Ermənistanda həbsdə olan milyarder Samvel Karapetyan tərəfdarlarına müraciətində bildirib ki, onun yeni yaratdığı müxalifət hərəkatı hökuməti cəmi bir neçə aya devirəcək. Bu açıqlamadan öncə isə İrəvanda məhkəmə onun barəsində həbs-qətimkan tədbirini daha iki ay uzadıb.
Karapetyan həbsxanadan yayılan bəyanatında deyib: “Hər birinizi ümidsiz olmamağa çağırıram. Düşünməyin ki, Ermənistanı idarə edən kiçik qrup öz məqsədinə nail olub. Müqəddəsləri tapdalamaqla, həbsxanaları doldurmaqla, əmlakı ələ keçirməklə və qorxu atmosferi yaratmağa çalışmaqla siz ən çoxu daha altı ay hakimiyyətdə qala bilərsiniz, amma ölkəni saxlaya, onun ləyaqətini bərpa edə, vətəndaşlarınızın həyatını yaxşılaşdıra, dövlətin problemlərini həll edə bilməyəcəksiniz”. O, mübarizəni davam etdirəcəklərini vurğulayıb.
Bununla Karapetyan açıq-aşkar gələn iyunda keçiriləcək parlament seçkilərinə işarə edir. Onun “Mer Dzevov” hərəkatı avqustun sonunda rəsmi olaraq fəaliyyətə başlayıb və seçkidə hakim “Vətəndaş müqaviləsi” partiyasının əsas rəqiblərindən olacağı gözlənilir. Amma Ermənistan qanunlarına görə, 60 yaşlı iş adamı Rusiya vətəndaşlığına görə baş nazir ola bilməz. Onun hərəkatının artıq 8 min üzv topladığı bildirilir. Baş nazir Nikol Paşinyan isə bir daha bildirib ki, partiyası 2026-cı il seçkilərində qalib gələcəyinə əmindir. O, İrəvanın qərbindəki Vağarşapat şəhəri və 17 kəndi əhatələyən dairədə yerli seçkidə partiyasının qələbəsini misal gətirib. “Mer Dzevov” hərəkatının fəaliyyətini isə həbsdə olan oliqarxın qardaşı oğlu Narek Karapetyan koordinasiya edir. O, Vağarşapatda Paşinyanın partiyasının qələbəsinin əhəmiyyətini kiçildib, “Mer Dzevov”un həmin seçkiyə qatılmadığını deyib. Narek Karapetyan yeni müxalif qüvvənin Paşinyanın hakimiyyətdən getməsini təmin edəcəyini vurğulayıb. Samvel Karapetyan Paşinyanın Ermənistan Apostol Kilsəsinin ruhanilərini vəzifədən uzaqlaşdırmaq cəhdlərini tənqid edəndən bir neçə saat sonra ona zorakı rejim dəyişikliyinə çağırış ittihamı irəli sürülüb. O, iyulda siyasətə gəlmək qərarından sonra vergidən yayınma, dələduzluq və çirkli pulyuma ittihamları ilə üzləşib, bütün ittihamları siyasi motivli sayaraq rədd edir. Erməni ekspert Tiqran Köçəryan isə iddia edir ki, Karapetyan azadlığa buraxılacağı təqdirdə Paşinyanın partiyadaxili mövqeləri nəzərəçarpacaq dərəcədə zəifləyə, hətta onun üçün sonun başlanğıcı ola bilər. Köçəryanın sözlərinə görə, “Mer Dzevov” siyasi hərəkatının artan nüfuzu hakimiyyət üçün ciddi çətinlik yaradacaq. O vurğulayıb ki, Karapetyan həbsdə olsa belə, bu siyasi hərəkatın güclənməsi davam edir. Xatırladaq ki, Ermənistan parlament seçkiləri 2026-cı ilin iyun ayında keçiriləcək. Bu seçkilərdə iştirak niyyətini artıq Nikol Paşinyan, ölkənin ikinci prezidenti Robert Köçəryan, keçmiş ombudsman Arman Tatoyan, eləcə də Samvel Karapetyan bəyan edib. Robert Köçəryan və Samvel Karapetyan Rusiyanın siyasi dairələri ilə əlaqəli fiqurlar hesab olunur. Bu isə o deməkdir ki, əgər Nikol Paşinyan qarşıdakı seçkilərdə məğlub olarsa, Ermənistanda Moskvanın təsirinin yenidən güclənməsi real ssenariyə çevrilə bilər.
