Ramil Hüseynov: “Həmin ölkələrdən biri qonşu Gürcüstan olub”
Zənnimcə, bizim İkinci Qarabağ müharibəsindəki Qələbəmiz həm siyasi, həm də xarakterli çox böyük layları yerindən oynadıb. Yəqin ki, bir çoxları bizim uğurumuzu təkrar etmək istərdi, amma bu, heç kimə müyəssər olmayıb. Bunu Prezident İlham Əliyev yerli televiziya kanallarına müsahibəsində deyib.
Maraqlıdır, İkinci Qarabağ müharibəsindən sonra hansı dövlətlər Azərbaycanın uğurunu təkrarlamağa cəhd edib?
Sözügedən məsələni baki-xeber.com-a şərh edən Yeni Xətt Siyasi Tədqiqatlar Mərkəzinin rəhbəri Ramil Hüseynovun fikrincə, həqiqətən də bəzi ölkələr Azərbaycanın uğurunu təkrarlamağa cəhd etdi: “Məsələn, həmin ölkələrdən biri qonşu Gürcüstan olub. Məlum olduğu kimi, Gürcüstan uzun illərdir separatizmdən əziyyət çəkir. Özü də bu ölkə ərazisində bir yox, iki separatçı region var və üstəlik, bu separatçı qurumları bəzi dövlətlər “tanıyıb”. Azərbaycanın 2020-ci ilin 44 günlük Vətən müharibəsində öz ərazi bütövlüyünü təmin etməsi Gürcüstanı həvəsləndirdi. Məhz ondan sonra rəsmi Tbilisi Moskva ilə müəyyən təmasları intensivləşdirdi. Separatçı regionlara nəzarətin bərpa edilməsi müqabilində bəzi vədlər verildi, amma Rusiyanı razı sala bilmədilər. Nəzərə almaq lazımdır ki, 2008-ci ildə Gürcüstan ərazi bütövlüyünü bərpa etmək istiqamətində güc variantına əl atsa da, bunun ağır nəticələri oldu. Azərbaycanın uğurunu diqqətlə araşdıran ölkələrdən biri də Ukrayna olub. İndinin özündə belə Ukrayna mediasında, ekspert dairələrində bununla bağlı müzakirələr gedir. Xüsusən də 1994-cü ilin mayında Azərbaycanın Ermənistanla atəşkəsə getməsi ukraynalı ekspertlər tərəfindən müsbət dəyərləndirilir. Ona görə də bəli, Azərbaycanın uğurunu təkrar etmək istəyən ölkələr var”.
Vidadi ORDAHALLI
