Ukraynalı jurnalisti Rusiya Prezidenti Vladimir Putinin 22 yaşlı qızı Luiza Rozovadan açıqlama alıb.
Ukraynada yayımlanan TSN kanalının jurnalisti Dmitri Svyatnenko Putinin qızına "Üç həftə əvvəl atan qardaşımı öldürdü" deyib və ondan Putinin siyasətini dəstəkləyib-dəstəkləmədiyini soruşub. Luiza əvvəlcə çəkilişdən imtina edib və "Bunun mənimlə nə əlaqəsi var?" deyərək sualları rədd edib.
Lakin Svyatnenko onu atasına zəng edib "Kiyevə hücumu dayandır" deməyə dəvət edib. Luiza "Əlbəttə" cavabını verib, lakin belə bir cəhdin faydasız olacağına eyham vurub.
Jurnalist daha sonra onu Kiyevə və ya cəbhə xətti olan Pokrovska getməyə çağırıb və "Sadəcə orada olmağınız hücumları dayandıra bilər" deyib. "Ora necə gedə bilərəm?" cavabını verən Luiza daha sonra jurnalistə "Sizə kömək edə bilmərəm. Çox üzr istəyirəm... Bu vəziyyətə görə həqiqətən üzr istəyirəm, amma məsuliyyət daşımıram" deyib.
Reportaj zamanı jurnalist Putinin qızından niyə Parisdə yaşadığını da soruşub. Luiza isə "Tələbə olanda Parisə köçmək qərarına gəldim" deyib. Luizanın Fransada Rudnova soyadından istifadə etdiyi və müharibədən əvvəl sosial mediada dəbdəbəli həyat tərzi haqqında paylaşımlar etdiyi, lakin 2021-ci ildən paylaşımları dayandırdıqları bildirilir.
Jurnalist Svyatnenkonun qardaşı Volodimir noyabr ayında Rusiyanın raket hücumunda həlak olub.
TAHİR