Baş verənləri şərh edən erməni politoloq Aleksandr İskəndəryan qeyd edir ki, hakim “Vətəndaş müqaviləsi” partiyasının 2026-cı il seçki kampaniyasında əsas mesajı belə olacaq: onlar sülh tərəfdarıdır, digərləri isə buna qarşıdır.: “Yəni əgər onlar qalib gələcəklərsə, sülhün təmin olunması üçün böyük imkan yaranacaq, halbuki başqa bir qüvvə qalib gəlsə, bu müharibəyə gətirib çıxaracaq. Ermənistanda siyasət çox şəxslərə bağlanmış şəkildə qurulub və mövqelər də əsasən belədir: insanlar səhvdir, müəyyən şəxslər siyasi səhnədən uzaqlaşdırılmalıdır və bu halda vəziyyət dəyişəcək, amma necə dəyişəcək, bunu heç kim izah etmir. Proqramlar əvvəlki kimi mənfidir, yəni onlar nəyəsə qarşıdırlar, nəyinsə tərəfdarı deyillər. Bu, Ermənistan siyasi mədəniyyətinin xarakterik xüsusiyyətidir. Bu, ləğv etmə mədəniyyətidir, burada hökumət mahiyyətcə bildirir ki, hazırkı müxalifətlə əməkdaşlıq mümkün deyil və buna görə də ölkə yalnız o zaman inkişaf edə bilər ki, bu insanlar və bu qüvvələr siyasətdən uzaqlaşdırılsın. Müxalifət də eyni şeyi deyir: hökumətlə qarşılıqlı fəaliyyət mümkün deyil və ölkə yalnız onlar getdikdə inkişaf edəcək. Fərqli siyasi qüvvələr arasında əməkdaşlıq imkanları minimum səviyyədədir. Hər bir seçki taleyüklü, unikal hadisəyə çevrilir. Biz həmişə həyatla ölüm arasında seçim edirik: əgər səhv səs versək, Ermənistan yox olacaq, biz uçurumun kənarındayıq və sair. Bu, həm əvvəlki, həm də 2026-cı ildə keçiriləcək seçkilərin xarakterik cəhətidir”. Ermənistanın “Past” nəşri isə yazır ki, 2026-cı il seçkiləri ərəfəsində hazırkı Ermənistan hakimiyyəti beynəlxalq platformalarda öz reytinqini yüksəltmək, Qərb tərəfdaşları ilə mümkün qədər nümayişkaranə əlaqələr yaratmaq və bu yolla ölkə daxilində itirilmiş etimadı kompensasiya etmək üçün maksimal səylər göstərir: “Paşinyanın beynəlxalq forumlarda iştirakı, “sülh gündəliyi” barədə çağırışları və açıq PR xarakteri daşıyan görüşlər bir məqsədə xidmət edir: onu regionda “əsas demokratik lider” kimi təqdim etmək. Halbuki Ermənistanda demokratik institutlar ardıcıl şəkildə çökdürülür. Sülhpərvər bəyanatlarla xarici tərəfdaşları çaşdırmaq cəhdləri ölkə daxilində həyata keçirilən siyasi repressiyalarla kəskin ziddiyyət təşkil edir. Son aylarda hakimiyyət sistemli şəkildə yalnız müxalifət nümayəndələrini deyil, həm də icma rəhbərlərini, hüquqşünasları, din xadimlərini və ictimai nüfuza malik xeyriyyəçiləri, o cümlədən Samvel Karapetyanı təzyiq obyektinə çevirib. Bu proses ayrı-ayrı işlərin cəmindən ibarət deyil, 2026-cı il seçkiləri ərəfəsində siyasi meydanın təmizlənməsinə yönəlmiş aydın hakimiyyət strategiyasıdır. Ermənistan hakimiyyəti Qərbə bunu “anti-demokratik qüvvələrə qarşı mübarizə” kimi təqdim edir və öz addımlarını bu ssenari ilə əsaslandırmağa çalışır. Lakin reallıq ondan ibarətdir ki, məhz mövcud hakimiyyət anti-demokratik praktikanın əsas daşıyıcısıdır, qanunun gücünü güc strukturlarına, ədaləti siyasi sifarişə, seçki prosesini isə qarşılıqlı əks-təsirləri aradan qaldırılmış monopoliyaya çevirir. Qərb tərəfdaşları üçün düzgün sözlər və düzgün selfilər təqdim olunduğu müddətdə, ölkə daxilində siyasi rəqiblərin sıradan çıxarılmasını hakimiyyət “demokratiyanın müdafiəsi” kimi qələmə verir. Seçkiöncəsi təqiblərin real məqsədi aydındır: 2026-cı ilə qədər formalaşan bütün siyasi mərkəzləri, təmsilçi müxalifət qüvvələrini və hakimiyyətin yenidən istehsalına təhlükə yarada biləcək hər bir şəxsi neytrallaşdırmaq. “Rəqabətli seçkilər” görüntüsü yaradılır, lakin rəqiblərin özləri yoxdur, birinin haqqında cinayət işi məhkəmə mərhələsindədir, digəri həbsdədir, üçüncüsü kütləvi təbliğatın hədəfindədir”.
Nahid SALAYEV
