Firdovsi Şahbazov: “Qurumun bu qərarı məvaciblər arasında bərabərsizliyi...”
SOCAR-ın prezidenti Rövşən Nəcəfovun 7 noyabr 2025-ci il tarixindəki əmrinə əsasən SOCAR-da çalışan işçilərin maaşı artırılıb.
Sözügedən əmrdə qeyd olunub ki, SOCAR-da son illərdə əməyin ödənilməsi sisteminin təkmilləşdirilməsi və işçilərin rifah halının yaxşılaşdırılması istiqamətində xeyli işlər görülüb. Bu ənənənin davam etdirilməsi məqsədi ilə SOCAR və Azərbaycan Neft və Qaz Sənayesi İşçilərinin Həmkarlar İttifaqı Respublika Komitəsinin (ANQSIHIRK) birgə qərarı ilə 1 yanvar 2026-ci il tarixdən SOCAR-da çalışan işçilərin aylıq tarif (vəzifə) maaşları 30% artırılır.
Maraqlıdır, SOCAR-da maaşların 30 faiz artırılmasını ekspertlər necə dəyərləndirir? SOCAR-da onsuz da maaş yüksək idi. Bu artımdan sonra başqa sahələrlə müqayisədə fərq daha da atmayacaqmı?
“Neft gəlirləri artmırsa, dövlət büdcəsində artımlara gedilmirsə, o zaman belə bir qərarın nə iqtisadi, nə də məntiqi əsası var”
Sözügedən məsələni “Bakı-Xəbər”ə şərh edən iqtisad üzrə fəlsəfə doktoru Firdovsi Şahbazovun fikrincə, SOCAR-ın belə bir qərar qəbul etməsi gözlənilən deyildi: “Əvvəla, SOCAR özəl şirkət deyil. Özəl şirkət olsaydı, o zaman qurumun belə bir qərar verməsini şirkətin daxili işi hesab etmək olardı. Məsələ ondadır ki, SOCAR dövlət şirkətidir. Hamıya məlum olan həqiqət ondan ibarətdir ki, Azərbaycanın dövlət gəlirləri əsasən neft-qaz satışından formalaşır. Son dövrlər həm neftin dünya bazar qiyməti aşağı düşüb, həm də Azərbaycanda hasilat kəskin şəkildə azalıb. Belə ki, 15 il əvvəl Azərbaycanda 50 milyon tondan artıq neft hasil edilirdisə, indi ölkədə neft hasilatının həcmi 20 milyon ton ətrafındadır. Bu səbəbdən gələn ilin büdcəsində bir sıra sahələrə ayrılan vəsaitlərin həcmi xeyli azaldılıb. Gələn il minimum əmək haqqı artırılmayacaq. O cümlədən, büdcə təşkilatlarında da elə bir artım gözlənilmir. Çünki qeyd olunduğu kimi, imkanlar məhduddur. Bu səbəbdən də pensiyaların artırılacağı da sual altındadır. Belə bir şəraitdə SOCAR-ın işçilərin məvaciblərini 30 faizədək artırması məvaciblər arasında bərabərsizliyi daha da dərinləşdirəcək. Onsuz da bu qurumda çalışanların gəlirləri digərləri ilə müqayisədə yüksəkdir. Üstəlik, neft gəlirləri artmırsa, dövlət büdcəsində artımlara gedilmirsə, o zaman belə bir qərarın nə iqtisadi, nə də məntiqi əsası var”.
Vidadi ORDAHALLI
