Züriyə Ruslanqızı: "Bundan sonrakı əsas vəzifə əldə edilmiş siyasi yaxınlaşmanı institusional və iqtisadi məzmunla möhkəmləndirməkdir"
"Fəxrlə deyə bilərik ki, Azərbaycan-ABŞ əlaqələrinin bugünkü səviyyəsi 34 illik diplomatik münasibətlərinin tarixində ən yüksək zirvədə qərarlaşmışdır. Bu böyük nailiyyətə, o cümlədən strateji tərəfdaşlığımızın təşəkkülündə və dərinləşməsində əvəzsiz xidmətlərinizə görə Sizə şəxsən öz adımdan və bütün Azərbaycan xalqı adından bir daha təşəkkürümü ifadə edirəm.
Biz bundan sonra da Azərbaycan ilə ABŞ arasında dostluğa, qarşılıqlı etimad, hörmət və dəstəyə əsaslanan əlaqələri və strateji tərəfdaşlığı genişləndirmək və yeni məzmunla zənginləşdirmək əzmindəyik. Bu istiqamətdə Sizinlə birgə çalışmağı səbirsizliklə gözləyirik". Bu barədə Prezident İlham Əliyevin Amerika Birləşmiş Ştatlarının Prezidenti Donald Trampa ünvanladığı məktubda qeyd olunub.
Prezident Əliyev Trampa məktubunda bildirib ki, Azərbaycan-ABŞ münasibələri 34 il ərzində ən yüksək zirvəyə çatıb.
Bundan sonra nə edilməlidir?
Politoloq Züriyə Ruslanqızı (Qarayeva) baki-xeber.com-a bildirdi ki, Azərbaycan-ABŞ münasibətlərinin 34 illik diplomatik əlaqələr tarixində ən yüksək səviyyəyə çatması artıq tərəflərin münasibətləri yalnız siyasi dialoq müstəvisində deyil, uzunmüddətli strateji tərəfdaşlıq formatında gördüyünü göstərir. "Bundan sonrakı əsas vəzifə əldə edilmiş siyasi yaxınlaşmanı institusional və iqtisadi məzmunla möhkəmləndirməkdir. Strateji Tərəfdaşlıq Xartiyasında nəzərdə tutulan enerji, nəqliyyat və bağlantılar, qarşılıqlı sərmayələr, təhlükəsizlik, süni intellekt və yeni texnologiyalar üzrə konkret layihələrin həyata keçirilməsi xüsusilə vacibdir. Eyni zamanda ABŞ şirkətlərinin Azərbaycana investisiyalarının artırılması, qeyri-neft sektorunda əməkdaşlığın genişləndirilməsi, Orta Dəhliz və TRIPP çərçivəsində Amerikanın iqtisadi iştirakının gücləndirilməsi münasibətlərin dayanıqlığını təmin edə bilər. Yəni növbəti mərhələdə siyasi iradə konkret iqtisadi, texnoloji və təhlükəsizlik mexanizmlərinə çevrilməlidir".
Z.Ruslanqızı qeyd etdi ki, digər mühüm istiqamət münasibətlərdə əvvəlki illərdən qalan siyasi maneələrin tam aradan qaldırılmasıdır. "907-ci düzəlişin tətbiqinin dayandırılmasının uzadılması müsbət addımdır, lakin Bakı üçün daha fundamental nəticə onun ümumiyyətlə siyasi gündəmdən çıxarılması olardı. Bununla yanaşı, Azərbaycan–Ermənistan sülhünün möhkəmləndirilməsi, regional kommunikasiyaların açılması və Cənubi Qafqazda yeni əməkdaşlıq modelinin qurulması Azərbaycan–ABŞ strateji tərəfdaşlığı üçün mühüm sınaq olacaq. Bakı üçün əsas məsələ Vaşinqtonla yaxınlaşmanı üçüncü dövlətlərə qarşı yönəlmiş ittifaq kimi deyil, Azərbaycanın çoxvektorlu xarici siyasətini və strateji müstəqilliyini gücləndirən tərəfdaşlıq kimi inkişaf etdirməkdir. Əgər hazırkı yüksək səviyyəli siyasi dialoq davamlı iqtisadi maraqlar və işlək institusional mexanizmlərlə tamamlanarsa, indiki yüksəliş müvəqqəti siyasi mərhələ deyil, Azərbaycan–ABŞ münasibətlərinin yeni uzunmüddətli modeli ola bilər"-deyə Z.Ruslanqızı qeyd etdi.
İradə SARIYEVA
