbaycan XİN rəhbərinin sözlərinə görə, Moskva Azərbaycanın ərazi bütövlüyünü dəstəklədiyi halda, Rusiya silahlarının Qarabağda olmasında heç bir məntiq yoxdur: "Rusiya XİN-də təqdim etdiyimiz notanın tonunun düzgün qəbul edildiyi Moskvanın sonrakı bəyanatlarından bəlli oldu”.
Təmas xəttində atəşkəsin pozulmasına nəzarət mexanizminin yaradılması ilə bağlı sualı cavablandıran XİN rəhbəri bildirib ki, atəşkəsin pozulması hallarının qurbanları arasında böyük çoxluğu Azərbaycanın mülki əhalisi təşkil edir”.
E. Məmmədyarov qeyd edib ki, azərbaycanlı əhali uzun əsrlərdir yaşadığı torpaqlarından sadəcə azərbaycanlı olduqları üçün didərgin salınıblar.
"Bu cür mexanizmin yaradılmasının labüdlüyü məsələsini Ermənistan məqsədli şəkildə gündəliyə salmaq istəyir. Bu, münaqişənin hərtərəfli siyasi-hüquqi həllindən diqqəti yayındırmaq, status-kvonu saxlamaq və Azərbaycan ərazilərinin işğalını davam etdirmək üçün Ermənistana lazım olan texniki məsələdir. Biz əvvəllər də demişik ki, insidentlərin araşdırılması mexanizmi erməni silahlılarının oradan çıxarılması prosesindən sonra baş verə bilər. Erməni silahlılar Azərbaycan ərazilərini tərk etməlidirlər. Bununla insidentlər bitəcək, araşdırılmalı nə isə qalmayacaq”, - deyə o bildirib.
E. Məmmədyarovun sözlərinə görə, münaqişənin həll edilməsi üçün hüquqi əsas BMT Təhlükəsilik Şurasının Ermənistan Silahlı Qüvvələrinin Azərbaycanın işğal edilmiş ərazilərindən tamamilə və qeyd -şərtsiz çıxarılması barədə qətnamələri əsasında çoxdan müəyyən edilib: "Minsk qrupunun həmsədrləri mandatlarına uyğun olaraq tutarlı tədbirlər görməli və erməni tərəfindən üzərinə götürdüyü öhdəlikləri yerinə yetirməsini tələb etməlidir. Lakin İrəvan istənilən şəkildə bu prosesə əngəl törədir, həmsədrlər də bunu çox yaxşı bilirlər”.
E. Məmmədyarov bildirib ki, Rusiya - Türkiyə münasibətlərindəki gərginlik Bakı və Moskvanın münasibətlərinə təsir etmir”. E. Məmmədyarov qeyd edib ki, rus-türk münasibətlərinin qısa müddət ərzində normallaşmasında Rusiya və Türkiyə ilə dost münasibətləri olan Azərbaycan hamıdan çox maraqlıdır: "Bu məsələdə vasitəçilik ifadəsi çox yüksək səslənir. İstənilən halda, mən bunu həm türk, həm də rusiyalı həmkarımla müzakirə edirəm. Türkiyə tərəfindən Rusiya təyyarəsinin vurulması hadisəsindən sonra biz dəfələrlə bu məsələni Serqey Lavrovla müzakirə etmişik. Qarşılıqlı anlaşmaya nə qədər tez nail olunsa, hamı üçün bir o qədər yaxşı olacaq”.
Rusiya xarici işlər naziri ilə növbəti görüşlərində ikitərəfli əməkdaşlıq, əsasən də, Ermənistan-Azərbaycan münaqişəsinin nizamlanmasının müzakirə ediləcəyini bildirən E. Məmmədyarov "Şimal-Cənub” nəqliyyat dəhlizi ilə bağlı məsələnin də gündəlikdə olduğunu qeyd edib.