Ermənistanda iş adamı Haqik Tsarukyana qarşı cinayət işlərinin coğrafiyası və əhatə dairəsi genişlənir. Ona qarşı yeni, üçüncü ittiham irəli sürülüb. “Çiçəklənən Ermənistan” partiyasının lideri “Multi Qrup” konserninin direktoru Sedrak Arustamyanla birlikdə 2,5 milyon dollarlıq əmlakı ələ keçirməkdə və külli miqdarda pul yumaqda ittiham olunur. Söhbət Livan-Ermənistan iş adamı Gevorq Toramanyandan gedir. İstintaq Komitəsinin məlumatına görə, Tsarukyan qızıl satmaqla yanaşı, onunla birlikdə içməli su fabriki layihəsinə də başlayıb. Sonuncu binanı Akunq kəndində tikməli, Toramanyan isə xaricdən boru kəmərləri gətirməli idi. "Multi Aquamarine" şirkətinin hər iki tərəfə 50-50 nisbətində məxsus olması nəzərdə tutulsa da, hüquq-mühafizə orqanlarının əməkdaşlarının sözlərinə görə, Tsarukyanın komandası Toramanyanın səhmlərinin 50 faizini hədə-qorxu yolu ilə əldə edib.
Hüquq-mühafizə orqanlarının əməkdaşları açıqlamada bildiriblər ki, Akunq kəndindəki fərdi evin bağçasında onlar Gevorq Toramanyandan zorakılıq təhdidi altında sənədləri imzalamağı tələb ediblər. Daha sonra, İstintaq Komitəsinin məlumatına görə, qızıl zinət əşyalarının və şirkətin 50 faizlik payının cinayətkar mənşəyini gizlətmək üçün onun fəaliyyətini onlarla əlaqəli şirkətlərin qanuni gəlirləri ilə əlaqələndiriblər. Tsarukyanın vəkillərindən biri Emin Xaçatryan iddia edir ki, digər işdə olduğu kimi , bu işdə də Tsarukyanın təqsirləndirilən şəxs yox, zərərçəkən olması lazım idi: "Bu, tamamilə yalandır, reallıqla heç bir əlaqəsi olmayan bir ittihamdır". Tsarukyanla yanaşı, Ermənistanda müxalifətin digər aparıcı liderlərinin son günlərdə üzləşdikləri əsas problemlərdən biri bizneslərinin sözün əsl mənasında əllərindən alınmasıdır. Nikol Paşinyan iqtidarı müxalif liderlərə məxsus biznes obyektlərinin ya fəaliyyətini dayandırır, ya da onları milliləşdirir. Geniş vüsət alan proses müxalifətin maliyyə və sonda sosial dayaqlarının sarsıdılmasına hesablanıb. Seçkilər vasitəsilə Paşinyan iqtidarına son qoymağa çalışan müxalifət buna nail ola bilmədi. Əvəzində Paşinyan müxaliflərin varidatlarının dövlət tərəfindən ələ keçirilməsi prosesini sürətləndirib. Ermənistan hökumətinin rəhbərinin hədəfində ilk yerlərdə keçmiş prezident Robert Köçəryan, Ermənistanın şimal-şərqindəki Taşir kəndindən olan və eyni adlı məşhur Rusiya şirkətlər qrupunu quran Samvel Karapetyan, məhşur biznesmen Haqik Tsarukyan yer alır. Onların biznesləri üzərində nəzarətdən məhrum edilmələri artıq müxalif düşərgədə sərt narazılıqlarla qarşılanır. Ermənistan müxalifətinin biznesinə qarşı hakimiyyət tərəfindən başlanan səlib yürüşündə ən çox zərər görənlərdən biri məhz Haqik Tsarukyandır. Ermənistan Baş Prokurorluğu hələ üç il əvvəl Tsarukyandan 75 daşınmaz əmlakınn, 42 nəqliyyat vasitəsinin və 38 şirkətdəki səhmlərin müsadirə edilməsini tələb etmişdi. Lakin bu sahədə əsas irəliləyiş son parlament seçkilərindən sonra baş verdi. Hüquq-mühafizə orqanları Tsarukyanla əlaqəli 70-dən çox ünvanda axtarış aparıb. Daha sonra ona məxsus bütün müəssisələrin qapıları möhürlənib və ya dövlət idarəçiliyinə verilib. Müxalifətin digər lideri olan Samvel Karapetyan isə ev dustaqlığındadır. Onun 1 milyard investisiya qoyduğunu iddia etdiyi “Ermənistanın Elektrik Şəbəkələri” şirkəti Karapetyandan alınıb. Dövlət bu şirkət üzərində nəzarəti faktiki olaraq təmin edib. Nikol Paşinyan hökumətin iclasında bildirib ki, “Ermənistan Elektrik Şəbəkələri” şirkəti ilə bağlı konseptual səviyyədə qərar verilib. Bu, etibarlı idarəetməyə verilmiş dövlət mülkiyyəti olacaq. Karapetyanın Ermənistanda digər biznes obyektləri də hökumətin hədəfdindədir. Seçkilərdən sonra Ermənistanı tərk etməyə çalışan Robert Köçəryan barəsində də cinayət təqibi davam edir və artıq onun obyektlərinə də müvafiq dövlət qurumlarının işçiləri baş çəkirlər. Hakimiyyət müxalifəti əzməkdə davam edir.
Tahir TAĞIYEV
