Dostlardan biri mesencerimə sual yazıb. Bu günlərdə imzalanmış Türkiyə-Səudiyyə-Pakistan müdafiə ittifaqını və Azərbaycanın da bu ittifaqa qoşula biləcəyini sual edir...
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Məlumat üçün deyim ki, müqaviləyə görə, üç ölkənin hansısa birinə təcavüz olsa, birlikdə hərəkət edəcəklərini razılaşıblar.
Birbaşa deyirəm - Azərbaycanın bu ittifaqa qoşulmasına lüzum yoxdur, faydasını görmürəm, daha çox ziyan vura bilər və əminəm ki, strateji qərarlara xüsusi həssas yanaşan Prezident İlham Əliyev məhz bu prinsiplərə üstünlük verərək hərəkət edəcək...
Bu 3 dövlətin müdafiə ittifaqı bağlaması kimə daha çox lazım idi? Bu ölkələrə hansı dövlətlərdən hücum təhlükəsi var ki, üçlükdə həmin təhlükəyə qarşı müqavilə imzalayırlar? Müdafiə ittifaqını və hərbi müttəfiqliyi ikitərəfli qaydada həyata keçirmək olmazdı ki?! Türkiyəyə kim hücum edəcək? Səudlar dövlətinə kim hücum edəcək? Pakistana hansı dövlət basqın edəcək? Sualları təhlil edəndə burada hansısa təcavüzə qarşı üçtərəfli müdafiə mexanizmi qurmaqdan daha çox o var ki, kimsə öz ölkədaxili siyasətinə hesablanmış "bizə xaricdən təhlükə var" kimi xof yaradan mesajı vermək istəyir...
Qəbul edirəm. İslam dünyasında hərbi inteqrasiya çox vacibdir. Ancaq bu iş çox incə və dərin düşüncə ilə aparılmalıdır. Belə üçtərəfli formatlar islam dünyasını birləşməkdən çox bölünmələrə aparır...
Bu işdə dostumuz Türkiyə də olduğu üçün tam detalları ilə təhlil aparmaq istəmirəm. Özləri bilər. Maraqlı fb dostumu bir gün dəvət etdim ki, gəlsin və bir çox şeyləri ona şəxsən deyim.
Bəzi şeyləri ictimailəşdirməyə indi ehtiyac görmürəm...
Türkiyə bizim qardaşımızdır. Ancaq bu müqəddəs qardaşlıq heç də istisnasız bütün məsələlərdə Türkiyənin imzasının yanında Azərbaycanın da imzasının olmasını zəruri etmir. Qardaşlığın unudulmaz prinsipi - heç bir məsələdə Azərbaycanla Türkiyə bir-birinə qarşı getməli deyillər, ancaq heç də bütün məsələlərdə birlikdə olmağa da məhkum deyillər...
Hərənin "öz kompası" olsa, daha yaxşıdır...
Yadıma nələr düşür... 1955-ci ildə Türkiyə və İraq "Bağdad paktı" imzaladılar. Bir neçə ay sonra Pakistan və İran da qoşuldu. Hətta Britaniya da qoşuldu. 1979-cu ildə blok tam dağılıb getdi. 24 il (mənasız) yaşamış bu blokdan tarixdə nə qaldığını bilən var?!...
Üç il əvvəl Ərdoğanın bəyanatı da yadıma düşür - "Əvvəl Səudiyyə Ərəbistanı özü aynaya baxsın. Yəməni bu günə kim qoydu? Yəmənin yerlə bir olmasında Səudiyyənin də ağır məsuliyyəti yoxdurmu?" Səudiyyənin faktiki dövlət başçısı indiki şahzadə cənab Salmana qarşı ittihamları isə sadəcə yada salıb çox vaxt almaq istəmirəm.
O ziddiyyətləri yaratmış səbəblərin heç biri aradan hələ qalxmayıb...
Bu amillər ortadaikən hansı uzunömürlü Müdafiə İttifaqına bel bağlamaq olar?!...
Tahir TAĞIYEV
