Elşad Həsənov: “Bunun bir səbəbi onunla bağlıdır ki, Tacikistan türkdilli dövlət deyil”
“Ölkəmiz öz ərazi bütövlüyünü və suverenliyini bərpa etdikdən sonra işğaldan azad olunmuş ərazilərin dirçəldilməsi üzrə genişmiqyaslı işlərə başlayıb. Biz bu məsələdə Mərkəzi Asiya ölkələrinin Azərbaycana göstərdiyi qardaş dəstəyini yüksək qiymətləndiririk”. Bunu Prezident İlham Əliyev Daşkənddə Mərkəzi Asiya Dövlət Başçılarının 7-ci Məşvərət Görüşündə çıxışı zamanı bildirib.
Ölkə başçısı çıxışında bununla bağlı konkret məqamlara toxunub: “Xüsusilə qeyd edək ki, artıq Füzuli şəhərində Mirzə Uluqbəy adına məktəb və Kurmanqazı adına Uşaq İncəsənət Mərkəzi, Ağdamda isə Manas məktəbi fəaliyyət göstərir. Bu, özbək, qazax və qırğız qardaşlarımızın hədiyyələridir. Bu ilin oktyabrında Füzulidə Türkmənistanın qardaşlıq dəstəyinin rəmzinə çevriləcək məscidin təməli qoyulub. Bütün bunlar qardaşlığımızın və həmrəyliyimizin sübutu kimi qədirbilən Azərbaycan xalqının yaddaşında qalacaqdır”.
Göründüyü kimi, Orta Asiyanın 5 dövlətindən dördü işğaldan azad olunmuş ərazilərin bərpasına öz vəsaiti hesabına töhfə verir. Abadlıq işlərinə töhfə vermək baxımından hələlik hərəkətsiz qalan ölkə yalnız Tacikistandır. Maraqlıdır, bəs Tacikistan nə vaxt hərəkətə gələcək?
“Özbəkistana, Qazaxıstana, Qırğızıstana, Türkmənistana baxanda bu ölkə ilə əlaqələrimiz nisbətən aşağı səviyyədə olub”
Sözügedən məsələyə aydınlıq gətirən siyasi ekspert Elşad Həsənov “Bakı-Xəbər”ə açıqlamasında Tacikistanın bu məsələdə gecikməsini bəzi amillərlə əlaqələndirdi: “Əvvəla, Azərbaycanın Mərkəzi Asiya ölkələrinin əməkdaşlıq formatına qoşulması önəmli hadisədir. Orta Asiya ölkələri yekdilliklə bunu qəbul etdilər. Prezident İlham Əliyev məşvərət toplantısında bildirdi ki, son 3 ildə 14-cü dəfədir Orta Asiyaya səfər edir. O cümlədən, Orta Asiya ölkələrinin rəhbərləri də bir neçə dəfə Azərbaycana səfər ediblər. Üstəlik, Özbəkistan, Qazaxıstan, Qırğızıstan və Türkmənistan işğaldan azad edilmiş ərazilərin bərpasına töhfə verib. Ancaq hələ ki, Tacikistan belə bir töhfə verməyib. Niyə? Bunun bir səbəbi onunla bağlıdır ki, Tacikistan türkdilli dövlət deyil. Onlar farsdillidir. Tacikistanla bizim diplomatik əlaqələrimiz 1992-ci ildə qurulsa da, Düşənbədə səfirliyimiz 2006-cı ildə açılıb. Tacikistanla əlaqələrimiz BMT, MDB və İslam Əməkdaşlıq Təşkilatı çərçivəsində daha çox olub. Digər Orta Asiya ölkələri ilə isə təmaslar daha sıx olub. Yəni Özbəkistana, Qazaxıstana, Qırğızıstana, Türkmənistana baxanda Tacikistanla əlaqələrimiz nisbətən aşağı səviyyədə olub. Həm siyasi-iqtisadi, həm də mədəni əlaqələrimiz nisbətən zəif olub. Ancaq buna baxmayaraq, Azərbaycanın məlum formata qoşulması əlaqələrimizi gücləndirəcək. Azərbaycan müasir nəqliyyat-logistika infrastrukturu yaradaraq beynəlxalq nəqliyyat sisteminə inteqrasiya olunur. Orta Dəhlizin əsas onurğası Azərbaycandan keçir. Bu imkanlardan Orta Asiya ölkələri də faydalanır. Güman edirəm ki, müəyyən müddətdən sonra Tacikistan da belə bir töhfə verəcək. Çünki Azərbaycanın bu ölkə ilə əlaqələri getdikcə genişlənir. Bütün bunlar Tacikistanın siyasətinə təsirsiz ötüşməyəcək”.
Vidadi ORDAHALLI
