Fatimə Hacıbəyli: “Ataların da məzuniyyət hüququndan yararlanması yalnız uşağın deyil, həm də ailədaxili münasibətlərin sağlamlığı üçün önəmlidir”
Xəbər verildiyi kimi, Azərbaycanda yeni ata olanlar ödənişli məzuniyyətə çıxa biləcək.
Əmək Məcəlləsinə nəzərdə tutulan dəyişikliyə əsasən, uşağının doğulması ilə əlaqədar kişilərə tibb müəssisəsinin arayışı əsasında doğuşdan əvvəl və doğuşdan sonra olan dövrdə cəmi 14 təqvim günü müddətində ödənişli məzuniyyət veriləcək.
Yeni qayda hər iki valideynin ortaq məsuliyyəti kimi qəbul olunur. Kişiyə məzuniyyətin verilməsi həm onun yeni doğulmuş körpəsi ilə emosional bağ qurmasına imkan yaradacaq, həm də anaya doğuşdan sonrakı bərpa dövründə ciddi sosial və psixoloji dəstək təmin edəcək.
Məlumat üçün qeyd edək ki, əksər xarici ölkələrdə bununla bağlı konkret qayda var. Məsələn, Almaniyada valideynlərə verilən ödənişli doğum icazəsi 14 həftədir. Burada dövlət valideynlərə təxminən 1.800 avro maaş ödəyir. Ödənişsiz icazə müddəti isə həm ana, həm də ata üçün uşaq 3 yaşına çatana qədər uzadıla bilir.
Fransada 16 həftə olan ödənişli doğum icazəsi, üçüncü uşaqdan sonra 26 həftəyə qədər uzana bilir.
Estoniyada atalar üçün də uşağının doğulmasından sonrakı 3-cü ayda işə başlamaq üzrə ödənişli icazə haqqı var.
Amerikada bu müddət orta hesabla 10-12 həftə, Afrika ölkələrində ortalama 10 həftə, Asiya ölkələrində isə orta hesabla 8-10 həftə arasında dəyişməkdədir.
Bizim cəmiyyətdə yekdil bir fikir formalaşıb, qadın dünyaya uşaq gətirir, onu qidalandırır, tərbiyə edir və bütün bunlara görə də mütləq məzuniyyətə çıxmalıdır. Düzdür, qanunlarımız bunları dəstəkləyir, hər bir qadın ana olmağa hazırlaşdığı dövrdə qanuni haqqından istifadə edə bilər.
Amma bir sual yaranır ki, Azərbaycanda kişilər həqiqətən bu məzuniyyətə çıxacaqmı? Ümumiyyətlə, kişilərə bu məzuniyyət niyə verilir? Kişilərin həmin 14 günlük məzuniyyətdə öhdəlikləri nədir?
“Atalara 14 günlük ödənişli məzuniyyət verilməsi ailə institutunun möhkəmləndirilməsi, valideyn məsuliyyətinin bölüşdürülməsi baxımından son dərəcə mühüm addımdır”
Sosioloq Fatimə Hacıbəyli “Bakı-Xəbər”ə şərhində bildirdi ki, ailə həyatının ən önəmli və ən emosional hadisələrindən biri də uşağın dünyaya gəlməsidir: "Bu proses eyni zamanda ailə məsuliyyətinin artması deməkdir. Azərbaycan qanunvericiliyinə görə, analara övladlarına qulluq etmələri üçün uşağın üç yaşına qədər ödənişsiz sosial məzuniyyət verilir. Bu müddətdə ana işdən azad olur, lakin onun iş yeri qorunur. Ataların da məzuniyyət hüququndan yararlanması yalnız uşağın deyil, həm də ailədaxili münasibətlərin sağlamlığı üçün önəmlidir. Atalara 14 günlük ödənişli məzuniyyət verilməsi ailə institutunun möhkəmləndirilməsi, valideyn məsuliyyətinin bölüşdürülməsi baxımından son dərəcə mühüm addımdır”.
Günel CƏLİLOVA
