Sahil Kərimli: “Azərbaycanın bölgədə sülh və təhlükəsizliyin əldə olunması istiqamətində atdığı bütün addımlar ABŞ tərəfindən də ciddi şəkildə dəstəklənir”
Bir il bundan əvvəl Azərbaycan Prezidenti İlham Əliyevin ABŞ-a səfəri mühüm hadisələrlə yadda qaldı. Vaşinqtonda, Ağ Evdə Azərbaycan və Ermənistan arasında sülh gündəliyinin yeni mərhələsinə yol açan mühüm sənədlər imzalandı, razılaşmalar əldə olundu. Bu baxımdan, Azərbaycan Prezidenti İlham Əliyevin 2025-ci il avqustun 8-9-da ABŞ-a səfəri ABŞ-Azərbaycan əlaqələrinin transformaiyası və Azərbaycanla Ermənistan arasında sülh gündəliyinin formalaşmasında tarixi əhəmiyyət daşıyır. Əldə olunmuş uğurlar Prezident İlham Əliyevin praqmatik, məqsədyönlü, Azərbaycanın milli maraqlarına əsaslanan uğurlu siyasətinin nəticəsidir.
ABŞ-Azərbaycan münasibətləri strateji tərəfdaşlıqdan yeni geosiyasi reallıqlara uyğunlaşma mərhələsinə keçir. Vaşinqtonun dəstəyi ilə Azərbaycan və Ermənistan arasında sülh prosesi intensivləşib, tərəflər sülh sazişinin razılaşdırılması və kommunikasiyaların açılması istiqamətində mühüm diplomatik addımlar atırlar.
Məlum olduğu kimi Co Bayden Administrasiyası dövründə ABŞ-ın Azərbaycana qərəzli münasibətinin, həmin dövrə kimi ikitərəfli münasibətlıərdə əldə olunmuş nəticələrə ciddi zərbə vurulmasının şahidi olmuşuq.
Donald Tram Prezident seçildikdən sonra ABŞ-ın xarici siyasətində köklü dəyişikliklərə rəvac verdi, Prezident İlham Əliyevin də qeyd etdiyi kimi dünyada sülh, barış yolunu tutmuş və dünya ölkələri ilə münasibətləırində də məhz bu amili əsas götürdü. Bayden administrasiyasından fərqli olaraq Prezident Tramp daha rasional, zamanın tələblərinə uyğun siyasət yürütmüş, bunun tərkib hissəsi kimi ölkəsinin Azərbaycanla əlaqələrini yenidən qiymətləndirmiş, Azərbaycanla əlaqələrinin inkişafını və regional sülhün təmin edilməsini əsas istiqamət kimi götürmüş və həyata keçirməyə başlamışdır. Buna görə də ABŞ-Azərbaycan əlaqələrinin transformasiyası və Azərbaycanla Ermənistan arasında sülhün bərqərar olması bir birini tamamlayır və vahid bir prosesin tərkib hissələri kimi qiymətləndirilir.
Politoloq Sahil Kərimli baki-xeber.com-a bildirdi ki, Azərbaycanla Ermənistan arasında sülh müqaviləsinin imzalanması istiqamətində ölkəmiz uzun müddətdir, qətiyyətli, dövlətimizin milli maraqlarına əsaslanan siyasət yürüdür. “Bu praqmatik siyasətin əsas məqsədi Cənubi Qafqazda, uzun müddətli, əbədi, ədalətli və dayanıqlı sülh, təhlükəsizlik və rifahın əldə olunmasıdır. Azərbaycan bu istiqamətdə bir neçə idlir ki, çox ciddi addımlar atır, öz hədəflərinə çatmağa çalışır. Təbiidir ki, bu prosesdə dünya gücləri də, xüsusilə ABŞ da Azərbaycanın bu sülhsevər siyasətini, təhlükəsizliyə vermək istədiyi töhfələri ciddi şəkildə dəstəkləyir. Biz son dövrlərdə, xüsusilə də Donald Trampın növbəti dəfə ABŞ-da hakimiyyətə gəlməsindən sonra Azərbaycanla əlaqələrin daha da inkişaf etdirilməsini, bu istiqamətdə ciddi xoşməramlı siyasət yürüdüldüyünü görürük. Ötən ilin avqust ayının 8-də Azərbaycan Prezidentinin ABŞ-a səfəri və Amerika Prezidenti Donald Trampla görüşü, bu görüşdə Azərbaycanla Ermənistan arasında sülh müqaviləsinin imzalanması istiqamətində imzalanan sənədlər, Trampın şahidliyi ilə Azərbaycan və Ermənistan liderləri ilə əldə olunan razılaşmalar, sülh müqaviləsinin mətninin paraflanması böyük əhəmiyyət daşıyır. Bu həm qlobal dünya, həm də Cənubi Qafqaz üçün təhlükəsizliyə və sülhə verilən çox böyük töhfə kimi qiymətləndirilməlidir”.
S.Kərimli vurğuladı ki, ötən dövr ərzində ABŞ bölgəmizdə sülhün bərqərar olması istiqamətində aparılan siyasəti daim təqdir və təşviq edib. “Bu gün də ABŞ rəhbərliyi, xüsusilə də Donald Tramp çalışır ki, bu razılaşma, əsasən də sülh müqaviləsinin imzalanması tez və ədalətli şəkildə həyata keçirilsin. ABŞ-ın Azərbaycanın müəllifi olduğu Zəngəzur dəhlizi layihəsinə də çox ciddi dəstəyi var. Bu dəstək daim ifadə olunub. Xüsusilə də Zəngəzur dəhlizi-TRIPP-Tramp marşurtu üzrə işlərin sdon dövrlərdə intensiv həyata keçirilməsi, bu marşurtun reallaşdırılması istiqamətində atılan bütün addımlar onu deməyə əsas verir ki, bu gün Azərbaycanın bölgədə sülh və təhlükəsizliyin əldə olunması istiqamətində atdığı bütün addımlar ABŞ tərəfindən də ciddi şəkildə dəstəklənir. Ona görə də əminliklə deyə bilərik ki, Ermənistan xüsusilə də son bir il ərzində müəyyən qədər konstruktiv mövqe nümayiş etdirir və biz tezliklə sülh müqaviləsinin imzalanmasını da real görə bilərik”-deyə S.Kərimli vurğuladı.
İradə SARIYEVA
