Faiq Balabəyli: "BMT BTQ-nin çağrışlarını həyata keçirmək üçün təxirəsalınmadan mexanizmlər hazırlamalıdır”
7-9 avqust tarixlərində Korsikanın Korti şəhərində Korsikanın müstəqilliyi uğurunda mübarizə aparan “Nazione” siyasi hərəkatının təşkilatçılığı ilə “Beynəlxalq Günlər” adlı tədbirin növbəti, 44-cü buraxılışı keçirilib. Bu barədə Bakı Təşəbbüs Qrupundan (BTQ) məlumat verilib.
Tədbirin yekununda Beynəlxalq Dekolonizasiya Cəbhəsi tərəfindən "Korte Bəyannaməsi" qəbul edilib.
Bəyannamədə qeyd olunur ki, Fransa dövlətinin idarəçiliyi altında olan bütün fərqli coğrafi ərazilərdə yerli xalqların fundamental hüquqlarını və suverenliyini tapdalayan eyni kolonial istismar mexanizmləri tətbiq olunmaqdadır. Rəsmi Parisin yürütdüyü məqsədyönlü mövcud iqtisadi siyasətin yerli sərvətləri amansızcasına taladığı, ərazilərdə süni bahalıq yaratdığı və kütləvi işsizlik formalaşdıraraq gəncləri öz doğma yurdlarından uzaqlaşmağa, mühacirətə və ya sosial müavinətlərdən asılı yaşamağa məhkum etdiyi kəskin şəkildə vurğulanır.
Bununla yanaşı, Fransa “ədalət” sisteminin birbaşa himayəsi və şərikliyi ilə yerli əhalinin torpaqlarının müsadirə edildiyi, xarici maraqlara xidmət edən spekulyasiyalara yol açıldığı və demoqrafik strukturu dəyişərək yerli xalqları öz vətənlərində azlığa çevirmək məqsədilə planlı şəkildə "məskunlaşdırma kolonizasiyası"nın davam etdirildiyi bildirilir. Fransa hakimiyyətinin müstəmləkə əleyhinə mübarizə aparan dinc fəallara və müqavimət hərəkatlarına qarşı qanunsuz güc tətbiq edib onları kriminallaşdırdığı qeyd olunur. Vurğulanır ki, rəsmi Paris Martinik və Qvadelupda on minlərlə insanın həyatına təsir edən qorxulu xlordekon pestisidi zəhərlənməsi cinayəti kimi ağır ekoloji və humanitar skandalların üstünü məhkəmə yolu ilə ört-basdır edərək tam cəzasızlıq mühiti formalaşdırır.
Bəyannamədə Beynəlxalq Dekolonizasiya Cəbhəsi Fransadan tələb edir ki, Fransa dövləti Yeni Kaledoniyadakı (Kanaki) Bujival sazişləri, Korsikadakı Bovo prosesi və digər regionlarda davam edən müzakirələr vasitəsilə bu xalqların milli və siyasi mövcudluğunu danmaq, onları sadəcə hüquqsuz "ada icması" səviyyəsinə endirmək cəhdlərinə dərhal son qoymalıdır. Bu ərazilərin hər birinin beynəlxalq hüquqa və tarixi legitimliyə malik, öz müqəddəratını təyin etmək hüququ olan müstəqil millətlər olduğunu bəyan edir.
Cəbhə, BMT Baş Assambleyasının müstəmləkəçiliyin tamamilə ləğv edilməsini ehtiva edən 75/123 saylı tarixi qətnaməsinə istinad edərək, Fransanın müstəmləkəçiliyi altında yaşayan Dənizaşırı ərazilərin yenidən BMT-nin rəsmi dekolonizasiya olunmalı ölkələr siyahısına salınması üçün qlobal müstəvidə hüquqi, diplomatik və siyasi addımlarını daha da genişləndirəcəyini və bu kollektiv strategiyanı kəsintisiz davam etdirəcəyini elan edir.
Müstəqil.az saytının baş redaktoru Faiq Balabəyli baki-xeber.com-a bildirdi ki, BTQ-nin son illər ardıcıl olaraq həyata keçirdiyi bu fəaliyyət hələ də müstəmləkəçilik siyasəti yürüdən dövlətlərin bu yanlış siyasətdən əl çəkməsinə nail olmağa xidmət edir. “Fransa başda olmaqla hələ də elə dövlətlər var ki, onlar müstəmləkəçilik siyasətini yürütməkdə davam edir. Fransanın dənizaşırı ərazilərindəki neokolonializm siyasəti bütün dünyanı narahat etməlidir. Çünki burada insan hüquq və azadlıqlarının pozulmasından, dövlətlərin müstəqilliyinə qarşı yürüdülən siyasətdən gedir ki, bunu Fransa illərdir həyata keçirir.
BTQ-nin Fransanın dənizaşırı ərazilərindəki neokolonializm siyasətinə qarşı BMT səviyyəsində ardıcıl çağırışlarının nəticəsi mütləq olmalıdır. Dənizaşırı xalqlar öz ərazilərinin müstəmləkə boyunduruğundan azad olunmasını və müstəqil dövlətə çevrilməsini istəyir. Bu onların beynəlxalq hüququla tanınmalı olan istəkləridir. Xalqların azadlıq, müstəqillik arzularını boğmağın özü beynəlxalq hüquqa ziddir.
Bu gün BTQ haqlı olaraq BMT-ni referendumların legitimliyini yoxlamaq, bölgələri dekolonizasiya siyahısına daxil etmək və müstəmləkəçiliyə son qoymaq üçün təcili missiyalar və beynəlxalq mexanizmlər yaratmağa çağırır. Çünki Fransa zaman-zaman o ərazilərdə qondarma seçkilər keçirir, insanların azadlıq arzularını boğur. Buna son qoyulmalıdır. Bu baxımdan hesab edirəm ki, BMT BTQ-nin çağrışlarını həyata keçirmək üçün təxirəsalınmadan mexanizmlər hazırlamalıdır”-deyə F.Balabəyli qeyd etdi.
BMT-nin Fransa müstəmləkəsi altında əziyyət çəkən insanların, istismar edilən ərazilərin harayını eşitməli olduğunu deyən F.Bababəyli vurğuladı ki, BTQ-nin çağrışları müsbət nəticə verəcək və dənizaşırı ölkələr yenidən BMT-nin rəsmi dekolonizasiya olunmalı ölkələr siyahısına istiqamətində addımlar atılacaq. “Fransanın müstəmləkəçilik siyasətinin qarşısının alınması üçün BMT səviyyəsində mühüm addımların atılacağına ümid edirik”-deyə o, vurğuladı.
İradə SARIYEVA
