Azərbaycan məmur korpusunun əhalinin xidmətində durması ilə bağlı məsələyə Prezident İlham Əliyev Ceyhun Cəlilovu Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi, Elxan İbrahimovu Bakı şəhəri Nəsimi Rayon İcra Hakimiyyətinin başçısı, Natiq Ağayevi Balakən Rayon İcra Hakimiyyətinin başçısı, Orxan Mürsəlovu Göyçay Rayon İcra Hakimiyyətinin başçısı, Elvin Paşayevi Qax Rayon İcra Hakimiyyətinin başçısı, Vüqar Novruzovu Göygöl Rayon İcra Hakimiyyətinin başçısı, Elşən Həsənlini Kürdəmir Rayon İcra Hakimiyyətinin başçısı vəzifələrinə təyin olunmaları ilə əlaqədar qəbul edərkən bir daha geniş şəkildə toxundu.
Regionlarda görülən işlərdən danışan dövlət başçısı bəzi maraqlı məqamlara da toxunaraq, yerlərdə bu gün hələ də mövcud olan, insanları narahat edən məsələlərin öz həllini tapmasının vaciblyini bildirdi.
Qeyd etdi ki, burada da əsas prinsip sosial ədalət prinsipidir: “Hər bir bölgədə, hər bir kənddə insanlar görməlidir və bilməlidir ki, ədalət hər zaman üstünlük təşkil edir. Vaxtilə bizim bölgələrimizdə proseslərin mənfi istiqamətdə getməsinin səbəbi də məhz mərkəzi icra orqanlarındakı bəzi məmurların xoşagəlməz hərəkətləri və tapşırıqları idi. Artıq o məmurlardan, necə deyərlər, əsər-əlamət qalmayıb. Azərbaycanda məmur korpusunda, xüsusilə mərkəzi icra orqanlarında aparılan kadr islahatları nəticəsində vəziyyət böyük dərəcədə sağlamlaşdırılıb. Ona görə mən tam əminəm ki, bundan sonra mərkəzdən sizə hansısa bir qanunsuz tapşırıq verilməyəcək. Vaxtilə belə hallar olub və bu qanunsuz tapşırıqları verən, qanunsuz varlanmanı özləri üçün əsas məqsəd hesab edən məmurlar bu gün məhkəmə qarşısında cavab verirlər. Bir çox hallarda torpaqlardan səmərəsiz istifadə edilməsi halları olub, torpaqlar zəbt edilib, torpaqların kateqoriyaları dəyişdirilib. Əkin-biçin üçün yararlı olan torpaqlarda bəzi məmurlar özləri üçün imarətlər inşa ediblər və əlbəttə ki, bütün bunlar qanunsuz hərəkətlərdir. Ancaq mən onu da bilirəm ki, yerlərdəki bəzi məmurlar məcbur olub o qanunsuz hərəkətləri icra ediblər. Onların, əlbəttə ki, üzərinə düşən məsuliyyət tamamilə başqa yanaşmanı tələb edirdi. Ancaq, eyni zamanda, o da həqiqətdir ki, bəzi hallarda bax, bu qanunsuz əməllərin təməlində harınlamış, acgöz, gözü doymayan mərkəzdə oturan məmurların göstərişləri olub. Amma yenə də deyirəm, sağlamlaşdırma və təmizləmə siyasəti nəticəsində artıq əminəm ki, sizə heç kim qanunsuz tapşırıq verməyəcək. Əgər kimsə bu tapşırığı verərsə, onda dərhal mənə məlumat verin və o adamlar haqqında ciddi ölçülər götürüləcək”. Burada bir daha xatırladaq ki, müasir dövrdə dövlət idarəçiliyinin səmərəliliyi və vətəndaş məmnunluğu birbaşa olaraq dövlət qulluqçularının, yəni məmur korpusunun fəaliyyətindən asılıdır. Buna görə də Azərbaycanda dövlət idarəetməsinin təkmilləşdirilməsi və məmur sisteminin yenilənməsi son illərdə aparılan islahatların prioritet istiqamətlərindən biridir. Elə prezident İlham Əliyevin rəhbərliyi ilə həyata keçirilən struktur və kadr islahatları, şəffaf idarəetmə prinsiplərinin tətbiqi və gənc kadrlara üstünlük verilməsi bu sahədə keyfiyyətcə yeni mərhələ yaradıb.
Ümumiyyətlə, son illərdə aparılan struktur islahatları da məmur korpusunun səmərəliliyini artırmağa yönəlib. 2018-ci ildən etibarən bir sıra dövlət orqanlarında birləşmələr və optimallaşdırmalar həyata keçirildi. Prezident Administrasiyası, Nazirliklər, Agentliklər və Xidmətlər yeni idarəetmə modelinə keçdi. Bu dəyişikliklərin əsas məqsədi təkrarlanan funksiyaları aradan qaldırmaq, qərar qəbulunu sürətləndirmək və məmur aparatını çevik idarəetmə sisteminə çevirmək idi. Digər tərəfdən, dövlət qulluqçularının peşəkar hazırlığının artırılması da islahatların mühüm tərkib hissəsidir. İslahatların mühüm tərəfi həm də gənc kadrlara yol açılması və idarəetmədə nəsil dəyişməsinin təmin olunmasıdır. Azərbaycan rəhbərliyinin son illərdə həyata keçirdiyi kadr siyasəti gənc, savadlı və innovativ düşüncəyə malik mütəxəssislərin dövlət strukturlarında önə çıxmasına şərait yaradıb. Yeni nəsil məmurların yüksəlməsi dövlət idarəçiliyində dinamizmi və səmərəliliyi artırır. Eyni zamanda, vəzifəyə təyinatlarda meritokratiya – yəni bilik və bacarığa əsaslanan seçim prinsipi güclənib. Eyni zamanda, məmur etikasının formalaşdırılması da diqqət mərkəzindədir. Dövlət qulluğunda etik davranış qaydaları, maraqların toqquşmasının qarşısının alınması, vətəndaşlara bərabər münasibət prinsipləri barədə maarifləndirici tədbirlər aparılır. Etik qaydaların pozulması hallarında inzibati məsuliyyət tədbirləri tətbiq olunur ki, bu da dövlət xidmətinin nüfuzunu qorumağa xidmət edir. Bununla yanaşı, islahatlar hələ tamamlanmayıb. Bəzi hallarda bürokratik yanaşmalar, qərarların icrasında ləngimə və informasiyanın paylaşılmaması kimi problemlər qalmaqdadır. Bu baxımdan, görülən işlər də xüsusi diqqətdədir. Ümumilikdə, Azərbaycanda məmur korpusunda aparılan islahatlar dövlətin modernləşməsi prosesinin mühüm tərkib hissəsidir. Bu islahatlar nəticəsində dövlət qulluğu daha şəffaf, çevik və effektiv idarəetmə mexanizminə çevrilməkdədir. Yeni nəsil dövlət qulluqçularının formalaşması isə Azərbaycanın gələcək inkişaf strategiyasının davamlılığını təmin edir. Beləliklə, Azərbaycanda məmur korpusunda aparılan islahatlar sadəcə kadr dəyişikliyi deyil, həm də dövlət idarəçiliyinin yenilənməsi prosesidir. Bu islahatlar vətəndaşa xidmət edən, şəffaf və məsuliyyətli idarəetmə modelinə keçidin əsasını qoyur.
Samirə SƏFƏROVA
