Azər Həsrət: “Bu çağrış əsla qəbul edilən deyil”
Milliyyətçi Hərəkat Partiyasının (MHP) lideri Dövlət Baxçalı "Terrorsuz Türkiyə" məqsədi çərçivəsində keçirilən partiyasının qrup toplantısında bildirib ki, Abdullah Öcalana status verilməli olduğunu deyib. O, Ocalanın statusu ilə bağlı müzakirələrin açıq və aydın şəkildə aparılmalı olduğunu bildirib. Baxçalı “İmralı üçün xüsusi status” çağırışında bulunub.
Baxçalının bu təklifi Türkiyədə ciddi gərginlik yaradıb. Kürd liderlərinin, deputatların bəziləri deyirlər ki, Türkiyə Böyük Millət Məclisi onunla bağlı qanun qəbul etməlidir. Bunun nə kimi perspektivləri görsənir? Abdullah Ocalana, yaxud İmralıya xüsusi status verilməsi ilə bağlı ayrıca bir qanun qəbul oluna bilərmi? Bu Türkiyədə necə qarşılanacaq?
Siyasi şərhçi Azər Həsrət baki-xeber.com-a bildirdi ki, Türkiyədə nəyin necə qəbul edilməsindən savayı biz həm də orada atılan hər bir addımın böyük Türk dünyasında həssaslıqla qarşılandığını da unutmamalıyıq. “Abdullah Öcalanın bir terrorudur, terrorçu başıdır, 30 mindən çox insanının qanı bu adamın üzərindədir. Özü də o insanların demək olar ki, hamısı heç bir hərbi fəaliyyəti olmayan günahsız insanlardır. Bunların arasında gənc yaşlarında öldürülən həkimlər, müəllimlər var, uşaqkən ailəsindən oğurlanıb dağlara aparılıb işgəncə edilənlər, ailəsindən qoparılıb sonra terrorçuya çevrilmiş minlərlə uşaq var. Bütün bunları göz ardı edib də İmralıya, Abdullah Öcalana nəsə status verilməlidir? Öcalanın başı sığallanmalıdır? Qardaş Türkiyə bağlı olduğumuz, sevdiyimiz bir dövlətdir. Amma bəzən atdıqları addımları anlamaqda çətinlik çəkirik. Yəni biz başa düşürük, bu dövlətin iç işi də ola bilər. Amma biz nəzərə almalıyıq ki, Türkiyə həm bizim dövlətimizdir, həm də bütün dünya türklərinin dövlətidir. Bu gün Azərbaycan da daxil olmaqla bütün türk dövlətləri sadəcə öz vətəndaşlarının dövlətləri deyil, onlar bütün türklərin dövlətidir. Ona görə də atılan addımlarda, çağrışıarda diqqətli olunmalıdır.
Türkiyə Millət Məclisi kimi bir zamanlar müqəddəs yerlərdən biri olan məkanda durub Abudullah Öcalan kimi terrorçu başına status məsələsini müzakirə etmək Türkiyə dövlətini aşağılamaqdır. Qardaş ölkə buna germəməlidir”.
A.Hesab edir ki, terror bitib, qalıqları təmizlənir, Abdullah Öcalan da terrorçu başıdır, bunu sübut etməyə ehtiyac da yoxdur. “Öcalana nə status verilməlidir? Dustaqxanada yatan adama nə status veriləcək ki? Bəlkə başının üstünə ayrıca mühafizəçilər qoyulsun, bəlkə ona təyyarə ayrılsın istədiyi yerə gedib gəlsin. Nə statusu? Dövlət Baxçalı MHP başqanı olaraq həqiqətən də Türkiyənin içindəki türklərlə yanaşı Türkiyənin dışındakı türkləri də üzəcək çağrışlar edir, bəyanatlar səsləndirir. Hətta Abdullah Öcalan haqda hansısa müzakirələr getməli olsa belə bunu MHP etməməlidir. MHP-nin çağrışı tək bir şeyə ola bilər-Abdullah Öcalan edam edilsin. Düzür, bu Türkiyə qanununda yoxdur. Bunu edə bilər. Yoxsa status verilsin çağırışı düzgün deyil. O zaman getsin Dövlət Baxçalı götürüb onu öz evində saxlasın, başına dolansın və öldürülən insanların da qanı Abdullah Öcalanla bərabər Baxçalını da tutsun. Belə bir şey ola bilməz. Bu çağrış əsla qəbul edilən deyil. Düşünürəm ki, Azərbaycan ictimai rəyi də bu məsələdə kəskin mövqedədir”-deyə A.Həsrət bildirdi.
İradə SARIYEVA
