Akif Nağı: “Ermənistan bitərəf qalmaqla özünün müstəqil qərar vermək iqtidarında olmayan bir dövlət olduğunu bir daha təsdiqlədi”
Vaşinqton administrasiyası BMT Baş Assambleyası tərəfindən Ukrayna ilə bağlı qəbul edilmiş qətnamədə suverenlik və ərazi bütövlüyünə vurğu edilməsinin sülh prosesini irəliyə aparmadığını iddia edib. Baki-xeber.com-un məlumatına görə, ABŞ-ın BMT-dəki daimi nümayəndəsinin müavini Temmi Brus bu cür ifadələrin diqqəti danışıqlar prosesindən yayındırdığını bildirib və qeyd edib ki, diqqət münaqişənin həllinə yönəldilməlidir.
Fevralın 24-də BMT Baş Assambleyası Ukrayna ilə bağlı Rusiya əleyhinə qətnaməni 107 səslə qəbul edib, lakin ABŞ mətni dəstəkləməyib. Vaşinqtonun suverenlik və ərazi bütövlüyü ilə bağlı bəndlər üzrə ayrıca səsvermə təklifi rədd edilib. Ukrayna tərəfindən hazırlanmış qətnamə layihəsi olduğu kimi qəbul edilib.
Rusiya, Belarus, İran və Şimali Koreya da daxil olmaqla 12 ölkə isə əleyhinə səs verib. ABŞ, Ermənistan, Braziliya, Macarıstan, Qazaxıstan, Serbiya və Özbəkistan da daxil olmaqla 51 ölkə isə bitərəf qalıb.
BMT Baş Assambleyası Ukrayna ilə bağlı Rusiya əleyhinə qətnaməni 107 ölkə dəstəkləyib, 12 ölkə əleyhinə səs verib, 51 ölkə isə bitərəf mövqe tutub. Bu sənədin əleyhinə olanlar Rusiyanın, bitərəf qalanlar isə Amerikanın dostlarını. Özü də Ukraynanın ərazi bütövlüyünün və suverenliyinin tanınması məsələsinə ABŞ səs verməyib, kənarda dayanıb. Halbuki, bu BMT-nin əsas prinsipidir. Kənarda qalanların sırasında Ermənistan da, ABŞ da var. Ermənistan indiyə qədər necə ki, bütün məsələlərdə Rusiyanın arxasınca sürünürdü, Rusiya hara səs verirdisə Ermənistan da ora səs verirdi, nəyin əleyhinə idisə Ermənistan da o yolu tuturdu, bitərəf olandada Ermənistan bitərəf mövqe sərgiləyirdi.
Bu gün də Ermənistan Amerikanın arxasına düşüb. ABŞ bitərəf qalıb Ermənistan da ona baxıb səsvermədə iştirak etməyib. Burada müstəqil siyasət yürütməkdən danışmaq mümkün deyil. Ermənistan ancaq hansısa dövlətə yamaq olmaq istəyir.
Amma Azərbaycan Ukraynanın ərazi bütövlüyünü dəstəkləyən 107 ölkənin sırasındadır.
Azad Vətən Partiyasının sədri Akif Nağı baki-xeber.com-a bildirdi ki, Ermənistan bu məsələdə də müstəqil dövlət olmadığını bir daha göstərdi. “Böyük dövlətlərin ərazi bütövlüyü və suverenliklə bağlı ədalətsiz mövqeyini biz dəfələrlə Azərbaycana qarşı görmüşük. BMT Baş Assambleyasında 2008-ci il mart ayının 14-də ilk dəfə Azərbaycanın işğal olunmuş ərazilərində vəziyyətə dair qətnamə qəbul olundu. Bu çox mühüm sənəd idi. Çünki birinci dəfə idi ki, Azərbaycanın Ermənistan tərəfindən zəbt olunmuş əraziləri işğal olunmuş ərazi kimi təqdim edilirdi. Həmin dövrdə də Rusiya, Amerika, Fransa həmsədr idi və bu üç ölkə həmin qətnamənin əleyhinə səs vermişdilər. Yəni biz onların mövqeyini görmüşük. Ədalətsiz dünyadır, yenə də bu cür mövqelər davam edir. Burada Amerikanın Ukrayna ilə bağlı mövqeyi ortaya çıxır. Yəni Amerika üçün Ukraynanın nə ərazi bütövlüyü, nə suverenliyi vacibdir, ABŞ üçün vacib olan Ukraynanın böyük bir hissəsini nəzarətə götürsün. Mətbuatda da yazıldığı kimi, ABŞ Ukraynaya sərt şəkildə yanaşır, sanki cinayət törədən dövlət kimi baxır. “Bizim maraqlarımız nəzərə alınmayıb” deyə inciklik göstərirlər. Nədir sizin marağınız? Maraqlarınız Ukraynanın suveren hüquqlarının, ərazi bütövlüyünün ləğv olunmasıdırmı? Ukraynanın ərazi bütövlüyünə qəsd olunmasıdırmı? Bu nə cür maraq ola bilər?
Ermənistan bitərəf qalmaqla özünün müstəqil qərar vermək iqtidarında olmayan bir dövlət olduğunu bir daha təsdiqlədi. Bu bizim gözümüzün qabağında həmişə belə olub, bundan sonra da belə olacaq”.
A.Nağı hesab edir ki, hələ Ermənistanda müstəqil dövlət təfəkkürü formalaşmayıb. A.Nağının sözlərinə görə, Ermənistan düşünür ki, hansı dövlət onların təhlükəsizliyinə zəmanət verəcək, ona görə də gah Rusiya tərəfə, gah da ABŞ tərəfə qaçırlar, bitərəf qalmalarının kökündə də bu dayanır. “Ermənistan Rusiyadan ehtiyat edir, həmin sənədin leyhinə səs versəydi Rusiyanı incik sala bilərdi.
Azərbaycan növbəti dəfə özünün müstəqil siyasət yürütdüyünü göstərdi ki, Azərbaycanın mövqeyi nə ABŞ-dan, nə də başqa bir dövlətdən aslı deyil, nə ABŞ-ın, nə də Rusiyanın istəyinə baxır, öz mövqeyini ortaya qoyur. Bu da müstəqil dövlət, dövlətçilik xəttidir. Bunu Ukrayna da, dünya da görməlidir. Bu Ukrayna üçün bir siqnal olmalıdır ki, bütün təzyiqləerə baxmayaraq hansı dövlətlər onun ərazi bütövlüyünü və suverenliyini müdafiə edib...”
A.Nağı hesab edir ki, Azərbaycan bu məsələdə də öz prinsiplərinə sadiq olduğunu göstərdi, dövlətlər üçün ən vacib məsələ onların ərazi bütövlüyü, suverenliyidir.
İradə SARIYEVA
